Read Sehwi Yohane 18 Bible Online

Yohane 18 - Sehwi bible

Yohane 18

¹ Na Yesu hane sɔ dwirɛ nemɔ nen, ɔne ye asuafoɛ nemɔ bɛɛpɛle asue Kidron;[10] né turo bie wɔ berɛ, na ɔne ye asuafoɛ nemɔ bɛhɔle nu.

²Na Yudase bɔ ɔyele ye mane ne, né ɔse berɛ; ofikyɛ né Yesu ne ye asuafoɛ nemɔ bɛtaa bekoyia berɛ.

³ Yiti Yudase fale asraafoɛ kure ne awɛmvoɛ bɔ befi asɔfo mbanyi ne Farasiifoɛ nemɔ berɛ ɔ wale berɛ; ná ne betiratira ɛtɛen, nganea ne akodeɛ.

⁴Na Yesu de, né ɔse bɔ ɔbaato ye amukoraa; na ɔhɔle ye nyunu moa, na obisale bɛ kyɛ, “Ɛmɔpena nwa?”

⁵ Na bebuale ye kyɛ, “Yesu, Nasarɛteniɛ ne.” Yeɛ Yesu sele bɛ kyɛ, “Me ɛhe.” Na Yudase bɔ ɔyele ye mane ne, né ɔne bɛ yeɛ begyigyi berɛ ɔ.

⁶Na mmerɛ bɔ osele bɛ kyɛ, “Me ɛhe” nen, bepimbini bɛ si, na befifini ase.

⁷Yeɛ obisale bɛ bieku kyɛ, “Ɛmɔpena nwa?” Na bebuale kyɛ, “Yesu, Nasarɛteniɛ ne.”

⁸Yeɛ Yesu buale kyɛ, “Mahã mahyire ɛmɔ kyɛ me ɛhe; yiti sɛ me yeɛ ɛmɔpena me a, ye de ɛ́mɔma ɛhemɔ bɛhɔ!”

⁹ Na ɛhe mane edwirɛ bɔ ɔhane ye kyɛ, “Bɛ bɔ afa bɛ ama me ne, mamma bɛ nu biala wammini ne” wale nu.

¹⁰Yeɛ Simɔn Petro bɔ né otira ngrandɛ ne, ɔhwene, na ɔfa bɔle ɔsɔfo panyi paa n’akoaa pɛle ye so famaa. Akoaa ne dumaa li Malkose.

¹¹ Na Yesu sele Petro kyɛ, “Fa wɔ ngrandɛ ne wura ye bɔha ne anu! Kulie bɔ me Baba afa ama me ne, aso onni kyɛ meno anaa?”

¹²Yeɛ asraafoɛ kure ne ne bɛ safohene ne ne Yuda asomvoɛ nemɔ bɛhyele Yesu, na bɛkyekyele ye.

¹³ Na belili moa bɛfale ye bɛhɔle Anase nyunu; ofikyɛ né ye sia ole Kaifa bɔ ɔte ɔsɔfo panyi paa wɔ sɔ afoɛ ne anu ne.

¹⁴ Kaifa ole sona bɔ né watu Yudafoɛ nemɔ foɛ kyɛ, “Ɔte paa kyɛ sona ko kowu kɔma maen ne ɔ.”

¹⁵ Yeɛ Simɔn Petro lili Yesu si, na sɔ ala yeɛ suaniɛ ko bie koso yɔle ɔ. Né ɔsɔfo panyi paa ne ɔse sɔ suaniɛ ne, yiti ɔne Yesu bewurale ɔsɔfo panyi paa n’aluo berɛ.

¹⁶Na Petro de, ogyinane dwaaso anoa ne asi. Yiti suaniɛ bɔ ɔsɔfo panyi paa ne ɔse ye ne, ofitele oodwudwo hyirele afaneɛ bɔ ɔwɛne anoa ne, na ɔfale Petro hɔle nu.

¹⁷Yeɛ afaneɛ bɔ ɔwɛne anoa ne bisale Petro kyɛ, “Wɔ koso, biaa he asuafoɛ nemɔ, aso nna bɛ nu ko ole wɔ?” Na obuale kyɛ, “Daabi oo.”

¹⁸ Né ngoaa nemɔ ne asomvoɛ nemɔ bahua see begyigyi ye nwo, ofikyɛ né ɛyerɛ wɔ nu. Né bɛ́to see ne, na né Petro koso ogyi bɛ nwo berɛ ɔto see ne bie.

¹⁹Yeɛ ɔsɔfo panyi paa ne bisale Yesu dwirɛ fale ye asuafoɛ nemɔ ne ye ngyerɛkyerɛ nwo.

²⁰ Na Yesu buale ye kyɛ, “Me de, madwudwo pefee mahyire wiase; nyɛle me ngyerɛkyerɛ mmerɛ biala wɔ nyianu sua mɔ nu ne asɔneyɛɛ sua ne anu, nekaa bɔ Yudafoɛ amukoraa bɛbayia ɔ; na manga dwirɛ biala wɔ mvealeɛ nu.

²¹Nzu ati yeɛ ebisa me ɔ? Bisa bɛ bɔ betiele me ne, na bɔ nga ngyirele bɛ ne, bɛ yeɛ bɛse bɔ ngane ɔ.”

