Read Sehwi Yohane 21 Bible Online

Yohane 21 - Sehwi bible

Yohane 21

¹Ɛhe asi ye, Yesu yele ye nwo ali bieku hyirele asuafoɛ nemɔ wɔ Tiberia mboanoa, na kyɛbɔ ɔyele ye nwo ali hyirele bɛ ne ɛhe:

² Né Simɔn Petro, Tɔmase bɔ bɛfrɛ ye Ata ne, Nataneɛl bɔ ofi Kana bɔ ɔwɔ Galilea, Sebedeo mma nemɔ, yeɛ ye asuafoɛ nemɔ anu nyɔ bɛwɔ neka horɛ.

³ Na Simɔn Petro sele bɛ kyɛ, “Mékɔ po.” Na besele ye kyɛ, “Yɛ koso yɛne wɔ kɔhɔ.” Bɛhɔle bɛɛfole ɛlɛen nu, nakoso sɔ kɔngɔen ne, bangye hwee.

⁴ Na aleɛ baahye nen, Yesu oogyinane mboanoa berɛ, nakoso né asuafoɛ nemɔ bɛnze kyɛ Yesu ɔ.

⁵Na Yesu bisale bɛ kyɛ, “Biamɔ, ɛmɔanya naen anaa?” Na bebuale ye kyɛ, “Daabi oo!”

⁶ Na osele bɛ kyɛ, “Ɛ́mɔfa asawu ne begua ɛlɛen ne famaa so dɔ, na ɛmɔkɔhye bie.” Yiti beguale asawu ne, na naen pembepembe ne ati, né bɛngora bɛndwetwe asawu ne.

⁷ Yeɛ suaniɛ bɔ Yesu kuro ye dwirɛ paa ne, osele Petro kyɛ, “Awurade ɔ!” Na Simɔn Petro tele kyɛ Awurade ahɔ nen, ɔfale ye ataadeɛ aguasoɛ ne wurale (ɔnate kyɛ né waye ye nwo), na ohuruli ye nwo tole ɛpo ne anu.

⁸Nakoso asuafoɛ ngaa nemɔ de, bɛfole ɛlɛen ba bie bɛwale, ofikyɛ né bɛ ne etii so anwa, kɔyɛ abasanu ɛyaa ko, bɔ né bɛtwetwe asawu ne bɔ naen ayi ye tɛkyɛ ɔ.

⁹Na bedwuli etii so berɛ nen, benwuni kyɛ bahua see bɔ naen gua so ɔ, ɔne paanoo.

¹⁰Na Yesu sele bɛ kyɛ, “Naen bɔ ɛmɔhyele ye kekesaala ye ne, ɛ́mɔfa bie bɛbra!”

¹¹Yiti Simɔn Petro hɔle ɔɔhwene asawu ne wale etii so, bɔ né naen mbiri mbiri ɛyaa ko ne aburannu ne nza bayi ye tɛkyɛ ɔ. Né bɛsone sɔ de, nakoso asawu ne andete.

¹²Yeɛ Yesu sele bɛ kyɛ, “Ɛmɔbra beedidi.” Nakoso asuafoɛ nemɔ nu biala wangora wammisa ye kyɛ, “Nwa ole wɔ?” Né bɛse kyɛ Awurade ɔ.

¹³Na Yesu ɔɔfale paanoo ne, na ɔfa mane bɛ, ɔne naen ne koso sɔ ala.

¹⁴ Ɛhe yeɛ ɔtɔ so pɛen nza bɔ Yesu tingyele fili awufoɛ nu ne, ɔyele ye nwo ali hyirele ye asuafoɛ nemɔ ɔ.

¹⁵ Na bedidili beyiele nen, Yesu bisale Simɔn Petro kyɛ, “Simɔn, Yohane awa, aso ekuro me dwirɛ tra ɛhemɔ?” Obuale ye kyɛ, “Yoo, Awurade, ɛse kyɛ mekuro wɔ dwirɛ.” Yesu sele ye kyɛ, “Nea me mmoaen mmaa nemɔ so!”

¹⁶ Yesu bisale ye ye pɛen nyɔ so kyɛ, “Simɔn, Yohane awa, aso ekuro me dwirɛ?” Obuale ye kyɛ, “Yoo, Awurade, ɛse kyɛ mekuro wɔ dwirɛ.” Yesu sele ye kyɛ, “Nea me mmoaen nemɔ so.”

¹⁷Yesu bisale ye ye pɛen nza so kyɛ, “Simɔn, Yohane awa, aso ekuro me dwirɛ?” Na Petro wora bɔle kyɛ wabisa ye pɛen nza kyɛ, “Aso ekuro me dwirɛ?” Na obuale ye kyɛ, “Awurade, ɛse nikyee biala; ɛse kyɛ mekuro wɔ dwirɛ.” Yeɛ Yesu sele ye kyɛ, “Nea me mmoaen nemɔ so.

¹⁸Nahorɛ nu paa, mekã mekyire wɔ kyɛ, mmerɛ bɔ né ɛte aberandeɛ ne, ɛbɔle abɔsoɛ, na ɛhɔle nekaa biala bɔ ekuro ɔ. Nakoso sɛ ɛyɛ aworowaa de a, ɛkɔtengyɛ wɔ sa, ná ebie abɔ wɔ abɔsoɛ, ná wafa wɔ wahɔ nekaa bɔ enguro ɔ.”

¹⁹ (Ɔhane ɛhe fa hyirele ewue horɛ bɔ ɔkɔfa kɔhyɛ Nyameɛ animnyam ɔ.) Na ɔhane sɔ dwirɛ ne nen, afei osele ye kyɛ, “Di me si.”

²⁰ Yeɛ Petro pɛle ye nye, na onwuni suaniɛ bɔ Yesu kuro ye dwirɛ paa ne kyɛ oli bɛ si. Sɔ suaniɛ ne yeɛ ɔtena kisale ye wɔ adidie ne abo, ná obisale kyɛ, “Awurade, nwa yeɛ ɔbaaye wɔ ma ne?”

²¹Na Petro nwuni ye nen, obisale Yesu kyɛ, “Awurade, na ɛhe koso de?”

²² Yeɛ Yesu sele ye kyɛ, “Sɛ mekuro kyɛ ɔtena berɛ kodwu kyɛ ngɔwa a, ɔfa wɔ nwo nzu? Wɔ de, di me si!”

²³Na edwirɛ he trɛle aliɛmaa nemɔ anu kyɛ sɔ suaniɛ ne ongowu; nakoso Yesu anga angyire ye kyɛ ongowu, na mmom ɔhane kyɛ, “Sɛ mekuro kyɛ ɔtena berɛ kodwu kyɛ ngɔwa a, ɔfa wɔ nwo nzu?”

²⁴ Ɛhe ole suaniɛ bɔ odi ɛhemɔ nwo adanzeɛ ɔ, na ye yeɛ wahyerɛ ɛhemɔ ɔ, na yɛse kyɛ ye adanzeɛ ne te nahorɛ.

²⁵ Na nningyein pee koso wɔ berɛ bɔ Yesu yɔle ɔ; bɔ sɛ bɛkyerɛ ye mukoraa ngoko ngoko a, menea a nwomaa mɔ bɔ bɛkɔhyerɛ ye nu ne, bɛngɔhɔ wiase. (Amen.)