Read Sehwi Deuteronomi 9 Bible Online

Deuteronomi 9 - Sehwi bible

Deuteronomi 9

¹“Yisrael, tie! Ɛnɛ kyẽa ye, maen maen bɔ bɛ mbiri ne b’anwoserɛ tra wɔ ɔ, ɛkwaapɛ asue Yɔɔdan ekode b’aseɛ, ɔne bɛ nguro mbiri bɔ bato bɛ nwo fasue bahɔ ewienu ɔ;

²bɛte mmenia ndendenn bɔ bɛ nwo yɛ se ɔ, Anake bosofoɛ, kyɛbɔ ɛse bɛ ne, ɔne kyɛbɔ ate bɛ nwo dwirɛ kyɛ, ‘Nwa yeɛ ɔkɔhora kogyina Anake bosofoɛ nyunu ɔ?’

³Yiti nwu ye ɛnɛ kyẽa ye kyɛ, AWURADE wɔ Nyameɛ yeɛ oli wɔ nyunu ɔkwaapɛ asue ɔ, na ɔte see bɔ ogye wuronyiwuronyi ɔ. Okoli bɛ so ngonim, ná wabrɛ bɛ ase wɔ wɔ nyunu; amaa ɔnate so afoa bɛ afi berɛ, ná ahũhũ bɛ ndɛndɛ so, kyɛbɔ AWURADE ahyɛ wɔ bɔ ne.

⁴“Na sɛ AWURADE wɔ Nyameɛ foa bɛ fi wɔ nyunu a, ɔyɛ a nnɛkã kyɛ, ‘Ɛtengyɛlɛ bɔ metengyɛ ti yeɛ AWURADE afa me wawa ɛwa kyɛ mmamva aseɛ ye ɔ.’ Na mmom, ɔnate maen hemɔ b’amumuyɛɛ ti yeɛ AWURADE ɔ́foa bɛ fi wɔ nyunu ɔ.

⁵Nna wɔ tengyɛlɛ anaa wɔ ti anu fufue ti yeɛ ɔmaa ɛkwaafa b’aseɛ ne ɔ, na mmom sɔ maen hemɔ b’amumuyɛɛ ti yeɛ AWURADE wɔ Nyameɛ ɔ́foa bɛ fi wɔ nyunu ɔ; amaa ɔnate so edwirɛ bɔ AWURADE tale ye nwo ndaen hyirele wɔ nana mɔ, Abraham, Yisake ne Yakob nen, wasi so agyinayɛɛ.

⁶“Yiti nwu ye kyɛ, nna wɔ tengyɛlɛ ti yeɛ AWURADE wɔ Nyameɛ ɔ́fa aseɛ paa he ma wɔ kyɛ ɛtena so ɔ, ofikyɛ ɛte maen bɔ ye so yɛ se ɔ.

⁷Kaye, na nnɛma wɔ wora fi kyɛbɔ ewurale AWURADE wɔ Nyameɛ apue mane ye ahone huli wɔ ɛserɛ so ne, ofi kyẽa bɔ efili Misraim aseɛ so wale, kɔpem kyɛ ɛmɔɔdwuli wa ɔ; AWURADE dwirɛ so alaa yeɛ ɛmɔahwi bafa ɔ.

⁸ Na Horebo bokaa ne anwo po, ɛmɔwurale AWURADE apue mane ye ahone huli, na AWURADE fɛle ɛmɔ so yaa bɔ ahaa oku ɛmɔ ɔ.

⁹ Na mmerɛ bɔ mvo ngɔle bokaa ne aso kyɛ mekwaale nyɔboɛ taataa ne, nyɔboɛ bɔ AWURADE apam bɔ ɔne ɛmɔ yɛle wɔ so nen, nnili bokaa ne aso eleburanna, eyia ne kɔngɔen. Mannidi, yeɛ manno hwee.

¹⁰Na AWURADE fale nyɔboɛ taataa nyɔ ne mane me. Né Nyameɛ afa ye sa mmɛseka wahyerɛ so. Na edwirɛ mukoraati bɔ AWURADE ha hyirele ɛmɔ fili see ne anu, wɔ bokaa ne aso, wɔ nyianu kyẽa nen, né ogua nyɔboɛ ne aso.

¹¹Na ngyẽa aburanna, eyia ne kɔngɔen wale ayieleɛ nen, AWURADE fale nyɔboɛ taataa nyɔ, bɔ ɔte apam nyɔboɛ ne mane me.

¹²Afei AWURADE sele me kyɛ, ‘Dwɔso ná fi wa dwu kɔ aseɛnwo dɔ ndɛndɛ, ofikyɛ wɔ mmenia bɔ ɛɛyele bɛ fili Misraim wale ne babɔ musue. Edwirɛ bɔ nhyɛle bɛ kyɛ beli so ne, bali ye nwo makyebu ndɛndɛ so; na bahuro nikyee bayɔ amoen baso ye.’

