Read Sehwi Yohane 8 Bible Online

Yohane 8 - Sehwi bible

Yohane 8

²Na aleɛ hyene ngyerɛmɔ tutututu ne, osa wale asɔneyɛɛ sua nu berɛ, na ɛlɔen ne amukoraa bɛwale ye berɛ, na ɔtenane ase yɛle ngyerɛkyerɛ hyirele bɛ.

³Yeɛ ahyerɛlɛfoɛ ne Farasiifoɛ bɛfale braa bie bɔ baafite ye so wɔ adwamanbɔlɛ nu ɔ bɛwale, na bɛfale ye beegyinane b’afia berɛ.

⁴Na besele Yesu kyɛ, “Kyerɛkyerɛniɛ, baafite braa he aso wɔ adwamanbɔlɛ nu pɛɛ.

⁵ Na Mose hyɛle yɛ wɔ mmeraa ne anu kyɛ, sona sɔaa, odi kyɛ yɛboro ye nyɔboɛ. Na wɔ koso, sɛɛ yeɛ ɛkã fa ye nwo ɔ?”

⁶ Bɛhane ɛhe bɛfa besuale ye ngaen, kyɛbɔ bekonya edwirɛ bie bɛkɔfa bɛkɔbɔ ye kwaadu ɔ. Na Yesu kunduni berɛ, na ɔfale ye sa mmɛseka hyerɛhyerɛle aseɛnwo berɛ.

⁷ Na begu so bebisabisa ye dwirɛ nen, ɔtengyɛle ye nu sele bɛ kyɛ, “Ɛmɔ nu ko bɔ bɔne nne ye nwo ne, maa oli moa ɔto nyɔboɛ bɔ ye.”

⁸Na okunduni berɛ bieku fale ye sa mmɛseka hyerɛle aseɛnwo berɛ.

⁹Na bɛtele sɔ dwirɛ nen, bɛ bɔbɔ bɛ tiboa buale bɛ fɔ; yiti befili berɛ bɛhɔle ngoko ngoko, ofi mbanyi nemɔ so maa oodwuli ngwadaa so. Na ɔhale Yesu ngome berɛ, ɔne braa ne bɔ ogyi ye nyunu berɛ ne.

¹⁰Na Yesu tengyɛle ye nu ne, wannwu ebiala te kyɛ braa ne angome, na osele ye kyɛ, “Mmobraa, wɔ kwaadubɔlɛfoɛ nemɔ, bɛwɔ nisua? Ebiala ammua wɔ foɛ anaa?”

¹¹ Na obuale kyɛ, “Daabi, me Mene, ebiala ammua me foɛ.” Yeɛ Yesu sele ye kyɛ, “Me koso memmua wɔ foɛ; kɔ, na nnɛkɔyɔ bɔne ko.”

¹² Yeɛ Yesu sele bɛ bieku kyɛ, “Me ole wiase kanea ne; ebiala bɔ oli me si ne, ɔngɔnate awosii nu le, na okonya ngoa kanea ne.”

¹³ Yeɛ Farasiifoɛ nemɔ sele ye kyɛ, “Edi wɔ bɔbɔ wɔ nwo adanzeɛ; w’adanzeɛ ne ɔtte nahorɛ.”

¹⁴Na Yesu buale bɛ kyɛ, “Sɛ medi me bɔbɔ me nwo adanzeɛ po a, m’adanzeɛ ne te nahorɛ; ofikyɛ mese nekaa bɔ mvi mmale ɔ, ɔne nekaa bɔ mékɔ ɔ. Nakoso ɛmɔ de, ɛmɔnze nekaa bɔ mvi mmale ɔ anaa nekaa bɔ mékɔ ɔ.

¹⁵Ɛmɔ de, ɛmɔbu anwoɔnaen nu ndɛen; na me de, memmua ebiala ndɛen.

¹⁶ Sɛ ye po mebua ndɛen a, me ndɛenbualɛ te nahorɛ, ofikyɛ nna me ngome yeɛ mebua ndɛen ɔ, na mmom me ne Baba ne bɔ ɔsomane me ne.

¹⁷Bahyerɛ ye wɔ ɛmɔ mmeraa ne anu kyɛ: Mmenia nyɔ b’adanzeɛ te nahorɛ.

¹⁸Medi me bɔbɔ me nwo adanzeɛ, yeɛ Baba ne bɔ ɔsomane me ne koso odi me nwo adanzeɛ.”

¹⁹Yeɛ bebisale ye kyɛ, “Nisua yeɛ wɔ Baba wɔ ɔ?” Na Yesu buale kyɛ, “Ɛmɔnze me, yeɛ ɛmɔnze me Baba ne koso; na sɛ ɛmɔse me a, ahaa ɛmɔkonwu me Baba koso.”

