Read Sehwi Yohane 16 Bible Online

Yohane 16 - Sehwi bible

Yohane 16

¹ “Mahã ɛhemɔ mahyire ɛmɔ, kyɛbɔ ɛmɔngɔyakyi ɛmɔ gyidie nu ɔ.

² Bekotu ɛmɔ bekofi nyianu sua mɔ nu. Ye po mmerɛ bie ɔ́ba, bɔ ebiala bɔ okohũ ɛmɔ ne, ɔkɔdwene kyɛ ɔyɔ sɔ fa so Nyameɛ.

³Na bɛkɔfa sɔ dwirɛ nemɔ bekoli ɛmɔ, ofikyɛ bennya bennwuni Baba ne anaa me.

⁴Na mahã ɛhemɔ mahyire ɛmɔ, amaa sɛ mmerɛ ne dwu a, ɛmɔakaye kyɛ nga ngyirele ɛmɔ. Na manga ɛhemɔ mangyire ɛmɔ ahyɛaseɛ ne, ɔnate kyɛ né me ne ɛmɔ yeɛ yɛwɔ berɛ ɔ.

⁵“Afei de, mékɔ bɔ ɔsomane me ne berɛ; nakoso ɛmɔ nu biala mmisa me kyɛ, ‘Nisua yeɛ ɛ́kɔ ɔ?’

⁶Na ɔnate kyɛ mahã ɛhemɔ mahyire ɛmɔ ne ati, aworabɔlɛ ayi ɛmɔ ahone nu tɛkyɛ.

⁷Nakoso mekã nahorɛ mekyire ɛmɔ; ɔte paa ma ɛmɔ kyɛ mékɔ ɔ, ofikyɛ sɛ mangɔ a, Aworakyekyerɛniɛ ne ngɔwa ɛmɔ berɛ; na sɛ mekɔ a, ngɔsoma ye maa ɔkɔwa ɛmɔ berɛ.

⁸Na ye de, sɛ ɔba a, ɔkɔma wiase konwu ye mvomsoɛ wɔ bɔne ne tenenee ne ndɛenbualɛ nwo.

⁹Bɔne nwo, ofikyɛ benne me benni;

¹⁰ tenenee nwo, ofikyɛ mékɔ me Baba ne berɛ, na ɛmɔngonwu me ko;

¹¹ndɛenbualɛ nwo, ofikyɛ Nyameɛ abua bɔ odi wiase he aso ne ndɛen dada.

¹² “Edwirɛ pee wɔ berɛ bɔ nne ye mekã mekyire ɛmɔ ɔ, nakoso ɛmɔngɔhora ngɔsɔ nu kekesaala ye.

¹³ Na sɛ ye, nahorɛ Sunzum ne, ɔba a, okohyire ɛmɔ atee kɔhɔ nahorɛ ne amukoraa nu. Ofikyɛ ɔngɔfa ye bɔbɔ ye tumi yeɛ okodwudwo ɔ, na mmom edwirɛ biala bɔ ɔkɔte ne yeɛ ɔkɔhã ɔ, na ɔkɔla nningyein bɔ bɛbaasisi ɔ ali kohyire ɛmɔ.

¹⁴ Ye yeɛ ɔkɔhyɛ me animnyam ɔ, ofikyɛ ɔkɔfa me deɛ ne, ná wala ye ali wahyire ɛmɔ.

¹⁵Baba ne, bɔ ole ye amukoraa te me deɛ; yiti yeɛ ngane kyɛ: Ɔkɔfa me deɛ ne, ná wala ye ali wahyire ɛmɔ.

¹⁶“Waha kãa bie né ɛmɔnnwu me ko; yeɛ afei waha kãa bie ɛmɔkonwu me. [Ofikyɛ mékɔ Baba ne berɛ].”[9]

¹⁷Yeɛ ye asuafoɛ ne anu biemɔ bisabisale bɛ nwo kyɛ, “Edwirɛ he bɔ ɔkã kyire yɛ ye, ye bo kyire sɛɛ: ‘Waha kãa bie né ɛmɔnnwu me ko; yeɛ afei waha kãa bie ɛmɔkonwu me’; yeɛ ‘Ofikyɛ mékɔ Baba ne berɛ’?

¹⁸Yeɛ bɛhane kyɛ: Ye bo kyire sɛɛ, bɔ ɔnwa, ‘Waha kãa bie’ ɔ? Yɛnde bɔ ɔkã ne bo.”