¹³“Na AWURADE sá sele me kyɛ, ‘Manwu sɔ mmenia hemɔ, kyɛ amba, bɛ so yɛ se.

¹⁴Yakyi me ma ngu bɛ, ná ngyikyi bɛ dumaa mvi aseɛ ye aso; na ngɔmaa ɛkɔyɛ maen pirikua bɔ ye nwo yɛ se tra bɛ ɔ.’

¹⁵Yiti ngakyili me nwo ndwu mvili bokaa ne aso male ase. Né see la bokaa ne anu, na né ndira apam nyɔboɛ taataa nyɔ ne wɔ me sa nyɔ nu.

¹⁶Nneane, na nwuni kyɛ amba ɛmɔayɔ bɔne batia AWURADE ɛmɔ Nyameɛ: ɛmɔhurole nikyee bɛyɔle nandwie ba bɛsole ye, na edwirɛ bɔ AWURADE hyɛle ɛmɔ kyɛ ɛmɔli so nen, ɛmɔhwi bɛfale so ndɛndɛ so.

¹⁷Yiti mbagyale nyɔboɛ nyɔ ne, na ngyi nguale maa nu bubuli, bɔ né ɛmɔ nye tua ɔ.

¹⁸Na ndole me nwo nyele aseɛnwo berɛ mvale me nyunu mutuli AWURADE nyunu, eleburanna, eyia ne kɔngɔen, kyɛbɔ nyɔle ye daa ne. Na ɔnate ɛmɔ bɔne amukoraati bɔ ɛmɔyɔle, bɔ ɔtte mayee wɔ AWURADE nyunu maa ɔfɛle yaa ne ati, mannidi, yeɛ manno hwee.

¹⁹ Ofikyɛ, kyɛbɔ né AWURADE asi afɛ ɛmɔ so yaa piri paa ne ati, né mesuro kyɛ okohu ɛmɔ. Nakoso AWURADE sá tiele me sɔ mmerɛ ne anu.

²⁰AWURADE fɛle Aarɔn so yaa piri paa bɔ ahaa oku ye ɔ, nakoso mbale kyerɛ mane Aarɔn koso sɔ mmerɛ ne.

²¹Afei mvale nandwie ba ne, bɔ ɔte ɛmɔ bɔne bɔ ɛmɔyɔle ne. Mvale see nyerale ye, mmubuli nu, na ndini ye muhumuhu kyɛ mvuture, na ngyili ye mvuture ne nguale asue ba bɔ ɔtengyɛ fi bokaa ne aso ɔba ne anu.

²² “Na ɛmɔdwuli Tabera, yeɛ afei Masa ne Kibrote Hataawa nen, ɛmɔwurale AWURADE apue mane ye ahone huli.

²³ Na mmerɛ bɔ AWURADE yɛle kyɛ ɛ́mɔtu béfi Kadese Banea nen, ɔhane kyɛ, ‘Ɛ́mɔfo bɛɛfa aseɛ bɔ mafa mama ɛmɔ ne.’ Nakoso ɛmɔhwi bɛfale AWURADE ɛmɔ Nyameɛ mmeraa dwirɛ so, na ɛmɔanne ye banni, yeɛ ɛmɔandie ye dwirɛ koso.

²⁴Na ɛmɔahwi bafa AWURADE dwirɛ so toonn fite kyẽa bɔ nwuni ɛmɔ ɔ.

²⁵“Yiti ndole me nwo nyele aseɛnwo berɛ mvale me nyunu mutuli AWURADE nyunu, eleburanna, eyia ne kɔngɔen, ofikyɛ né AWURADE aha kyɛ ɔbaahu ɛmɔ.

²⁶Na nzrɛle AWURADE kyɛ, ‘O AWURADE Nyameɛ, nnɛkuku wɔ mmenia bɔ bɛte wɔ nnehyeɛ bɔ ɛnate wɔ tumi so elele bɛ ne, bɔ ɛnate w’abasa nu serɛ so ɛyele bɛ fili Misraim wale ne.

²⁷Kaye wɔ ngoaa Abraham, Yisake ne Yakob, ná bu wɔ nye gua mmenia hemɔ b’asoserɛ, b’amumuyɛɛ ne bɛ bɔne so.

²⁸Anyɔ a, aseɛ bɔ ɛɛyele yɛ fili so wale ne, sofoɛ kɔha kyɛ, “AWURADE angora wamva bɛ wangɔ aseɛ bɔ ɔfa hyɛle bɛ bɔ ne aso, na ɔpɔ bɛ ne ati, yeɛ ɔmaa ɔɔyele bɛ kyɛ ɔbaahuhu bɛ wɔ ɛserɛ ne aso ɔ.”

²⁹Ofikyɛ bɛte wɔ mmenia ne wɔ nnehyeɛ, bɔ ɛnate wɔ tumi piri ne tumi asaa so ɛɛyele bɛ ɔ.