Read Sehwi Yohane 14 Bible Online

Yohane 14 - Sehwi bible

Yohane 14

¹“Nnɛmɔma ɛmɔ wora bɔ! Ɛmɔ de, ɛmɔle Nyameɛ beli, ná ɛmɔle me koso beli.

² Atenaleɛ pee wɔ me Baba awuro; na sɛ nna sɔ yeɛ ɔte hɔ a, aso ahaa mahã mahyire ɛmɔ kyɛ mekɔ mekosiesie nekaa mema ɛmɔ?

³ Na sɛ mekɔ ná mekosiesie nekaa mema ɛmɔ a, ngosa ngɔwa, ná maafa ɛmɔ mahɔ me bɔbɔ me berɛ, ná nekaa bɔ nwɔ ne, ɛmɔ koso bawa berɛ bie.

⁴Nekaa bɔ mekɔ ne, [ɛmɔse, na] ɛmɔse atee ne.”

⁵Yeɛ Tɔmase bisale ye kyɛ, “Awurade, yɛnze nekaa bɔ ɛ́kɔ ɔ; na ɔkɔyɛ sɛɛ né yahora yanwu atee ne?”

⁶ Na Yesu buale ye kyɛ; “Me ole atee ne, nahorɛ ne, ɔne ngoa ne; ebiala mma Baba ne berɛ, sana ɔnate me so.

⁷Sɛ ɛmɔse me a, ahaa ɛmɔanwu me Baba ne koso; na ofi ɛnɛ bɔ ɔkɔ ɔ, ɛmɔse ye, na ɛmɔanwu ye.”

⁸Yeɛ Filipo sele ye kyɛ, “Awurade, kyire yɛ Baba ne, na bɔ yɛhia hɔ ala ɛne.”

⁹ Na Yesu buale ye kyɛ, “Filipo, me ne ɛmɔ yɛwɔ berɛ dadadada ye, aso ɛnze me? Ebiala bɔ wanwu me ne, wanwu Baba ne; na nzu ati yeɛ ɛkã kyɛ, ‘Kyire yɛ Baba ne’ ɔ?

¹⁰Aso enne nni kyɛ nwɔ Baba ne nu, ná Baba ne koso ɔwɔ me nu ɔ? Edwirɛ mɔ bɔ mekã mekyire ɛmɔ ne, nna me bɔbɔ me tumi yeɛ mefa mekã ɔ; na mmom Baba ne bɔ ɔte me nu ne, ye yeɛ ɔyɔ ye nnwumaa ne ɔ.

¹¹Ɛmɔle me beli kyɛ nwɔ Baba ne nu, ná Baba ne koso ɔwɔ me nu ɔ; na sɛ ɔtte sɔ de a, nzaade nnwumaa ne ala ti ɛmɔle me beli!

¹² Nahorɛ nu paa, mekã mekyire ɛmɔ kyɛ: Ebiala bɔ ode me di nen, ye koso ɔkɔyɔ nnwumaa bɔ meyɔ ne bie, na ɔkɔyɔ bɔ ɔte mbiri mbiri tra ɛhemɔ ɔ; ofikyɛ me de, mékɔ me Baba ne berɛ.

¹³ Na nikyee biala bɔ ɛmɔkɔsrɛ ye me dumaa nu ne, ngɔyɔ, amaa ɔnate so Baba ne anya animnyam wɔ Baa ne nu.

¹⁴Sɛ ɛmɔsrɛ nikyee biala me dumaa nu a, ngɔyɔ.”

¹⁵ “Sɛ ɛmɔkuro me dwirɛ a, ɛmɔli m’ahyɛdeɛ so.

¹⁶Na me de, ngobisa Baba ne, na ɔkɔma ɛmɔ Aworakyekyerɛniɛ foforɛ, ná ɔne ɛmɔ baatena daa,

¹⁷ bɔ ye ole nahorɛ Sunzum bɔ ewiase ngora nne ye ndo nu ne; ofikyɛ onnwu ye, yeɛ ɔnze ye. Nakoso ɛmɔ de, ɛmɔse ye, ofikyɛ ɔne ɛmɔ yeɛ bɛte ɔ, na ɔkɔtena ɛmɔ nu.

