Read Sehwi Yohane 9 Bible Online

Yohane 9 - Sehwi bible

Yohane 9

¹Na Yesu ɔ́pɛ nu kɔ nen, onwuni ebie bɔ ye nye asi fi mmerɛ bɔ bɛwole ye ɔ.

² Na ye asuafoɛ nemɔ bisale ye kyɛ, “Rabi, nwa yeɛ ɔyɔle bɔne ɔ, biaa he anaa ye awofoɛ, bɔ ɔmaa ɔnate so bɛwole ye anyesiniwaaniɛ ye?”

³Na Yesu buale kyɛ, “Nna biaa he, anaa ye awofoɛ yeɛ bɛyɔle bɔne ɔ; na mmom kyɛ Nyameɛ nnwumaa kɔla ali wɔ ye nu ti ɔ.

⁴Na mmerɛ bɔ alehyeleɛ wɔ berɛ ye de, ɔsɛ kyɛ yɛyɔ bɔ ɔsomane me ne nnwumaa; na alesaleɛ ɔ́ba bɔ ebiala ngɔhora ngɔyɔ adwuma ɔ.

⁵Mmerɛ bɔ nwɔ wiase ye de, me ole wiase kanea ne.”

⁶ Na ɔhane sɔ nen, ɔfele nwɔserɛ guale aseɛnwo, na ɔfale nwɔserɛ ne frale nnɛterɛ, na ɔfale nnɛterɛ ne wasale biaa ne nye so,

⁷ na osele ye kyɛ, “Kɔ, ná konwunzi so wɔ ɛkwaa Siloam nu,” (bɔ ye bo kyire: Bɔ basoma ye ɔ). Yiti osili nu hɔle oonwunzini so, na osa wale nen, né onwu nikye.

⁸ Na mandamu berɛ ama ne bɛ bɔ banwu ye le kyɛ mmerɛ bie né ɔsrɛsrɛ nikyee ne, bebisale kyɛ, “Nna biaa he yeɛ né ɔte berɛ ɔsrɛsrɛ nikyee ye?”

⁹Ebiemɔ hane kyɛ, “Ye ɔ.” Yeɛ ebiemɔ koso hane kyɛ, “Daabi, osoma ye mbaen.” Na ye bɔbɔ osele kyɛ, “Me bɔbɔ me ala ɔ.”

¹⁰Na bebisale ye kyɛ, “Ɔyɛle sɛɛ yeɛ wɔ nye ne tele ɔ?”

¹¹Na obuale kyɛ, “Biaa bie bɔ bɛfrɛ ye Yesu ne, ye yeɛ ɔdɔnene nnɛterɛ fa wasale me nye so ɔ, na ɔhã hyirele me kyɛ, ‘Kɔ ɛkwaa Siloam nu konwunzi so.’ Na ngɔnwunzini so, yiti yeɛ ɔmaa menwu nikyee ye.”

¹²Yeɛ bebisale ye kyɛ, “Ɔwɔ nisua?” Na obuale kyɛ, “Menze.”

¹³Bɛfale biaa bɔ mmerɛ bie né ye nye asi ne bɛbrɛle Farasiifoɛ nemɔ.

¹⁴ Na kyẽa bɔ Yesu dɔnene nnɛterɛ ná ɔfa tele ye nye ne, né ɔte afofikyẽa.

¹⁵Yeɛ Farasiifoɛ nemɔ koso besa bisale ye kyɛbɔ osi yɛle bɔ afei de onwu nikye ɔ. Na obuale bɛ kyɛ, “Ɔfale nnɛterɛ wasale me nye so, yeɛ ngɔnwunzini so ɔ, yiti yeɛ menwu nikyee ye.”

¹⁶ Yeɛ Farasiifoɛ ne anu biemɔ hane kyɛ, “Sɔ biaa ne, nna Nyameɛ berɛ yeɛ ofi ɔ, ɔnate kyɛ onni afofikyẽa so.” Na ebiemɔ koso bɛhane kyɛ, “Ɔkɔyɛ sɛɛ né sona bɔ ɔte bɔnefoɛ ɔ wahora wayɔ nzɛngyerɛnneɛ bɔ ɔte sɔaa ɔ?” Na bɛ nu hyehyɛle.

¹⁷ Yiti besa bebisale anyesiniwaaniɛ ne kyɛ, “Wɔ koso, nzikyɛ yeɛ ɛkã fa ye nwo ɔ, ye bɔ ɔtele wɔ nye ne?” Na osele kyɛ, “Ɔte ngɔmhyɛlɛniɛ.”

¹⁸Nakoso Yudafoɛ nemɔ de, banne ye nwo dwirɛ ne banni, kyɛ né ye nye asi, na afei de onwu nikye ɔ, kɔpem kyɛ bɛfrɛle biaa bɔ onwu nikyee n’awofoɛ,

¹⁹na bebisale bɛ kyɛ, “Ɛmɔ awa bɔ ɛmɔnwa bɛwole ye anyesiniwaaniɛ ne, ye ɛhe anaa? Ɔyɛle sɛɛ bɔ afei de onwu nikyee ye?”

