Read Sehwi Asomafoɛ 11 Bible Online

Asomafoɛ 11 - Sehwi bible

Asomafoɛ 11

¹Na asomafoɛ nemɔ ne aliɛmaa mɔ bɔ bɛwɔ Yudea ne bɛtele kyɛ Amaenmaensofoɛ nemɔ koso bale Nyameɛ dwirɛ ne bali.

²Yiti mmerɛ bɔ Petro wale Yerusalem nen, bɛ bɔ bɛte bienzuapɛlɛfoɛ nemɔ bɛne ye nyane dwudwolɛ

³kyɛ, “Nzu ati yeɛ ɛhɔle bɛmbɛ-bɛ-bienzuafoɛ nemɔ berɛ, ná ɛne bɛ sa didili ne!”

⁴ Na Petro hyɛle ye bo fale ye mukoraati bɔle bɛ amaneɛ ngoko ngoko kyɛ,

⁵“Né nwɔ Yopa kuro nu mebɔ mbaeɛ, na ngɔle nyekyire tebea nu, na nyekyire nu, nwuni nikyee bie bɔ ɔte kyɛ nwera pirikua, bɔ basosɔ ye noa nna ne anu, bɔ odwu fi nyameɛso ba ase ɔ, na oogyinane me nwo berɛ.

⁶Nneane ye haa, na nwuni ndɔteboa, ngaka aboyaa, ngaka bɔ bɛtwe bɛ nwo ase ne ewienu nnomaa.

⁷Yeɛ ndele komviɛ bie kyɛ, ‘Petro, dwɔso ná ku bɛ di!’

⁸Nakoso ngane kyɛ, ‘Daabi Awurade, nikyee biala bɔ bekyi anaa bɔ ye nwo nde ɔ, ɔhhane me noa le.’

⁹Na komviɛ ne fili nyameɛso sili so bieku kyɛ, ‘Nikyee biala bɔ Nyameɛ ate ye nwo ne, nnebu ye kyɛ ɔte akyiwadeɛ.’

¹⁰Ɛhe hɔle so alaa pɛen nza, na afei besa bɛtwetwene nikyee ne amukoraati bɛhɔle nyameɛso.

¹¹Na berɛ ne ala, mmenia nza bie bɔ né basoma bɛ me berɛ fi Kaesarea ɔ, bɛwale beegyinane awuro bɔ né nde nu n’anoa nu.

¹²Na Sunzum ne hã hyirele me kyɛ me ne bɛ yɛhɔ, na nnɛmaa meyɛ nyeyemuɛ. Sɔ aliɛmaa nzia hemɔ koso bɛbokale me so yeɛ yɛhɔle biaa n’awuro berɛ ɔ.

¹³Na ɔhã hyirele yɛ kyɛbɔ osi nwuni abɔfo bie kyɛ ogyi ye awuro berɛ, ná osele ye, Kɔneleo, kyɛ, ‘Soma mmenia ma bɛhɔ Yopa bɛɛfa Simɔn bie bɔ besa bɛfrɛ ye Petro ne bɛbra,

¹⁴na ɔkɔhã edwirɛ kohyire wɔ bɔ ɔnate so ɛne w’awuro ama amukoraati ɛmɔkonya daa ngoa ɔ.’

¹⁵Na nhyɛle ye bo kyɛ medwudwo ne ala yeɛ Sunzum Krongron ne wale bɛ so, kyɛbɔ ahyɛaseɛ ne ɔwale yɛ so ne ala.

¹⁶ Na ngayele Awurade dwirɛ bɔ ɔhane kyɛ, ‘Yohane fale nzue yeɛ ɔbɔle asu ɔ, na ɛmɔ de, bɛkɔfa Sunzum Krongron yeɛ bɛkɔbɔ ɛmɔ asu ɔ.’

¹⁷Na sɛ Nyameɛ yeɛ ɔfale akyɛdeɛ komapɛ ne mane bɛ, kyɛbɔ ɔfa mane yɛ wɔ mmerɛ bɔ yɛlele Awurade Yesu Kristo yɛlili ne a, né me ole nwa bɔ mekora mesi Nyameɛ ate ɔ?”

¹⁸Agyidifoɛ ne tele ye sɔ nen, banga ye nwo hwee ko, na bɛyele Nyameɛ ayɛ kyɛ, “Nzaade Nyameɛ ama Amaenmaensofoɛ koso adwenesakyera nwo ate bɔ ɔfa bɛ kɔ daa ngoa nu ɔ.”

¹⁹ Setefano hunɛ ne asi ne, ayaayaadeɛ bɔ bɛfa bɛyɔle agyidifoɛ ne maa bɛbɔle aya. Ebiemɔ nwatili alaa beefitele Fonikia, Kipro ne Antiokia, na Yudafoɛ ngome yeɛ bɛhane nzɛmba ne behyirele bɛ ɔ.

²⁰Na agyidifoɛ nemɔ bie koso bɔ né bɛwɔ Kipro ne Kirene hɔle Antiokia bɛɛbɔle Awurade Yesu nzɛmba ne dawure behyirele Helafoɛ koso.

²¹Awurade gyinane bɛ si; na mmenia pee bɔ bele belili ne, bɛfale bɛ nwo bɛmane Awurade.

²²Na Yerusalem asɔre ne tele sɔ dwirɛ ne, yiti bɛsomane Banaba maa ɔhɔle Antiokia.

²³Banaba hɔle oodwuli berɛ na onwuni kyɛbɔ Nyameɛ asi ayira asɔre nen, ye nye gyele, na ɔhyɛle bɛ nguraen kyɛ bɛfa b’ahone mukoraa bɛsɔ gyidie ne anu paa, na beli nahorɛ bɛma Awurade.

²⁴Né Banaba te sona paa bɔ Sunzum Krongron ne gyidie ayi ye tɛkyɛ ɔ, na ɔhwene mmenia pee maa beelili Awurade si.

²⁵Banaba fili berɛ hɔle Taaso kyɛ ɔkwaapena Sɔɔlo.

²⁶Na onwuni Sɔɔlo nen, ɔfale ye wale Antiokia. Bɛ munyɔ bɛ ne Antiokia asɔremma ne bɛtenane afoɛ ko mumua, na bɛyɛle ngyerɛkyerɛ behyirele mmenia pee. Na Antiokia berɛ yeɛ belili moa bɛfrɛle agyidifoɛ nemɔ Akristofoɛ ɔ.

²⁷Na sɔ mmerɛ ne anu, ngɔmhyɛlɛfoɛ biemɔ fili Yerusalem bɛwale Antiokia.

²⁸ Bɛ nu ko bɔ bɛfrɛ ye Agabo fale Sunzum Krongron tumi so hyɛle ngɔm kyɛ ɛhɔen pirikua bie baawa ewiase amukoraa. Sɔ hɔen ne wale Klɔdio Kaesare aberɛ so.

²⁹Yiti asuafoɛ nemɔ yɛle kyɛ bɛ nu biala ɔkekã ye sa ase kãa kyɛbɔ ɔkɔhora ɔ, ná bɛfa bɔ bekonya ye ne bɛɛboka aliɛmaa mɔ bɔ bɛwɔ Yudea ɔ.

³⁰Bɛyɔle sɔ, na bɛfale akyɛdeɛ ne bɛsomane Banaba ne Sɔɔlo maa bɛɛmane Yerusalem asɔre ne mbanyi mɔ.