Read Sehwi Deuteronomi 8 Bible Online

Deuteronomi 8 - Sehwi bible

Deuteronomi 8

¹“Mmeraa dwirɛ amukoraa bɔ méhyehyɛ méma ɛmɔ ɛnɛ kyẽa ye, ɛ́mɔli so yé, amaa ɔnate so ɛmɔanya ngoa ná ɛmɔasone pee, ná ɛmɔahɔ baafa aseɛ bɔ AWURADE tale ye nwo ndaen kyɛ ɔkɔfa kɔma ɛmɔ nana mɔ ne.

²Kaye atee amukoraa bɔ AWURADE wɔ Nyameɛ maa ɛfale so wɔ ɛserɛ so sɔ afoɛ aburanna ye anu, kyɛ ɔbrɛ wɔ ase, ná oso wɔ nea onwu w’ahone nu dwirɛ, sɛ aso ekoli ye mmeraa dwirɛ so anaakyɛ engoli so.

³ Ɔmane ɛhɔen huni wɔ fa brɛle wɔ ase, na mana bɔ né ɛnze nikye horɛ, bɔ wɔ nana mɔ koso bɛnze nikye horɛ ne, ɔmane wɔ bie maa elili. Ɔyɔle sɔ, kyɛbɔ ɔkɔmaa ekonwu ye kyɛ, nna aleɛ ngome yeɛ ɔma sona nya ngoa ɔ, na mmom AWURADE noa nu dwirɛ biala yeɛ ɔma sona nya ngoa ɔ.

⁴Afoɛ aburanna ye anu, wɔ tena bɔ ɛhera ɔ wandete, yeɛ wɔ gya bo koso wannwunwu.

⁵Na nwu ye kyɛ, kyɛbɔ sona tea ɔwa ne, sɔ ala yeɛ AWURADE wɔ Nyameɛ tea wɔ ɔ.

⁶Yiti di AWURADE wɔ Nyameɛ mmeraa dwirɛ so, fa ye atee so ná suro ye.

⁷Ofikyɛ AWURADE wɔ Nyameɛ ɔ́fa wɔ kɔ aseɛ paa so, aseɛ bɔ asue mɔ ne asue mmaa mmaa ne mbombonzue wɔ ye bɔnza mɔ nu, ɔne ye mmokaa so,

⁸aseɛ bɔ atokoɔ ne ayuo, bobe ne borɔdoma ne akengaa wɔ so ɔ, aseɛ bɔ olive mmakaa ne woɛ wɔ so ɔ,

⁹aseɛ bɔ aleɛ nwo nyɛ se wɔ so ɔ, nekaa bɔ nikye fee nwo ngohia wɔ ɔ, aseɛ bɔ so nyɔboɛ te buralɛ ɔ, na ekonya kɔɔbere kotu wɔ ye mmokaa nemɔ anu.

¹⁰Na sɛ edidi ma wɔ ko yi a, ye AWURADE wɔ Nyameɛ ayɛ, ɔnate aseɛ paa bɔ wafa wama wɔ ne ati.

¹¹ “Nea yé né wɔ wora amvi AWURADE wɔ Nyameɛ, kyɛ engoli ye mmeraa dwirɛ ne ye nhyehyɛleɛ ne ye ahyɛdeɛ bɔ méhyɛ méma wɔ ɛnɛ ye aso ɔ:

¹²Na sɛ edidi ma wɔ ko yi, ná esisi sua nyemenenyemene ɛtena nu,

¹³ná wɔ nandwie ne wɔ mmoaen mɔ ta pee, ná enya ɛdwetɛ ne esikaa kɔkorɛ pee, ná bɔ ele ye biala sone pee a,

¹⁴ye de nea yé né anwomasoɛ amma wɔ nu, ná wɔ wora amvi AWURADE wɔ Nyameɛ bɔ ɔyele wɔ fili Misraim aseɛ so, fili ngoaasolɛ nu ne;

¹⁵ye bɔ olili wɔ nyunu moa ɔfale wɔ fale ɛserɛ pirikua suronyisuronyi so, aseɛ pralaa bɔ ewoo ne anyanyangyeleɛ bɔ bɛ noa te borɔ wɔ so ne. Ɔmane nzue fili nyɔbotaen nu pu wale mane wɔ,

¹⁶na ɔmane wɔ mana bɔ wɔ nana mɔ bɛnze nikye horɛ maa elili wɔ ɛserɛ so, kyɛ ɔ́fa brɛ wɔ ase ná oso wɔ nea, maa oyie wɔ yé.

¹⁷Nnɛyɛ w’adwene kyɛ, ‘Ɔnate m’anwoserɛ ne m’abasa nu serɛ so yeɛ manya me nwo ɔ.’

¹⁸Na mmom kaye AWURADE wɔ Nyameɛ, ofikyɛ ye yeɛ ɔma wɔ anwoserɛ maa ɛfa nya wɔ nwo ɔ, kyɛbɔ kekesaala ye ɔwɔ so ɔyɔ ye; amaa ɔnate so apam bɔ ɔtale ye nwo ndaen hyirele wɔ nana mɔ ne, wasi ye agyinayɛɛ.

¹⁹Na sɛ ɛma wɔ wora fi AWURADE wɔ Nyameɛ, ná ekodi nyameɛ foforɛ biemɔ si, ná ɛso bɛ, ɛsɔne bɛ a, ye de mébɔ wɔ kɔkɔ kitii ɛnɛ kyẽa ye kyɛ, ewue yeɛ ekowu ɔ.

²⁰Na kyɛbɔ AWURADE sɛkye maen maen bɔ bɛko betia wɔ ne, sɔ ala yeɛ sɛ andie AWURADE wɔ Nyameɛ dwirɛ a, ɔkɔsɛkye wɔ ɔ.