Read Sehwi Yohane 19 Bible Online

Yohane 19 - Sehwi bible

Yohane 19

¹ Afei Pilato fale Yesu ofini ye mbire.

²Na asraafoɛ nemɔ nwone mmowue abotire, na bɛfa bepurole ye ti, na bɛfale ataadeɛ kɔkorɛ bie beguale ye so.

³ Bɛwale ye nwo berɛ, na besele kyɛ, “Yudafoɛ Hene, wɔ ngoa so oo!” Na bɛbobɔle ye nye so.

⁴ Yeɛ Pilato fite wale bieku, na osele bɛ kyɛ, “Ɛ́mɔtie, méfa ye mebrɛ ɛmɔ, ma ɛmɔnwu ye kyɛ mennwu kyɛ odi fɔ biala ɔ.”

⁵Yiti Yesu fite wale; né ɔbɔ mmowue abotire ne, na owura ataadeɛ kɔkorɛ ne. Yeɛ Pilato sele bɛ kyɛ, “Ɛ́mɔnea, biaa ne ɛhe!”

⁶Na asɔfo mbanyi nemɔ ne awɛmvoɛ nemɔ benwuni ye ne, bɛteateane nu kyɛ, “Bɔ ye mmeamudua nu! Bɔ ye mmeamudua nu!” Na Pilato sele bɛ kyɛ, “Ɛmɔ bɔbɔ bɛfa ye bɛɛbɔ ye mmeamudua nu! Ofikyɛ me de, mennwu kyɛ odi fɔ biala ɔ.”

⁷ Yeɛ Yudafoɛ nemɔ buale ye kyɛ, “Yɛ de, yɛle mmeraa, na yɛ mmeraa ne kyire kyɛ ɔsɛ kyɛ owu ɔ, ofikyɛ ɔyɛle ye nwo Nyameɛ Awa ne.”

⁸Na Pilato tele edwirɛ he nen, ɛserɛ hane ye trale daa ne.

⁹ Osa wurale amrado aluo berɛ, na obisale Yesu kyɛ, “Efi nisua?” Nakoso Yesu amma ye mmuayɛɛ.

¹⁰Yiti Pilato sele ye kyɛ, “Engodwudwo me nwo? Ɛnze kyɛ tumi wura me sa kyɛ mekora meyakyi wɔ, yeɛ tumi wura me sa kyɛ mekora mebɔ wɔ mmeamudua nu ɔ?”

¹¹ Na Yesu buale ye kyɛ, “Sɛ bamva bamvi nyameɛso bamma wɔ a, ahaa elle tumi biala wɔ me so; yiti bɔ ɔyele me mane wɔ ne, ye yeɛ ye bɔne te piri ɔ.”

¹²Na ofi sɔ mmerɛ ne, Pilato penane atee bɔ ɔkɔfa so kɔyakyi ye ɔ, nakoso Yudafoɛ nemɔ teateane nu kyɛ, “Sɛ ɛyakyi sɔ akoaa he a, ye de nna wɔ damvo ole Kaesare; na ebiala bɔ ɔyɛ ye nwo ɛhene ne, ɔko tia Kaesare.”

¹³ Na Pilato tele sɔ dwirɛ nen, ɔfale Yesu fite wale, na ɔtenane ndɛenbualɛ bia nu, wɔ nekaa bie bɔ bɛfrɛ berɛ Nyɔboɛ Pato nu, bɔ Hebri dwudwolɛ nu bɛfrɛ ye Gabata.

¹⁴ Né ɔte Abɔtra nwo anwoboaboa kyẽa; kɔyɛ eyiagyina. Na Pilato sele Yudafoɛ nemɔ kyɛ, “Ɛ́mɔnea, ɛmɔ Hene ne ɛhe!”

¹⁵Na bɛteateane nu kyɛ, “Fa ye kɔ! Fa ye kɔ! Bɔ ye mmeamudua nu!” Na Pilato bisale bɛ kyɛ, “Mmɔ ɛmɔ Hene ne mmeamudua nu anaa?” Na asɔfo mbanyi nemɔ buale kyɛ, “Yɛ de, yɛlle hene biala kyɛ Kaesare.”

¹⁶ Na ɔyele ye mane bɛ kyɛ bɛɛbɔ ye mmeamudua nu.

¹⁷ Yiti bɛfale Yesu bɛhɔle. Na ɔsoale ye mmeamudua ne fili berɛ oodwuli nekaa bie bɔ bɛfrɛ berɛ “Tire Kokuroka so,” bɔ Hebri nu bɛfrɛ ye Golgota.

¹⁸ Berɛ yeɛ bɛbɔle ye mmeamudua nu ɔ, bɔ mmenia nyɔ bɛboka ye so ɔ, wɔ ye bue nyɔ ne, bɔ Yesu wɔ b’afia ɔ.

¹⁹ Na Pilato hyerɛle edwirɛ bie bɔle mmeamudua n’anwuro kyɛ, “Yesu, Nasarɛteniɛ, Yudafoɛ Hene Ne.”

²⁰ Yudafoɛ pee bɛkengale sɔ ahyerɛlɛ he, ɔnate kyɛ nekaa bɔ bɛbɔle Yesu mmeamudua nu ne, opingye kuro ne; na bɛhyerɛle edwirɛ ne wɔ Hebri, Roman ne Hela dwudwolɛ nu.

²¹Na Yudafoɛ asɔfo mbanyi nemɔ sele Pilato kyɛ, “Nnɛkyerɛ ye kyɛ, ‘Yudafoɛ Hene Ne,’ na mmom kyerɛ ye kyɛ, ‘Biaa he hane kyɛ: Me Ole Yudafoɛ Hene ne.’ ”

²²Na Pilato buale kyɛ, “Bɔ mahyerɛ ne ala yeɛ mahyerɛ ɔ.”