²⁰ Mmerɛ bɔ né ɔyɛ ngyerɛkyerɛ wɔ asɔneyɛɛ sua ne anu, wɔ nekaa bɔ fotoɛ alaka nemɔ begyigyi ne yeɛ ɔhane sɔ dwirɛ nemɔ ɔ; nakoso ebiala angye ye, ofikyɛ né ye mmerɛ ne onnya oddwuli.

²¹ Na Yesu sele bɛ bieku kyɛ, “Me de, mékɔ, na ɛmɔkɔpena me, na ɛmɔkowu ɛmɔ bɔne nu; na nekaa bɔ mékɔ ne, ɛmɔngɔhora ngɔwa berɛ.”

²²Yiti Yudafoɛ nemɔ hane kyɛ, “Ɔbaahu ye nwo anaa, bɔ yiti yeɛ ɔnwa, ‘Nekaa bɔ mékɔ ne, ɛmɔngɔhora ngɔwa berɛ’ ɔ?”

²³ Na obuale bɛ kyɛ, “Ɛmɔfi aseɛnwo wa, na me de, mvi anwuro. Ɛmɔfi wiase wa, na me de, mmvi wiase ye anu.

²⁴ Ye sɔ ati yeɛ nzele ɛmɔ kyɛ, ɛmɔkowu ɛmɔ bɔne nu ne; na sɛ ɛmɔanne banni kyɛ me ole ye a, ɛmɔkowu ɛmɔ bɔne nu.”

²⁵Na bebisale ye kyɛ, “Nwa ole wɔ?” Yesu buale bɛ kyɛ, “Bɔ mvi ahyɛaseɛ ne nga ngyirele ɛmɔ ne ala.

²⁶ Na nne ɛmɔ nwo dwirɛ pee mekã, ɔne ɛmɔ nwo ndɛen mebua; na bɔ ɔsomane me ne te nahorɛniɛ. Na bɔ nde mvili ye berɛ ne ala yeɛ mekã mekyire wiase ɔ.”

²⁷Bande ye bo kyɛ Baba ne nwo dwirɛ yeɛ né ɔkã kyire bɛ ɔ.

²⁸ Yiti Yesu hane kyɛ, “Sɛ ɛmɔnya bɛma Sona Awa ne so a, yeɛ ɛmɔkonwu kyɛ me ole ye ɔ; na memva me bɔbɔ me tumi menyɔ nikye fee, na mmom kyɛbɔ Baba ne hyirehyirele me ne, sɔ ala yeɛ mekã ɔ.

²⁹Na bɔ ɔsomane me ne, ɔboka me so; ɔyyakyili me ngome nu, ofikyɛ meyɔ bɔ ɔsɔ ye nye mmerɛ biala.”

³⁰ Na ogu so bɔ ɔkã sɔ nen, mmenia pee belele ye belili.

³¹Yeɛ Yesu sele Yudafoɛ bɔ belele ye belili ne kyɛ, “Sɛ ɛmɔtira me dwirɛ ne anu a, ye de ɛmɔte m’asuafoɛ amba,

³² na ɛmɔkonwu nahorɛ ne, na nahorɛ ne kɔyɛ ɛmɔ nnehyeɛ.”

³³ Na bebuale ye kyɛ, “Abraham bosofoɛ ole yɛ; na yɛyyɛle ebiala ngoaa le. Ɔyɛle sɛɛ bɔ ɛkã kyɛ, ‘Ɛmɔkɔyɛ nnehyeɛ ɔ?’ ”

³⁴ Yesu buale bɛ kyɛ, “Nahorɛ nu paa, mekã mekyire ɛmɔ kyɛ, ebiala bɔ ɔyɔ bɔne ne, ɔte bɔne akoaa.

³⁵ Akoaa nga awuro afebɔɔ; na baa de, ɔte berɛ afebɔɔ.

³⁶Yiti sɛ Baa ne ɔyɛ ɛmɔ nnehyeɛ a, ɛmɔkɔyɛ nnehyeɛ amba.

³⁷Mese kyɛ ɛmɔte Abraham bosofoɛ, nakoso ɛmɔpena me beku me, ofikyɛ me dwirɛ ne onnya nekaa ndena wɔ ɛmɔ nu.

³⁸Bɔ manwu ye wɔ me Baba berɛ ne, ye yeɛ mekã ɔ, na ɛmɔ de, bɔ ɛmɔate bafi ɛmɔ baba berɛ yeɛ ɛmɔyɔ ɔ.”

³⁹Bebuale ye kyɛ, “Yɛ nana ole Abraham.” Na Yesu sele bɛ kyɛ, “Sɛ ɛmɔte Abraham nnomaa a, ahaa ɛmɔkɔyɔ bɔ Abraham yɔle ɔ;

⁴⁰na afei de, ɛmɔpena me beku me, me bɔ mahã nahorɛ bɔ nde mvili Nyameɛ berɛ mahyire ɛmɔ ne. Abraham de, wanyɔ sɔ!

