Read Sehwi Yohane 5 Bible Online

Yohane 5 - Sehwi bible

Yohane 5

¹Ɛhe asi ne, Yudafoɛ aluolue dwuli, na Yesu hɔle Yerusalem.

² Né ɛkwaa bie wɔ Yerusalem Mmoaen Pambim ne nwo, bɔ Hebri dwudwolɛ nu bɛfrɛ ye Betesaeda ɔ; na né apata nnu bɔ atee lela bɛ bo ɔ bɛwɔ ɛkwaa ne anwo berɛ.

³Né ayarefoɛ pee, anyesiniwaafoɛ, mbakye ne bɛ bɔ babubu bagua berɛ ɔ bɛlela apata nemɔ abo [bɛnwondɛ nzue ne maa ɔwoso.

⁴Né odwu mmerɛ bie a, abɔfo dwu ba ɛkwaa ne anu ɔbaponda nzue ne; na sɛ nzue ne ponda a, ebiala bɔ okoli moa kɔɔtɔ nu ne, anwonyerɛ biala bɔ ɔha ye ne, ye nwo sa.][3]

⁵Né biaa bie wɔ berɛ bɔ ye nwo ayɛ ye yea afoɛ aburasa ne mmɔtwɛ ɔ.

⁶Na Yesu nwuni ye kyɛ ɔla berɛ, na onwuni kyɛ wala berɛ wahyɛ nen, obisale ye kyɛ, “Ɛpena kyɛ wɔ nwo sa anaa?”

⁷Na yarefoɛ ne buale kyɛ, “Me mene, nnne ebiala bɔ sɛ nzue ne ponda a, ɔfa me kɔto ɛkwaa ne anu ɔ; na sɛ mekwaatɔ nu a, né ebie ali me nyunu moa waatɔ nu.”

⁸ Na Yesu sele ye kyɛ, “Dwɔso, fa wɔ bɛen ne, ná nate!”

⁹ Na berɛ ne ala, biaa ne tele apɔ; ɔfale ye bɛen ne, na ɔnatele. Né sɔ kyẽa ne te afofikyẽa.

¹⁰ Yiti Yudafoɛ nemɔ sele biaa bɔ ye nwo asa ne kyɛ, “Ɛnɛ te afofikyẽa, yiti mmeraa mma ate kyɛ ɛkɔsoa wɔ bɛen ɔ.”

¹¹Na obuale bɛ kyɛ, “Biaa bɔ ɔsale me anwonyerɛ ne, ye yeɛ osele me kyɛ, ‘Fa wɔ bɛen ne, ná nate’ ɔ.”

¹²Yeɛ bebisale ye kyɛ, “Biaa beni yeɛ osele wɔ kyɛ, ‘Fa wɔ bɛen ne, ná nate’ ɔ?”

¹³Na biaa bɔ ye nwo asa ne, né ɔnze sona horɛ, ofikyɛ né Yesu ahwe ye nwo wafi berɛ, yeɛ afei né mmenia pee wɔ berɛ.

¹⁴ Nziɛ ye, Yesu nwuni ye wɔ asɔneyɛɛ sua ne anu, na osele ye kyɛ “Nea, ate apɔ, nnɛyɔ bɔne ko, ná nikyee tɛɛ bɔ ɔtra ɛhe ɔ wanyɛ wɔ.”

¹⁵Biaa ne sili nu hɔle, na ɔɔbɔle Yudafoɛ nemɔ amaneɛ kyɛ Yesu yeɛ ɔsale ye anwonyerɛ ne ɔ.

¹⁶Na ɔnate sɔ ati, Yudafoɛ nemɔ tanene Yesu nye, ofikyɛ ɔyɔle sɔ afofikyẽa.

¹⁷ Na Yesu buale bɛ kyɛ, “Me Baba gu so ɔyɔ adwuma maa waadwu bekye, na me koso méyɔ adwuma.”

¹⁸ Na ɔnate sɔ ati, Yudafoɛ mɔ mane bɛ nye borole kyɛ bekohu ye ɔ, kyɛ, nna afofikyẽa ngome yeɛ wabu so ɔ; na mmom ɔnwa Nyameɛ te ye bɔbɔ ye Baba, bɔ ɔfa kyire kyɛ ɔne Nyameɛ bɛte pɛ ɔ.

¹⁹ Na Yesu sele bɛ kyɛ, “Nahorɛ nu paa, mekã mekyire ɛmɔ kyɛ, Baa ne bɔbɔ ngora nyɔ hwee, sana bɔ onwu Baba ne kyɛ ɔyɔ ɔ; ofikyɛ nikyee biala bɔ ɔyɔ ne, ebie ala yeɛ Baa ne koso ɔyɔ ɔ.

²⁰Ofikyɛ Baba ne kuro Baa ne dwirɛ, na okyire ye nikyee biala bɔ ye bɔbɔ ɔyɔ ɔ; na okohyire ye nnwumaa mbiri mbiri bɔ bɛtra ɛhemɔ ɔ, ná wayɛ ɛmɔ nwanwa.

²¹ Na kyɛbɔ Baba ne tingye awufoɛ, ná ɔma bɛ ngoa nen, sɔ ala yeɛ Baa ne koso ɔma bɛ bɔ okuro ɔ ngoa ɔ.

²² Baba ne mmua ebiala ndɛen, na mmom wafa ndɛenbualɛ amukoraa wawura Baa ne sa,

²³ kyɛ mmenia amukoraa beli Baa ne ni, kyɛbɔ bedi Baba ne ni nen. Na ebiala bɔ onni Baa ne ni nen, onni Baba ne bɔ ɔsomane ye ne koso ni.