²³Na asraafoɛ nemɔ bɔle Yesu mmeamudua nu beyiele nen, bɛfale ye tena bɛhyɛle nu nna maa sraaniɛ biala nyane ko; na bɛfale ye ataadeɛ bɔ owura ye bo ne koso. Nakoso ye ataadeɛ bɔ owura ye bo ne de, né olle mbaleɛ so, ofikyɛ bɛnwone befili anwuro beedwuli ase.

²⁴ Yeɛ besisele bɛ nwo kyɛ, “Nnɛmɔma yɛsunzua nu, na mmom ɛ́mɔma yɛgua so serewa yɛnwu bɔ ɔkɔyɛ ye deɛ ɔ.” Na ɛhe mane Ahyerɛlɛ ne wale nu kyɛ, “Bɛhyɛle me ndena bɛfale, yeɛ beguale serewa wɔ m’ataadeɛ so.”

²⁵ Yiti bɔ asraafoɛ nemɔ yɔle hɔ ɛne. Na mmenia hemɔ yeɛ né begyi bepingye Yesu mmeamudua ne nwo ɔ: ye maame, ye maame aliɛma brasua, Klopa aye Maria, yeɛ Maria Magdalene.

²⁶ Na Yesu nwuni ye maame ne suaniɛ bɔ okuro ye dwirɛ paa ne kyɛ begyigyi berɛ nen, osele ye maame kyɛ, “Mmobraa, nea, ɛwa ɛhe!”

²⁷Yeɛ osele suaniɛ ne koso kyɛ, “Nea, wɔ maame ɛhe!” Na ofi sɔ mmerɛ ne, suaniɛ ne fale ye hɔle ye bɔbɔ ye awuro.

²⁸ Na ɛhe asi ne, bɔ Yesu nwuni kyɛ wanya wayie nikyee biala nen, (kyɛbɔ ɔkɔyɛ bɔ Ahyerɛlɛ ne kɔwa nu ne ati), ɔhane kyɛ, “Nzuhɔen ku me.”

²⁹ Né nzaa kekarekekare bie wɔ kulie nu tɛkyɛ ogyi berɛ. Na bɛfale eminaen bɛbɔle nzaa kekarekekare ne anu, bɛfa betuale bakaa bie noa, na bɛfa bɛhane ye noa.

³⁰Na Yesu lele nzaa kekarekekare ne nen, ɔhane kyɛ, “Mayie.” Na osili ye ti ase, na ɔhale nu.

³¹ Né sɔ kyẽa ne te Anwoboaboa kyẽa, na kyɛbɔ ɔkɔyɛ bɔ efuin nemɔ bɛngɔha mmeamudua nemɔ so wɔ afofikyẽa ne, (ofikyɛ né sɔ afofikyẽa ne ɔte kyẽa piri,) yiti Yudafoɛ bɛɛsrɛle Pilato kyɛ ɔma bebubu bɛ gya nu, ná bɛye bɛ bɛbra ase.

³²Yiti asraafoɛ nemɔ wale beebubuli bɔ oli moa ne gya nu, ɔne ko bɔ ɔboka so bɔ bɛbɔle ye ne Yesu mmeamudua nu ne koso ye deɛ.

³³Nakoso bedwuli Yesu so, ná benwuni kyɛ wawu dada nen, bammubu ye gya nu.

³⁴ Nakoso asraafoɛ nemɔ anu ko fale pealɛɛ wɔle ye mvenu, na berɛ ne ala, mogya ne nzue fili nu wale.

³⁵ Na sona bɔ onwuni ɛhe nen, wali ye nwo adanzeɛ; ye adanzeɛ ne te nahorɛ, na ye de, ɔse kyɛ ɔkã nahorɛ, amaa ɔnate so ɛmɔ koso bale bali.

³⁶ Na ɛhemɔ sili mane Ahyerɛlɛ ne wale nu kyɛ, “Ye bowue ko po, bengobu nu.”

³⁷ Afei koso, Ahyerɛlɛ foforɛ kã kyɛ, “Bekotu bɛ nye bekogua bɔ bɛwɔle ye pealɛɛ ne aso.”

³⁸Na nziɛ ye, Yosef bɔ ofi Arimatea, bɔ ɔte Yesu suaniɛ, bɔ Yudafoɛ nwo suronyi ti ɔfeafea ye nwo ɔyɔ sɔ ɔ, ɔɔsrɛle Pilato kyɛ ɔma ye ate ma ɔye Yesu fuin ne, na Pilato mane ye ate. Yiti ɔwale ɔɔyele ye fuin ne.

³⁹Na Nikodemo bɔ mmerɛ bie ɔwale Yesu berɛ kɔngɔen ne, ɔwale, na ɔfale krobo ne ayirefona mvrafra kɔyɛ kilo aburasa wale.

⁴⁰ Yeɛ bɛyele Yesu fuin ne, bɛfale ayire ne bɛyɛle ye nwo, na bɛfale nwera ne bɛkyekyele ye nwo, kyɛbɔ Yudafoɛ fuin sielɛ te ɔ.

⁴¹Na nekaa bɔ bɛbɔle ye mmeamudua nu ne, né turo bie wɔ berɛ. Né asieleɛ foforɛ bie bɔ bennya bɛffale sona bɛttole nu le ɔ ɔwɔ turo ne anu.

⁴²Né ɔte Yudafoɛ anwoboaboa kyẽa, yiti bɛfale Yesu bɛɛtole nu, ofikyɛ né asieleɛ ne pingye berɛ.