Read Sehwi Yohane 7 Bible Online

Yohane 7 - Sehwi bible

Yohane 7

¹ Na ɛhemɔ asi ne, Yesu hyinini Galilea; wanguro kyɛ ɔkɔhɔ Yudea, ofikyɛ né Yudafoɛ nemɔ bɛpena ye beku ye.

³ Yiti oliɛma nemɔ sele ye kyɛ, “Fi wa kɔ Yudea, ná w’asuafoɛ nemɔ benwu nnwumaa bɔ ɛ́yɔ ne.

⁴Ofikyɛ ebiala bɔ ɔpena kyɛ mmenia benwu ye nen, ɔnyɔ ye nningyein mvea. Sɛ ɛyɔ ɛhemɔ de a, ye de da wɔ nwo ali kyire wiase.”

⁵Na oliɛma nemɔ po banne ye banni.

⁶ Yeɛ Yesu sele bɛ kyɛ, “Me de, me mmerɛ ne onnya oddwuli; nakoso ɛmɔ de, ɛmɔ mmerɛ ne ɔwɔ berɛ daa.

⁷ Wiase ngora mbɔ ɛmɔ, nakoso me yeɛ ɔpɔ me ɔ, ofikyɛ medi adanzeɛ kyɛ ye yɔleɛ te bɔne.

⁸Ɛmɔ de, ɛmɔhɔ aluolue ne abo. Na me de, mengɔhɔ aluolue ne abo, ɔnate kyɛ me mmerɛ ne onnya oddwuli.”

⁹Na ɔhã hyirele bɛ sɔ nen, ɔhale Galilea berɛ.

¹⁰Na oliɛma nemɔ hɔle aluolue ne abo nen, ye si ye, ye koso ɔhɔle ye bo bie; wanye ye nwo ali, na mmom ɔfale ye nwo feale.

¹¹Né Yudafoɛ nemɔ bɛpenane ye wɔ aluolue ne abo, na bebisale kyɛ, “Ɔwɔ nisua?”

¹² Na mmenia nemɔ yɛle nwuhunwuhu pee bɛfale ye nwo. Ebiemɔ hane kyɛ, “Ɔte sona paa.” Yeɛ ebiemɔ koso nwa, “Daabi, ɔlakalaka mmenia.”

¹³ Nakoso né besuro Yudafoɛ nemɔ, yiti ebiala anye ye nyunu wanga ye nwo dwirɛ.

¹⁴Na bedwuli aluoluelilɛ n’afia nen, Yesu hɔle asɔneyɛɛ sua ne anu ɔɔyɛle ngyerɛkyerɛ.

¹⁵ Na ɔyɛle Yudafoɛ nemɔ nwanwa maa bɛhane kyɛ, “Ɔyɛle sɛɛ bɔ biaa he nyane nimdeɛ sɔa ɔ, wɔ aberɛ bɔ ossuane nwomaa biala ɔ?”

¹⁶Na Yesu buale bɛ kyɛ, “Me ngyerɛkyerɛ ne ɔtte me deɛ, na mmom ɔte bɔ ɔsomane me ne deɛ.

¹⁷Sɛ ebie kuro kyɛ ɔyɔ ye apɛdeɛ a, okonwu ye kyɛ, ngyerɛkyerɛ ne ofi Nyameɛ berɛ, anaakyɛ mefa me bɔbɔ me tumi yeɛ medwudwo hɔ a.

¹⁸Ebiala bɔ ɔbɔ ye ti anu dwudwo ne, ɔpena ye bɔbɔ ye animnyam; nakoso bɔ ɔpena animnyam ma bɔ ɔsomane ye nen, ye ole nahorɛniɛ ne, na ngondombo biala nne ye nu.

¹⁹ Aso Mose amva mmeraa ne wamma ɛmɔ? Nakoso ɛmɔ nu biala nni mmeraa ne aso. Nzu ati yeɛ ɛmɔpena me beku me ɔ?”

