Read Sehwi Deuteronomi 5 Bible Online

Deuteronomi 5 - Sehwi bible

Deuteronomi 5

¹Mose mane Yisraelfoɛ amukoraati beeyiale, na osele bɛ kyɛ, “O Yisrael, ɛ́mɔtie ahyɛdeɛ ne nhyehyɛleɛ bɔ méka ma ɛmɔte ye ɛnɛ kyẽa ye. Ɔsɛ kyɛ ɛmɔsua ná ɛmɔdi so pɛpɛɛpɛ.

²AWURADE yɛ Nyameɛ ne yɛ yɛle apam wɔ Horebo.

³Nna yɛ nana mɔ yeɛ AWURADE ne bɛ yɛle apam he ɔ, na mmom ɔne yɛ, yɛ mukoraati bɔ kekesaala ye yɛte ase ye.

⁴AWURADE gyinane ɛmɔ nyunu dwudwo hyirele ɛmɔ fili see ne anu wɔ bokaa ne aso.

⁵Na sɔ mmerɛ ne, me de ngyinane AWURADE ne ɛmɔ afia, kyɛ méka AWURADE noa dwirɛ mékyire ɛmɔ; ofikyɛ né ɔnate see ne ati ɛmɔsuro, na ɛmɔamvo bangɔ bokaa ne aso. Na ɔhane kyɛ,

⁶ “ ‘Me ole AWURADE wɔ Nyameɛ bɔ nyele wɔ mvili Misraim aseɛ so, fili ngoaasolɛ nu ne.

⁷“ ‘Nnɛnya nyameɛ foforɛ biala ɛboka me so.

⁸ “ ‘Nnɛyɔ amoen biala ɛso ye, anaa nikyee biala bɔ ye sue te kyɛ ewienu anwuro anwuro nikye, anaa aseɛ so nikye, anaa aseɛ bo dɔ nzue nu nikye.

⁹ Nnɛkoto bɛ, yeɛ nnɛso bɛ; ofikyɛ me, AWURADE wɔ Nyameɛ ne, nde nungunɛ Nyameɛ, na meprapra seɛ mɔ bɛ bɔne nwo asohwenɛ megua bɛ mma mɔ so, maa okodwu aworɛ ndoatoasoɛ nza ne nna bɔ bɛpɔ me so.

¹⁰Nakoso bɛ bɔ bekuro me dwirɛ, ná bedi me mmeraa dwirɛ so ne de, mekuro bɛ dwirɛ maa okodwu aworɛ ndoatoasoɛ apee apee so.

¹¹ Nnɛbɔ AWURADE wɔ Nyameɛ dumaa mbaen mbaen; ofikyɛ ebiala bɔ ɔkɔbɔ AWURADE dumaa mbaen mbaen ne, ɔngɔma ɔngɔfa ye nwo ngoli tɔtorɔtɔɔ.

¹² “ ‘Di afofikyẽa ne, ná yɛ ye krongron, kyɛbɔ AWURADE wɔ Nyameɛ ahyɛ wɔ ne.

¹³ Elesia yeɛ fa yɔ adwuma, ná yɔ wɔ nningyein mukoraati ɔ.

¹⁴ Nakoso kyẽa bɔ ɔtɔ so nzoo ne de, ɔte afofikyẽa ma AWURADE wɔ Nyameɛ. Nnɛyɔ adwuma biala sɔ kyẽa ne: wɔ oo, ɛwa bienzua oo, ɛwa brasua oo, w’akoaa oo, w’afaneɛ oo, wɔ nandwie oo, w’afunum oo, wɔ nyɛmmoa mɔ nu biala oo, anaa ɛwɔfoɛ bɔ ɔte wɔ kuro ɔ, amaa ɔnate so w’akoaa ne w’afaneɛ bale bɛ nwome kyɛ wɔ ala.

¹⁵Kaye kyɛ né ɛte kanga wɔ Misraim aseɛ so, na AWURADE wɔ Nyameɛ nate tumi piri ne tumi asaa so yele wɔ fili berɛ. Ye sɔ ne ati, AWURADE wɔ Nyameɛ ahyɛ wɔ kyɛ eli afofikyẽa ne aso.

¹⁶ “ ‘Di ɛse ne eni ni, kyɛbɔ AWURADE wɔ Nyameɛ ahyɛ wɔ ne, amaa ɔnate so anya ngoa tendenn, ná wayie wɔ yé wɔ aseɛ bɔ AWURADE wɔ Nyameɛ ɔ́fa ma wɔ ne aso.