¹⁹Yeɛ Yesu nwuni kyɛ bɛpena kyɛ bebisa ye dwirɛ, yiti osele bɛ kyɛ, “Ɛhe nwo yeɛ ɛmɔbisabisa ɛmɔ nwo ye, kyɛ mahã kyɛ: ‘Waha kãa bie né ɛmɔnnwu me ko; yeɛ afei waha kãa bie ɛmɔkonwu me.’

²⁰ Nahorɛ nu paa, mekã mekyire ɛmɔ kyɛ: Ɛmɔkosu ná ɛmɔabɔ awuye, nakoso wiase koli ahurusi; na ɛmɔ de, ɛmɔ wora kɔbɔ, nakoso ɛmɔ aworabɔlɛ ne kɔkakyi ahurusililɛ.

²¹ Sɛ aworɛ kã brasua a, onwu yealɛ, ɔnate kyɛ ye mmerɛ adwu; nakoso sɛ ɔwo baa ne pɛ a, ɔngaye yealɛ ne ko, ɔnate anigye bɔ wanya ye kyɛ wawo sona wawa wiase ne ati.

²²Na ɛmɔ koso, kekesaala ye de, ɛmɔdi aworabɔlɛ, nakoso ngonwu ɛmɔ bieku, na ɛmɔ ahone kɔtɔ ɛmɔ kunu; na ɛmɔ anigye ne, ebiala ngole ngofi ɛmɔ sa nu.

²³ Na sɔ kyẽa ne dwu a, ɛmɔngobisa me nikye fee. Nahorɛ nu paa, mekã mekyire ɛmɔ kyɛ: Nikyee biala bɔ ɛmɔkɔsrɛ Baba ne wɔ me dumaa nu ne, ɔkɔfa kɔma ɛmɔ.

²⁴ Na ɔbaadwu ɛnɛ ye, ɛmɔnnya bebbisale nikyee biala wɔ me dumaa nu. Ɛ́mɔbisa, na ɛmɔ sa kɔhã ye, amaa ɔnate so ɛmɔ anigye ne wali mu.”

²⁵ “Mahã ɛhemɔ mahyire ɛmɔ wɔ anyandera nu; na mmerɛ bie ɔ́ba bɔ mengodwudwo ngohyire ɛmɔ wɔ anyandera nu ko ɔ, na mmom ngɔhã Baba ne nwo dwirɛ ngohyire ɛmɔ pefee.

²⁶Na sɔ kyẽa ne yeɛ ɛmɔkɔsrɛ wɔ me dumaa nu ɔ; na menga mengyire ɛmɔ kyɛ ngɔfa ngɔto Baba ne nyunu ngɔma ɛmɔ;

²⁷ɔnate kyɛ Baba ne bɔbɔ okuro ɛmɔ dwirɛ, ofikyɛ ɛmɔkuro me dwirɛ, na ɛmɔale bali kyɛ Baba ne berɛ yeɛ mvi mmale ɔ.

²⁸Baba ne berɛ yeɛ mvi mmale wiase ɔ; na afei de, méfi wiase, na mékɔ Baba ne berɛ.”

²⁹Yeɛ ye asuafoɛ nemɔ sele ye kyɛ, “Ehee, afei de, edwudwo pefee, na endwudwo anyandera nu.

³⁰ Afei de, yanwu kyɛ ɛse nningyein amukoraa, na enhia kyɛ ebie kobisa wɔ dwirɛ ɔ. Na ɛhe maa yɛde yɛdi kyɛ efi Nyameɛ berɛ yeɛ ɛwale ɔ.”

³¹Na Yesu bisale bɛ kyɛ, “Afei de, ɛmɔde bedi?

³² Ɛ́mɔtie, mmerɛ ne ɔ́ba, na wanya wawa, bɔ ɛmɔkɔbɔ aya, bɔ ebiala kɔhɔ ye kuro ɔ, na ɛmɔkɔyakyi me ngome nu; nakoso ɔhhale me ngome, ofikyɛ Baba ne boka me so.

³³ Mahã ɛhemɔ mahyire ɛmɔ, amaa ɔnate so ɛmɔanya me nu asomdwee. Ɛmɔkɔfa amaneɛ nu wɔ wiase de, nakoso ɛ́mɔma ɛmɔ ahone tɔ ɛmɔ kunu! Mali wiase so ngonim.”