²² Na Yesu hane sɔ nen, asomvoɛ mɔ bɔ begyigyi berɛ ne, bɛ nu ko bɔle ye nye so, na ɔhane kyɛ, “Sɔ yeɛ ɛ́ma ɔsɔfo panyi paa ne mmuayɛɛ ɔ?”

²³ Na Yesu buale ye kyɛ, “Sɛ mahã edwirɛ tɛɛ a, kã ma ebiala ɔte bie. Nakoso sɛ edwirɛ paa yeɛ mahã de a, nzu ati yeɛ ɛbɔ me ɔ?”

²⁴ Yeɛ Anase maa bɛfale nyamaa bɛkyekyele ye bɛfale ye bɛɛmane ɔsɔfo panyi paa Kaifa.

²⁵Né Simɔn Petro gyi berɛ ɔto see. Yeɛ bebisale ye kyɛ, “Wɔ koso, ye asuafoɛ nemɔ, aso nna bɛ nu ko ole wɔ?” Na ɔsale kyɛ, “Mmmoka so oo!”

²⁶Na ɔsɔfo panyi paa ne ngoaa nemɔ anu ko, bɔ ye busuaniɛ yeɛ Petro pɛle ye so ne, obisale kyɛ, “Aso mannwu wɔ ne ye wɔ turo ne anu dɔ?”

²⁷ Na Petro sale bieku, na berɛ ne ala yeɛ akɔ bɔle ɔ.

²⁸ Yeɛ bɛfale Yesu befili Kaifa berɛ bɛhɔle amrado n’aluo berɛ; na né ɔte ngyerɛmɔ tutuutu. Nakoso bɛ bɔbɔ de, bangɔ amrado n’aluo berɛ bie, kyɛbɔ ɔkɔyɛ bɔ bɛ nwo ngogua fiɛ, ná bahora bali Abɔtra (aleɛ) ne ɔ.

²⁹Yiti Pilato fite wale bɛ berɛ oobisale bɛ kyɛ, “Nzikyɛ kwaadu yeɛ ɛmɔfa bɛbɔ sɔ biaa ye ɔ?”

³⁰Na bebuale ye kyɛ, “Sɛ akoaa he ɔtte mmeraatolɛniɛ a, ahaa yamva ye yammrɛ wɔ.”

³¹Yeɛ Pilato sele bɛ kyɛ, “Ɛmɔ bɔbɔ ɛ́mɔfa ye bɛhɔ, ná ɛmɔgyina ɛmɔ mmeraa so bebua ye ndɛen.” Yeɛ Yudafoɛ nemɔ sele ye kyɛ, “Yɛ de, mmeraa mma yɛ ate kyɛ yɛku sona biala ɔ.”

³² Na ɛhe sili mane Yesu dwirɛ bɔ ɔhã fale ewue horɛ bɔ okowu ne nwo wale nu.

³³ Yeɛ Pilato wurale amrado aluo berɛ bieku, na ɔfrɛle Yesu bisale ye kyɛ, “Wɔ ole Yudafoɛ Hene ne anaa?”

³⁴Na Yesu buale kyɛ, “Wɔ bɔbɔ yeɛ ɛ́bɔ wɔ ti anu ɛkã ɔ, anaakyɛ ebiemɔ yeɛ bahã me nwo dwirɛ bahyire wɔ ɔ?”

³⁵Na Pilato buale ye kyɛ, “Nde Yudaniɛ anaa? Wɔ bɔbɔ wɔ maen ne asɔfo mbanyi yeɛ bɛfale wɔ bɛbrɛle me ɔ; nzikyɛ yeɛ ayɔ ɔ?”

³⁶ Yesu buale kyɛ, “M’ahennie ne, offi wiase wa. Sɛ m’ahennie ne ofi wiase wa a, ahaa m’asomvoɛ mɔ bɛkɔho, bɔ ɔnate so bɛngɔfa me bengowura Yudafoɛ mɔ sa ɔ; nakoso m’ahennie ne offi wiase wa.”

³⁷Yeɛ Pilato bisale ye kyɛ, “Yiti ɛte ɛhene ɛne?” Na Yesu buale kyɛ, “Wɔ yeɛ ɛkã kyɛ nde ɛhene ɔ. Me de, ɛhe ati yeɛ bɛwole me ɔ, na ɛhe ati yeɛ mawa wiase ɔ, kyɛ mebaali nahorɛ ne nwo adanzeɛ. Na ebiala bɔ ofi nahorɛ ne anu ne, otie me dwirɛ.”

³⁸ Na Pilato bisale ye kyɛ, “Nahorɛ, ye ole nzu?” Na ɔhane sɔ dwirɛ nen, afei ofite hɔle Yudafoɛ nemɔ berɛ bieku, na osele bɛ kyɛ, “Me de, mennwu foɛ biala bɔ odi ɔ.

³⁹Nakoso yeɛ ɛmɔle amanneɛ kyɛ meyakyi sona ko mema ɛmɔ Abɔtra aluolue mmerɛ nu. Yiti ɛmɔkuro kyɛ meyakyi Yudafoɛ Hene ne mema ɛmɔ anaa?”

⁴⁰ Na bɛteateane nu bieku kyɛ, “Nna akoaa he ɔ, na mmom Baraba!” (Né Baraba te awerɔm awueniɛ.)