¹⁷ “ ‘Nnɛdi awue.

¹⁸ “ ‘Nnɛsɛkye agyaa.

¹⁹ “ ‘Nnɛwua.

²⁰ “ ‘Yeɛ nnɛdi adanzewia tia ebiɛngo.

²¹ “ ‘Nnɛma wɔ nye yɛ eliɛngo aye nwo koakoa. Yeɛ nnɛma wɔ nye boro eliɛngo awuro, anaa ye aseɛ, ye akoaa, ye afaneɛ, ye nandwie, ye afunum, anaa nikyee biala bɔ eliɛngo deɛ ahɔ ɔ.’

²² Sɔ dwirɛ hemɔ, AWURADE fale komviɛ piri dwudwo hyirele ɛmɔ maen ye amukoraa wɔ see ne anu, wɔ munungum ne anu, ɔne awosii kabii ne anu wɔ bokaa ne aso; na wamva edwirɛ biala wammoka so. Ɔhyerɛle bɛ guale nyɔboɛ taataa nyɔ so yeɛ ɔfa mane me ɔ.

²³Na mmerɛ bɔ ɛmɔtele komviɛ ne befili awosii ne anu, bɔ né bokaa ne ɔ́yera nen, ɛmɔ abusua kure nu mbanyi mukoraati ne ɛmɔ mbanyi mɔ wale me berɛ.

²⁴Na ɛmɔsele kyɛ, ‘AWURADE yɛ Nyameɛ waye ye animnyam ne ye tumi piri wahyire yɛ, na yate ye komvi yafi see ne anu. Ɛnɛ de, yanwu ye kyɛ, sɛ Nyameɛ ne sona dwudwo a, saa sɔ sona ne kora nya ngoa.

²⁵Nzaade nzu ati yeɛ ɔsɛ kyɛ yɛwu ɔ? Ofikyɛ sɔ see piri he kɔyera yɛ. Na sɛ yɛte AWURADE yɛ Nyameɛ komvi bieku a, ye de yɛkowuwu.

²⁶Ofikyɛ dasaniɛ beni yeɛ wate Nyameɛ teasefoɛ ne komvi kyɛ odwudwo fi see nu, kyɛbɔ yate ye, ná wanya ngoa ɔ?

²⁷Wɔ de, pingye berɛ, ná tie edwirɛ bɔ AWURADE yɛ Nyameɛ kɔha amukoraa; ná ka bɔ AWURADE yɛ Nyameɛ kɔha kohyire wɔ amukoraa kyire yɛ. Yɛkotie ná yali so.’

²⁸Na ɛmɔhane bɛ dwirɛ ne behyire me nen, AWURADE tele, na AWURADE sele me kyɛ, ‘Mate mmenia hemɔ dwirɛ bɔ baha bahyire wɔ ne, na bɔ baha ne amukoraa te nahorɛ.

²⁹O, sɛ ahaa daa biala bele sɔ adwene ne, kyɛ bekosuro me ná bali me mmeraa dwirɛ mukoraati so a, ahaa okoyie bɛ ne bɛ mma mɔ yé afebɔɔ!

³⁰Kɔ ná kɔha kyire bɛ kyɛ, “Ɛ́mɔsa bɛhɔ ɛmɔ tena sua nemɔ nu.”

³¹Nakoso wɔ de, gyina me nwo wa, na ngɔhã mmeraa dwirɛ ne ahyɛdeɛ ne nhyehyɛleɛ mukoraa bɔ ɛkɔfa kohyirehyire bɛ ɔ ngohyire wɔ, amaa ɔnate so bali so wɔ aseɛ bɔ méfa memaa ɔyɛ bɛ deɛ ne aso.’

³²Yiti bɔ AWURADE ɛmɔ Nyameɛ ahyɛ ɛmɔ kyɛ ɛ́mɔyɔ ne, ɛ́mɔnea kyɛ ɛmɔkoli so ɔ. Nnɛma ɛmɔnea bɛen anaa famaa.

³³Atee amukoraati bɔ AWURADE ɛmɔ Nyameɛ wahyɛ kyɛ ɛ́mɔfa so bɛ́bɔ bɛ bra ne, odi kyɛ ɛmɔfa so, amaa ɔnate so ɛmɔanya ngoa, ná wayie ɛmɔ yé, ná ɛmɔatena aseɛ bɔ ɛmɔ sa baahã ye ne aso bahyɛ.