²⁰ Na ɛlɔen ne buale kyɛ “Ele sunzummɔne! Nwa yeɛ ɔpena wɔ ku wɔ ɔ?”

²¹Na Yesu buale bɛ kyɛ, “Nyɔle anwanwadeɛ ko, na ɔyɛ ɛmɔ amukoraa nwanwa.

²² Mose hyɛle bienzuapɛlɛ nwo mmeraa mane ɛmɔ, (wanhyɛ ye bo wamvi Mose aberɛ so, na mmom ɛmɔ nana mɔ aberɛ so), na afofikyẽa po, ɛmɔpɛ sona bienzua.

²³Na sɛ ɛmɔpɛ ebie bienzua afofikyẽa, kyɛbɔ ɔkɔyɛ bɔ ɛmɔngobu Mose mmeraa so a, né nzu ati yeɛ ɛmɔafɛ me so yaa kyɛ mama sona mumua wate apɔ wɔ afofikyẽa ɔ?

²⁴ Nnɛma ɛmɔnea sona nyunu bebua ye ndɛen, na mmom ɛ́mɔbua ndɛen bɔ ɔtengyɛ ɔ!”

²⁵ Yeɛ Yerusalemfoɛ nemɔ bie hane kyɛ, “Aso nna biaa he yeɛ bɛpena ye beku ye ne?

²⁶Nea, ɔwɔ wa odwudwo petee nu, nakoso benze ye huu! Mbanyi nemɔ, aso bɛse amba kyɛ ɛhe ole Kristo ne anaa?

²⁷ Nakoso biaa he de, yɛse nekaa bɔ ofi ɔ; na Kristo ne de, sɛ ɔba a, ebiala ngonwu nekaa bɔ ofi ɔ.”

²⁸ Na Yesu gu so bɔ ɔyɛ ngyerɛkyerɛ wɔ asɔneyɛɛ sua ne anu nen, ɔteane nu hane kyɛ, “Ɛmɔse me, yeɛ ɛmɔse nekaa bɔ mvi ɔ. Nakoso nna me bɔbɔ me tumi so yeɛ mva mmale ɔ; na bɔ ɔsomane me ne te nahorɛniɛ, na ɛmɔnze ye.

²⁹ Me de, mese ye, ofikyɛ mvi ye berɛ, na ye yeɛ ɔsomane me ɔ.”

³⁰ Na ahaa bɛpena ye bɛkye ye; nakoso ebiala amva ye sa wanga ye, ofikyɛ né ye mmerɛ ne onnya oddwuli.

³¹ Nakoso mmenia nemɔ anu pee belele ye belili, na bɛhane kyɛ, “Kristo ne, sɛ ɔba a, aso ɔkɔyɔ nzɛngyerɛnneɛ pee kɔtra bɔ biaa he wayɔ ye?”

³²Farasiifoɛ mɔ bɛtele kyɛ ɛlɔen ne bɛ́yɛ nwuhunwuhu bɛkekã sɔ dwirɛ ne bɛfa ye nwo. Yiti Farasiifoɛ ne asɔfo mbanyi mɔ betuli asomvoɛ mɔ kyɛ bɛhɔ bɛɛhye ye.

³³Yeɛ Yesu sele bɛ kyɛ, “Me ne ɛmɔ kɔtena mmerɛ kãa bie, na afei ngɔhɔ bɔ ɔsomane me ne berɛ.

³⁴Ɛmɔkɔpena me, na ɛmɔngonwu me; na nekaa bɔ nwɔ ne, ɛmɔngɔhora ngɔwa berɛ bie.”

³⁵ Yeɛ Yudafoɛ nemɔ sisele bɛ nwo kyɛ, “Nisua yeɛ biaa he ɔbaahɔ bɔ yɛngonwu ye ɔ? Ɔbaahɔ bɛ bɔ babɔ aya bahɔ Helafoɛ mɔ nu ne berɛ ɔkɔyɛ ngyerɛkyerɛ kyire Helafoɛ anaa?