⁴¹ Ɛmɔ baba yɔleɛ yeɛ ɛmɔyɔ ɔ.” Na bebuale ye kyɛ, “Yɛ de yɛtte adwaman mmaa; yɛ Baba te komapɛ twe, ye ole Nyameɛ.”

⁴² Yeɛ Yesu buale bɛ kyɛ, “Sɛ ɛmɔ Baba ole Nyameɛ a, ahaa ɛmɔkohuro me dwirɛ, ofikyɛ Nyameɛ nu yeɛ mvi mmale ɔ. Mamva me bɔbɔ me tumi so yeɛ mmale ɔ, na ye yeɛ ɔsomane me ɔ.

⁴³Nzu ati yeɛ ɛmɔnde me dwirɛ bo ɔ? Ɔnate kyɛ ɛmɔngora bendie me dwirɛ.

⁴⁴ Ɛmɔ de, ɛmɔ baba bɔ ɛmɔfi ye nu ole abɔnzam, na ɛmɔ baba n’apɛdeɛ yeɛ ɛmɔkuro kyɛ ɛmɔyɔ ɔ. Ɔte wudiniɛ fi ahyɛaseɛ ne; na ollili nahorɛ le, ɔnate kyɛ nahorɛ biala nne ye nu. Sɛ ɔkã ngondombo dwirɛ a, kyɛbɔ ye sue te ne ala yeɛ ɔkã ɔ, ofikyɛ ɔte ngondomboniɛ ne ngondombo baba.

⁴⁵Na ɔnate kyɛ mekã nahorɛ ne ati, ɛmɔnne me benni.

⁴⁶Ɛmɔ nu nwa yeɛ obua me foɛ wɔ bɔne bie nwo ɔ? Na sɛ mekã nahorɛ ne a, nzu ati yeɛ ɛmɔnne me benni ɔ?

⁴⁷Ebiala bɔ ofi Nyameɛ nu ne, otie Nyameɛ dwirɛ. Na nikyee ti bɔ ɔmaa ɛmɔndie ne ole kyɛ, nna Nyameɛ nu yeɛ ɛmɔfi ɔ.”

⁴⁸Yeɛ Yudafoɛ nemɔ buale ye kyɛ, “Aso nna nahorɛ yeɛ yahã ne anaa, kyɛ ɛte Samarianiɛ na ele sunzummɔne?”

⁴⁹Na Yesu buale kyɛ, “Me de, nnne sunzummɔne; na mmom medi me Baba ni, na ɛmɔ de, ɛmɔnni me ni.

⁵⁰Na me de, membena me bɔbɔ m’animnyam; na mmom Ebie wɔ berɛ bɔ ɔpena ɔ, na ye yeɛ obua ndɛen ɔ.

⁵¹ Nahorɛ nu paa, mekã mekyire ɛmɔ kyɛ, sɛ ebie di me dwirɛ so a, ongowu le.”

⁵²Yeɛ Yudafoɛ nemɔ sele ye kyɛ, “Afei yeɛ yanwu kyɛ ele sunzummɔne ɔ. Abraham wuli, yeɛ ngɔmhyɛlɛfoɛ nemɔ koso bewuwuli ɔ, nakoso wɔ de ɛnwa, ‘Sɛ ebie di me dwirɛ so a, ongowu le.’

⁵³ Edi mu tra yɛ nana Abraham bɔ owuli ne anaa? Ngɔmhyɛlɛfoɛ nemɔ koso bewuwuli. Ɛdwene kyɛ ɛte nzu koraa?”

⁵⁴ Na Yesu buale kyɛ, “Sɛ mehyɛ me nwo animnyam a, m’animnyam ne ɔtte huu. Me Baba bɔ ɛmɔnwa ɔte ɛmɔ Nyameɛ nen, ye yeɛ ɔhyɛ me animnyam ɔ.

⁵⁵Nakoso ɛmɔnze ye, na me de, mese ye. Na sɛ mekã kyɛ menze ye a, ngɔyɛ ngondomboniɛ kyɛ ɛmɔ ala. Nakoso mese ye, na medi ye dwirɛ so.

⁵⁶ Ɔyɛle ɛmɔ nana Abraham fɛ kyɛ né okonwu me kyẽa ne ɔ; onwuni ye, na ye nye gyele.”

⁵⁷Yeɛ Yudafoɛ nemɔ sele ye kyɛ, “Ellili afoɛ aburannu po, na ɔyɛle sɛɛ bɔ enwuni Abraham ɔ?”

⁵⁸ Na Yesu sele bɛ kyɛ, “Nahorɛ nu paa, mekã mekyire ɛmɔ kyɛ, anzana Abraham baawa ne, né nwɔ berɛ.”

⁵⁹ Yiti bɛsesale nyɔboɛ kyɛ bɛto bɛbɔ ye, na Yesu fale ye nwo feale, na ɔfale mmenia ne anu fili asɔneyɛɛ sua nu berɛ hɔle.