²⁰Yeɛ ye awofoɛ buale bɛ kyɛ, “Yɛ de, yɛse kyɛ yɛ wa ɛne, na yɛwole ye ɔ né ye nye asi;

²¹nakoso kyɛbɔ osi yɛle bɔ afei onwu nikyee ye de, yɛnze; yeɛ yɛnze bɔ ɔtele ye nye ne ɔ. Ɛ́mɔbisa ye, wanyi, na ye bɔbɔ okodwudwo kɔma ye nwo!”

²² Ye awofoɛ hane sɔ, ofikyɛ né besuro Yudafoɛ nemɔ; ɔnate kyɛ né Yudafoɛ nemɔ bayɛ adwene kyɛ, sɛ ebie kã ye pefee kyɛ ye ole Kristo ne a, bekotu ye bekofi nyianu sua nu berɛ.

²³Ɛhe ati yeɛ ɔmaa ye awofoɛ bɛhane kyɛ, “Wanyi, ɛ́mɔbisa ye!”

²⁴Yiti besa bɛfrɛle biaa bɔ mmerɛ bie né ɔte anyesiniwaaniɛ ne, na besele ye kyɛ, “Fa animnyam ma Nyameɛ! Yɛ de, yɛse kyɛ biaa he ɔte bɔnefoɛ.”

²⁵Yeɛ obuale kyɛ, “Sɛ ɔte bɔnefoɛ a, me de menze; nikyee komapɛ yeɛ mese ɔ: ahaa né nde anyesiniwaaniɛ, nakoso kekesaala ye de menwu nikye.”

²⁶Na bebisale ye kyɛ, “Ɔyɛle wɔ sɛ koraa? Ɔtele wɔ nye ne sɛ?”

²⁷Na obuale bɛ kyɛ, “Mahã mahyire ɛmɔ dada, nakoso ɛmɔandie. Nzu ati yeɛ ɛmɔpena kyɛ betie ye bieku ɔ? Ɛmɔ koso, ɛmɔpena kyɛ ɛmɔyɛ ye asuafoɛ anaa?”

²⁸ Yeɛ bɛpepɛle ye nzoaa besele kyɛ, “Wɔ yeɛ ɛte ye suaniɛ ɔ; na yɛ de, yɛte Mose asuafoɛ.

²⁹Yɛse kyɛ Nyameɛ dwudwo hyirele Mose, nakoso sɔ biaa he de, yɛnze nekaa bɔ ofi ɔ!”

³⁰Na biaa ne buale bɛ kyɛ, “Edwirɛ nwanwa ɛhe! Ɛmɔnze nekaa bɔ ofi ɔ, nakoso me de, ɔtele me nye!

³¹ Yɛse kyɛ Nyameɛ ndie bɔnefoɛ mɔ, nakoso sɛ ebie sɔne Nyameɛ ná ɔyɛ ye apɛdeɛ a, ye yeɛ Nyameɛ tie ye ɔ.

³²Ofi wiase ahyɛaseɛ, yɛttele ye le kyɛ ebie ate sona bɔ bɛwole ye anyesiniwaaniɛ ɔ ye nye.

³³Sɛ nna Nyameɛ berɛ yeɛ biaa he ofi a, ahaa ɔngɔhora ngɔyɔ huu.”

³⁴Na bebuale ye kyɛ, “Bɛwole wɔ bɛtole bɔne nu buroburoburo, na afei wɔ yeɛ ekyirekyire yɛ ɔ?” Na bɛfoane ye befili nyianu sua ne anu.

³⁵Na Yesu tele kyɛ bafoa ye bafi nyianu sua ne anu, na onwuni ye nen, obisale ye kyɛ, “Ede Sona Awa[5] ne di anaa?”

³⁶ Na obuale kyɛ, “Me Mene, nwa ole ye, ná nne ye nni?”

³⁷Na Yesu sele ye kyɛ, “Anwu ye, na bɔ ɔne wɔ bedwudwo ne, ye ɛne.”

³⁸ Na ɔhane kyɛ, “Awurade, mede medi!” Na ɔkotole sɔnene ye.

³⁹Na Yesu hane kyɛ, “Ndɛenbualɛ ti yeɛ mmale wiase ɔ, amaa ɔnate so bɛ bɔ bennwu nikyee ne banwu nikye; ná bɛ bɔ benwu nikyee ne koso bakakyi anyesiniwaafoɛ.”

⁴⁰ Yeɛ Farasiifoɛ ne anu biemɔ bɔ né bɛwɔ ye nwo berɛ ne, bɛtele sɔ dwirɛ ne, na bebisale ye kyɛ, “Yɛ koso, yɛte anyesiniwaafoɛ anaa?”

⁴¹ Na Yesu buale bɛ kyɛ, “Sɛ ɛmɔte anyesiniwaafoɛ a, ahaa ɛmɔnni bɔne nwo fɔ; nakoso ɔnate kyɛ ɛmɔnwa ‘Yɛnwu nikye’ ne ati, ɛmɔ bɔne mata ɛmɔ.”