Read Sehwi Deuteronomi 6 Bible Online

Deuteronomi 6 - Sehwi bible

Deuteronomi 6

¹“Afei mmeraa dwirɛ, ahyɛdeɛ ne nhyehyɛleɛ bɔ AWURADE ɛmɔ Nyameɛ hyɛle me kyɛ ngyirekyire ɛmɔ ma ɛmɔli so wɔ aseɛ bɔ ɛmɔkwaapɛ asue Yɔɔdan bɛkɔɔfa ne ɛhe;

²amaa ɔnate so ɛne wɔ mma ne wɔ nnomaa ɛmɔasuro AWURADE wɔ Nyameɛ, wɔ w’asetena mukoraati nu, ná ali ye ahyɛdeɛ ne ye mmeraa dwirɛ mukoraati bɔ méhyɛ wɔ ne aso, ná anya ngoa tendenn.

³Yiti, Yisrael, tie, ná nea kyɛ ekoli so ɔ, amaa ɔnate so wayie wɔ yé, ná wɔ boso atrɛ pee wɔ aseɛ bɔ nyɔfonesue ne woɛ tengyɛ wɔ so ne aso, kyɛbɔ AWURADE wɔ nana mɔ Nyameɛ ahyɛ wɔ bɔ ne.

⁴ “Yisrael, tie, AWURADE yɛ Nyameɛ ne ole AWURADE komapɛ ne.

⁵ Fa w’ahone mukoraati, wɔ kra mukoraati, ɔne w’anwoserɛ mukoraati kuro AWURADE wɔ Nyameɛ dwirɛ.

⁶ Na mmeraa bɔ méhyehyɛ méma wɔ ɛnɛ ye, maa ɔla w’ahone nwo.

⁷Fa kyirekyire wɔ mma mɔ paa. Na sɛ ɛte w’awuro oo, ɛnate atee so oo, ɛda oo, anaakyɛ edwɔso oo, ɔsɛ kyɛ edi ye nwo ngɔmɔ.

⁸ Kyekye fa bɔ wɔ sa ma ɔyɛ sɛngyerɛnneɛ, ná fa bɔ wɔ nwoma so ma ɔyɛ ngayeɛ,

⁹ná kyerɛ gua w’awuro aponnwaa nwo ne wɔ pambim mɔ nwo.

¹⁰ “Na sɛ AWURADE wɔ Nyameɛ fa wɔ kodwu aseɛ bɔ ɔtale ndaen hyirele wɔ nana mɔ Abraham, Yisake ne Yakob kyɛ ɔkɔfa kɔma wɔ ne aso a: aseɛ bɔ nguro mbiri nyemenenyemene bɔ nna wɔ yeɛ ɛkyekyele ɔ wɔ so,

¹¹aseɛ bɔ sua mɔ nu nningyein paa mukoraati ayi bɛ tɛkyɛ bɔ nna wɔ yeɛ ɛfa guale nu ɔ, aseɛ bɔ abura mɔ bɔ nna wɔ yeɛ etuli ɔ wɔ so ɔ, aseɛ bɔ bobe boo ne olive boo bɔ nna wɔ yeɛ ɛyɔle ɔ wɔ so ne: ná sɛ edidi ma wɔ ko yi a,

¹²nea yé né wɔ wora amvi AWURADE bɔ ɔyele wɔ fili Misraim aseɛ so, fili ngoaasolɛ nu ne.

¹³ Suro AWURADE wɔ Nyameɛ, ye yeɛ ɔsɛ kyɛ ɛso ye ɔ, na ye dumaa ngome yeɛ fa ta ndaen ɔ.

¹⁴Nnɛma ɛmɔdi nyameɛ foforɛ biala si; mmenia bɔ bapɛ ɛmɔ nwo bayia ne, nnɛma ɛmɔdi bɛ nyameɛ nemɔ nu biala si,

¹⁵ofikyɛ AWURADE wɔ Nyameɛ bɔ ɔne wɔ nate ne, ɔte nungunɛ Nyameɛ. AWURADE wɔ Nyameɛ kɔfɛ wɔ so yaa piri paa, na okohu wɔ kokyikyi wɔ boso kofi aseɛ ye aso.

¹⁶ “Nnɛma ɛmɔso AWURADE ɛmɔ Nyameɛ ne bɛnea, kyɛbɔ ɛmɔsole ye bɛneane wɔ Masa ne.

¹⁷AWURADE ɛmɔ Nyameɛ mmeraa dwirɛ, ye dwirɛ ne ye ahyɛdeɛ bɔ wahyɛ wama ɛmɔ ne, ɛ́mɔli so pɛpɛɛpɛ.

¹⁸Yɔ bɔ ɔte paa, bɔ ɔsɔ AWURADE nye ɔ, amaa ɔnate so wayie wɔ yé, ná aafa aseɛ paa bɔ AWURADE tale ye nwo ndaen hyirele wɔ nana mɔ kyɛ ɔkɔfa kɔma wɔ ne,

¹⁹ná wafoa wɔ pɔfoɛ mɔ amukoraati wafi wɔ nyunu, kyɛbɔ AWURADE hyɛle bɔ ne.

²⁰“Na sɛ kyẽa bie ɛwa bisa wɔ kyɛ, ‘Edwirɛ ne ahyɛdeɛ ne nhyehyɛleɛ hemɔ bɔ AWURADE yɛ Nyameɛ ahyɛ ama ɛmɔ ne, ye bo kyire sɛɛ?’ a,

²¹wɔ koso bua ɛwa ne kyɛ, ‘Né yɛte Faro nganga wɔ Misraim, nakoso AWURADE nate tumi piri so yeɛ ɔyele yɛ fili Misraim ɔ;

²²na AWURADE fale nzɛngyerɛnneɛ ne anwanwadeɛ mbiri mbiri bɔ ɔyɛ suro hwene Misraim ne Faro ne ye awuro ama mukoraati so, bɔ né yɛ nye tua ɔ.

²³Nakoso yɛ de, ɔyele yɛ fili berɛ kyɛ ɔ́fa yɛ ba aseɛ bɔ ɔtale ye nwo ndaen hyirele yɛ nana mɔ ne aso, maa yɛfa yɛyɛ yɛ deɛ.

²⁴Na AWURADE hyɛle yɛ kyɛ yɛli ahyɛdeɛ hemɔ amukoraati so, kyɛ yɛ́suro AWURADE yɛ Nyameɛ ne, amaa ɔnate so wayie yɛ yé afebɔɔ, ná wamaa yanya ngoa, kyɛbɔ wayɔ wama yɛ maa waadwu ɛnɛ ye.

²⁵Na sɛ yɛdi mmeraa dwirɛ he amukoraati so pɛpɛɛpɛ wɔ AWURADE yɛ Nyameɛ nyunu, kyɛbɔ wahyɛ yɛ ne a, ye de yɛkɔtengyɛ wɔ ye nyunu.’