³⁶Sɛɛ yeɛ ɔpena kyɛ okyire ɔ? Ɔnwa, ‘Ɛmɔkɔpena me, na ɛmɔngonwu me; na nekaa bɔ nwɔ ne, ɛmɔngɔhora ngɔwa berɛ bie.’ ”

³⁷ Na kyẽa bɔ ɔpɛ ye bo, bɔ ɔte aluolue ne anu kyẽa piri ne, Yesu dwɔso gyinane, na ɔteane nu hane kyɛ, “Sɛ nzuhɔen ku ebie a, ɔbra me berɛ ɔɔno nzue oo.

³⁸ Na kyɛbɔ Ahyerɛlɛ ne ahã ne, ebiala bɔ ode me di ne, ‘Ngoa asue mɔ kɔtengyɛ kofi ye kunu.’ ”

³⁹ Na ɛhe de, ɔhã fale Sunzum ne nwo, bɔ mmenia bɔ bede ye bedi ne bɛbaanya ye ɔ; né Sunzum ne onnya ɔwwale, ofikyɛ né bennya bɛhhyɛle Yesu animnyam.

⁴⁰ Na mmenia ne tele sɔ dwirɛ nen, bɛ nu biemɔ hane kyɛ, “Ngɔmhyɛlɛniɛ ne ɛhe amba!”

⁴¹Yeɛ ebiemɔ koso hane kyɛ, “Kristo ne ɛhe!” Nakoso ebiemɔ hane kyɛ, “Kristo ne, Galilea yeɛ okofi kɔwa hɔ anaa?

⁴² Ahyerɛlɛ ne, aso wanga kyɛ Kristo ne kɔyɛ Dawide bosoniɛ, na Betlehem kuro bɔ Dawide tenane so ne anu yeɛ okofi ɔ?”

⁴³Na ɔnate ye ti mmenia ne anu hyehyɛle.

⁴⁴ Na bɛ nu biemɔ penane kyɛ bɛkɔhye ye ɔ, nakoso ebiala amva ye sa wanga ye.

⁴⁵Na asomvoɛ nemɔ sa hɔle asɔfo mbanyi ne Farasiifoɛ nemɔ berɛ nen, bebisale bɛ kyɛ, “Nzu ati yeɛ ɛmɔamva ye bamma ɔ?”

⁴⁶ Na asomvoɛ nemɔ buale kyɛ, “Sona biala nne berɛ bɔ wadwudwo kyɛ biaa he ɔ le!”

⁴⁷Yeɛ Farasiifoɛ nemɔ buale bɛ kyɛ, “Walakalaka ɛmɔ koso anaa?

⁴⁸Mbanyi nemɔ anu bie anaa Farasiifoɛ nemɔ anu bie wale ye wali hɔ ɔ?

⁴⁹Na mmenia hemɔ bɔ bɛnze mmeraa ne ne, ɛnomalɛ yeɛ banoma bɛ ɔ!”

⁵⁰ Na Nikodemo bɔ mmerɛ bie ɔwale Yesu berɛ [kɔngɔen] ne, bɔ ɔte bɛ nu ko ne, osele bɛ kyɛ,

⁵¹“Yɛ mmeraa ne, aso obua sona foɛ, wɔ aberɛ bɔ yɛttiele ye noa dwirɛ ná yɛnnwuni bɔ wayɔ ɔ?”

⁵²Na bebuale ye kyɛ, “Gyamea wɔ koso efi Galilea hɔ ɔ? Neanea Ahyerɛlɛ ne anu, na ekonwu ye kyɛ ngɔmhyɛlɛniɛ biala ngodwɔso ngofi Galilea le.” [

⁵³Na ebiala hɔle ye awuro ngoko ngoko.]