²⁴ “Nahorɛ nu paa, mekã mekyire ɛmɔ kyɛ, ebiala bɔ ɔte me dwirɛ, ná ode bɔ ɔsomane me ne di nen, ole daa ngoa; bengobua ye foɛ, na mmom wapɛ nu wafi ewue nu wahɔ ngoa nu.

²⁵ Nahorɛ nu paa, mekã mekyire ɛmɔ kyɛ, mmerɛ ne ɔ́ba, na wawa dada, bɔ awufoɛ bɛkɔte Nyameɛ Awa ne komvi, na bɛ bɔ bɛte ne, bekonya ngoa.

²⁶ Na kyɛbɔ Baba ne ole ngoa wɔ ye bɔbɔ ye nu nen, sɔ ala yeɛ wafa wama Baa ne kyɛ ye koso onya ngoa wɔ ye bɔbɔ ye nu ɔ;

²⁷na wama ye tumi kyɛ obua ndɛen, ɔnate kyɛ ye ole Sona Awa ne.

²⁸ Nnɛmɔma ɛhe yɛ ɛmɔ nwanwa, ofikyɛ mmerɛ ne ɔ́ba, bɔ bɛ bɔ bɛwɔ asieleɛ nu amukoraa bɛkɔte ye komvi ɔ,

²⁹ na bekofite bɛkɔwa, na bɛ bɔ bayɔ bɔ ɔte paa ne, bɛkɔhɔ ngoa ewutingyelɛ nu; nakoso bɛ bɔ bayɔ bɔne ne de, bɛkɔhɔ ndɛenbualɛ ewutingyelɛ nu.

³⁰“Me de, mengora memva me tumi menyɔ hwee; kyɛbɔ mete ne, yeɛ mebua ndɛen ɔ, na me ndɛenbualɛ te turoloo. Ɔnate kyɛ nna me bɔbɔ m’apɛdeɛ yeɛ mepena ɔ, na mmom bɔ ɔsomane me n’apɛdeɛ.

³¹ Sɛ medi me bɔbɔ me nwo adanzeɛ a, m’adanzeɛ ne ɔtte nahorɛ.

³²Ebie wɔ berɛ bɔ odi me nwo adanzeɛ ɔ, na mese kyɛ adanzeɛ bɔ odi fa me nwo ne ɔte nahorɛ.

³³Ɛmɔsomane mmenia maa bɛhɔle Yohane berɛ, na olili nahorɛ ne nwo adanzeɛ.

³⁴Na me de, nna sona berɛ yeɛ mede adanzeɛ mefi ɔ, na mmom mekã sɔ dwirɛ nemɔ, kyɛbɔ ɔkɔyɛ bɔ ɛmɔkonya ngoa ɔ.

³⁵ Ɔte kanea bɔ ógye ná ɔta ɔ, na ɛmɔhurole kyɛ ɛmɔ nye kɔhã ye kanea ne anu kãa.

³⁶ Na me de, m’adanzeɛ ne ɔtra Yohane deɛ ne; ofikyɛ nnwumaa bɔ Baba ne wafa wama me kyɛ nyɔ nyie nen, sɔ nnwumaa hemɔ ala bɔ meyɔ ne, bedi me nwo adanzeɛ kyɛ Baba ne yeɛ wasoma me ɔ.

³⁷ Na Baba ne bɔ ɔsomane me ne, ye bɔbɔ wali me nwo adanzeɛ. Ɛmɔttele ye komvi le, yeɛ ɛmɔnnwuni ye sue le;

³⁸ yeɛ ɛmɔmma ye dwirɛ ne ndena ɛmɔ nu, ofikyɛ bɔ ɔsomane ye ne, ɛmɔnne ye benni.

³⁹ Ɛmɔpɛnzɛpɛnzɛ Ahyerɛlɛ ne anu, ofikyɛ ɛmɔdwene kyɛ ɛmɔle daa ngoa wɔ nu; na ye ala yeɛ odi me nwo adanzeɛ ɔ.

⁴⁰Nakoso ɛmɔnguro kyɛ ɛmɔkɔwa me berɛ, ná ɛmɔanya ngoa.

⁴¹“Membena animnyam memvi mmenia berɛ,

⁴²na mese kyɛ Nyameɛ nwo dɔ ɔnne ɛmɔ nu.

⁴³Me Baba dumaa nu yeɛ mmale ɔ, nakoso ɛmɔnne me bɛndo nu; na sɛ ebie ba ye bɔbɔ ye dumaa nu a, ye de ɛmɔkole ye bɛkɔto nu.

⁴⁴ Ɔkɔyɛ sɛ né ɛmɔale bali, ɛmɔ bɔ ɛmɔhyehyɛ ɛmɔ nwo ɛmɔ nwo animnyam, bɔ ɛmɔmbena animnyam bɔ ofi Nyameɛ komapɛ ne berɛ ɔ?

⁴⁵ Nnɛma ɛmɔdwene kyɛ me yeɛ ngɔbɔ ɛmɔ kwaadu wɔ me Baba ne nyunu ɔ; bɔ ɔbɔ ɛmɔ kwaadu ne wɔ berɛ, na ye ole Mose bɔ ɛmɔafa ɛmɔ nye bato ye so ne.

⁴⁶ Na sɛ ɛmɔlele Mose belili a, ahaa ɛmɔkole me koso bekoli; ofikyɛ ɔhyerɛle me nwo dwirɛ.

⁴⁷ Na sɛ ɛmɔnne bɔ ɔhyerɛle ne benni a, ɔkɔyɛ sɛɛ né ɛmɔale me noa dwirɛ bali?”