Read Sehwi Asomafoɛ 12 Bible Online

Asomafoɛ 12 - Sehwi bible

Asomafoɛ 12

¹Sɔ mmerɛ ne anu, Nana Herode[6] tuli asɔre ne anu mmenia ne biemɔ anyeɛ.

²Ɔfale ngrandɛ huni Yohane aliɛma Yakobo.

³Na onwuni kyɛ bɔ wayɔ ne ayɛ Yudafoɛ nemɔ fɛ, yiti ɔtoale so hyele Petro koso. (Ɛhe sili Paanoo Kabrɛdi aluolue mmerɛ ne.)

⁴ Ɔhyele Petro nen, ɔtole ye kuku nu, na ɔfale ye wurale asraafoɛ fekue faa nna sa kyɛ bɛwɛne ye. Né fekue ko biala tira mmenia nna. Na Herode yɛle kyɛ sɛ bedi Abɔtra aluolue ne beyie a, ɔkɔye ye koli ye dwirɛ wɔ badwa nu.

⁵Na mmerɛ bɔ Petro la kuku nu berɛ nen, asɔre mma ne mane bɛ nye borole hɔle so bɔle mbaeɛ mane ye.

⁶Sɔ kyẽa ne kɔngɔen, bɔ Herode yɛle kyɛ aleɛ kye a ɔkɔye Petro kɔwa badwa nu ne, né Petro alafe wɔ asraafoɛ nyɔ afia. Né bafa ngɔnzɔngɔnzɔ nyɔ bagua ye ne asraafoɛ nyɔ ne; yeɛ afei né asraafoɛ ne bie koso gyigyi anoa ne si bɛwɛne kuku nu ne.

⁷Aworafire nu, Awurade abɔfo wale kuku nu berɛ, na sua ne anu tale hyireinn. Abɔfo ne pusupusuli Petro maa otingyele, na osele ye kyɛ, “Dwɔso ndɛ!” Na berɛ ne ala ngɔnzɔngɔnzɔ ne fili ye sa puro guale.

⁸Na Abɔfo ne sele ye kyɛ, “Bɔ w’abɔsoɛ na wura wɔ mbaboa.” Petro yɔle sɔ, na abɔfo ne sa sele ye kyɛ, “Fa w’ataadeɛ aguasoɛ wura na di me si.”

⁹Na ofitele lili ye si; na né ɔnze kyɛ bɔ abɔfo ne yɔle ne ɔte edwirɛ bɔ osi amba, na né ɔdwene kyɛ onwu nyekyire.

¹⁰Na bɛtrale awɛmvoɛ fekue bɔ oli moa ne ɔne bɔ ɔtɔ so nyɔ nen, bɛtole buralɛ anoa bɔ bɛfa nu bɛkɔ kuro ne anu ne. Anoa ne bɔbɔ bukyele mane bɛ, na bewurale nu befitele. Bɛpɛle nu borɔnoɛ ko aso, na berɛ ne ala, abɔfo ne yakyili ye berɛ.

¹¹Na Petro nye wale ye nwo so ne, ɔhane kyɛ, “Afei de, manwu kyɛ ɔte nahorɛ kyɛ Awurade asoma ye abɔfo maa waaye me wafi Herode sa nu, ɔne nikyee biala bɔ Yudafoɛ nye la so kyɛ bɛkɔfa bɛkɔyɛ me ɔ nu.”

¹²Na mmerɛ bɔ Petro nwuni ye sɔ ne, ɔhɔle Yohane bɔ besa bɛfrɛ ye Marko ne ye maame Maria awuro, nekaa bɔ né mmenia pee bayia bɛbɔ mbaeɛ ɔ.

¹³Petro bɔle dwaaso anoa ne anu, na abaayaa somvoɛ bie bɔ bɛfrɛ ye Roda wale kyɛ ɔbaanea sona horɛ.

¹⁴Ɔtele Petro komvi, na ye fɛɛ bɔ ɔyɛ ye ne ati, wammukye anoa ne, na mmom otuli amirika ɔɔbɔle amaneɛ kyɛ Petro gyi dwaaso anoa ne asi dɔ.

¹⁵Na besele abaawa ne kyɛ, “Gyamea nikyee bie yeɛ ɔyɛ wɔ ɔ!” Nakoso ɔhɔle so ɔhane ye anyeborolɛ so kyɛ ɔte nahorɛ. Na bɛhane kyɛ, “Nzaade ye abɔfo ɔ.”

¹⁶Né Petro gu so ɔ́bɔ kɔkɔɔkɔ. Nziɛ ye bebukyele anoa ne, na benwuni kyɛ ye ahɔ amba ne, bɛ nwo dwirili bɛ.

¹⁷Ɔfale ye sa nwahane bɛ kyɛ bemua bɛ noa, na ɔhane kyɛbɔ Awurade si yele ye fili kuku nu berɛ ne hyirele bɛ. Na osele bɛ kyɛ, “Ɛmɔhã edwirɛ he behyire Yakobo ne agyidifoɛ ngaa ne.” Na afei ofili berɛ hɔle neka foforɛ.

¹⁸Aleɛ hyene ne, edwirɛ piri tole asraafoɛ nemɔ, ofikyɛ né bɛngora bennwu nikyee bɔ wayɛ Petro ɔ.

¹⁹Herode hane bɛ so kyɛ bɛpena ye, nakoso bannwu ye. Yiti obisale awɛmvoɛ ne kyɛbɔ osi yɛle bɔ Petro nne berɛ ne, na ɔhyɛle kyɛ behũ bɛ. Ɛhe asi ne, Herode fili Yudea hɔle Kaesarea ɔɔtenane berɛ kãa.

²⁰Né Herode afɛ Tirofoɛ ne Sidonfoɛ so yaa paa, yiti betuli mmenia kyɛ beenwu ye. Bɛfale bɛ dwirɛ bɛtole Blasto bɔ ɔnea ahemvie berɛ ne nyunu kyɛ ɔboka bɛ na ɔsrɛ ma bɛ, ɔnate kyɛ Herode maen nu yeɛ bɛ maen ne nya ye aleɛ fi ɔ.

²¹Betuli kyẽa ko besiele berɛ, na odwuli ne, Herode wurale ye ahemvo ndaadeɛ, ɔɔtenane ye ahennie bia so, na odwudwo hyirele bɛ.

²²Na mmenia nemɔ bɛbɔ belele so kyɛ, “Ɛhe de, nyameɛ bie yeɛ odwudwo ne, na nna kuro sona ɔ!”

²³Na aworafire nu, Awurade abɔfo ɔɔbɔle ye tole ase, ofikyɛ wamva animnyam wamma Nyameɛ; ɔlɔle nnɔboakoma na owuli.

²⁴Nyameɛ dwirɛ ne hɔle so trɛle, na agyidifoɛ ne yɛle pee.

²⁵Banaba ne Sɔɔlo yiele bɛ dwumadie ne Yerusalem. Na besa befi Yerusalem bɛkɔ ne, bɛfale Yohane bɔ bɛfrɛ ye Marko ne bɛbokale bɛ nwo so.