¹⁸ “Mengɔyakyi ɛmɔ nyisiaafoɛ, ngɔwa ɛmɔ berɛ.

¹⁹Waha kãa bie né wiase nnwu me ko, nakoso ɛmɔ de, ɛmɔkonwu me; ɔnate kyɛ nde ase, na ɛmɔ koso ɛmɔkɔtena ase.

²⁰ Na sɔ kyẽa ne, ɛmɔkonwu kyɛ nwɔ Baba ne nu, ná ɛmɔwɔ me nu, ná me wora nwɔ ɛmɔ nu ɔ.

²¹ Na sona bɔ ole m’ahyɛdeɛ ná odi so nen, ye yeɛ okuro me dwirɛ ɔ; na bɔ okuro me dwirɛ nen, me Baba kohuro ye dwirɛ, ngohuro ye dwirɛ, na ngɔye me nwo ali ngohyire ye.”

²² Yeɛ Yudase (nna Yiskariote ɔ) bisale ye kyɛ, “Awurade, nzu ati yeɛ ɛbaaye wɔ nwo ali ekyire yɛ, na ɛnye ngyire wiase ɔ?”

²³ Na Yesu buale ye kyɛ, “Sɛ ebie kuro me dwirɛ a, okoli me dwirɛ so, na me Baba kohuro ye dwirɛ, na yɛkɔwa ye berɛ, ná yaayɔ yɛ atenaleɛ wɔ ye berɛ.

²⁴Na ebiala bɔ onguro me dwirɛ nen, onni me dwirɛ so; na edwirɛ bɔ ɛmɔte ye, ɔtte me deɛ, na mmom ɔte Baba ne bɔ ɔsomane me ne deɛ.

²⁵“Mahã edwirɛ hemɔ mahyire ɛmɔ, wɔ mmerɛ bɔ me ne ɛmɔ yɛwɔ berɛ ɔ.

²⁶ Na Aworakyekyerɛniɛ ne, bɔ ye ole Sunzum Krongron ne, bɔ Baba ne kɔsoma ye wɔ me dumaa nu ne, ye yeɛ okohyirehyire ɛmɔ nikyee biala ɔ, na ɔkɔkaye ɛmɔ bɔ mahã mahyire ɛmɔ ne amukoraa.

²⁷ “Asomdwee yeɛ mefa meyakyi ɛmɔ ɔ, m’asomdwee yeɛ mefa mema ɛmɔ ɔ; nna kyɛbɔ wiase fa ma ne yeɛ mefa mema ɛmɔ ɔ. Nnɛmɔma ɛmɔ wora bɔ, yeɛ nnɛmɔma ɛserɛ tɔ ɛmɔ so.

²⁸ Ɛmɔtele kyɛ nga ngyirele ɛmɔ kyɛ, ‘Mékɔ, na ngosa ngɔwa ɛmɔ berɛ.’ Sɛ ɛmɔkuro me dwirɛ a, ahaa ɔkɔyɛ ɛmɔ fɛ kyɛ mékɔ Baba ne berɛ ɔ, ofikyɛ Baba ne odi mu tra me.

²⁹Afei mahã mahyire ɛmɔ koraka ná wawa nu; amaa sɛ ɔba nu a, ɛmɔale bali.

³⁰ Me ne ɛmɔ yɛngodwudwo pee ko, ɔnate kyɛ bɔ odi wiase he aso ne, ɔ́ba, na olle tumi biala wɔ me so.

³¹ Nakoso kyɛbɔ Baba ne fale ahyɛdeɛ mane me ne, sɔ ala yeɛ meyɔ ɔ, amaa ɔnate so ewiase anwu kyɛ mekuro Baba ne dwirɛ. Ɛ́mɔdwɔso, ɛ́mɔma yɛfi wa yɛhɔ!”