Read Sehwi Asomafoɛ 14 Bible Online

Asomafoɛ 14 - Sehwi bible

Asomafoɛ 14

¹Na ɔwale kyɛ Yikoniom koso, bɛ munyɔ bɛhɔle Yudafoɛ nyianu sua nu, na kyɛbɔ besi bedwudwole ne, ɔmane Yudafoɛ ne Helafoɛ pee bele belili.

²Nakoso Yudafoɛ bɔ banne dwirɛ ne banni ne, bɛsɛkyele Amaenmaensofoɛ nemɔ adwene, na bɛmaa benyane aliɛmaa nemɔ nwo adwene tɛɛ.

³Nakoso bɛtenane berɛ bɛhyɛle; besili b’ahone bedwudwole wɔ Awurade nu, na ye koso olili ye adom dwirɛ ne nwo adanzeɛ, na ɔfale bɛ so yɔle nzɛngyerɛnneɛ ne anwanwadeɛ.

⁴Nakoso kuro berɛ ama nu hyɛle nyɔ; bue ko gyi Yudafoɛ nemɔ si, yeɛ bue ko koso gyi asomafoɛ nemɔ si.

⁵Nziɛ ye, Helafoɛ ne Yudafoɛ biemɔ ne bɛ mbanyi mɔ yɛle adwene kyɛ bɛkɔhyɛ Pɔɔlo ne Banaba anyeborolɛ na baboro bɛ nyɔboɛ.

⁶Na bɛtele sɔ dwirɛ nen, bɛnwati bɛhɔle Lisetra ne Dɛɛbi bɔ bɛwɔ Likaonia, ɔne nguraa mɔ bɔ bɛwɔ berɛ nemɔ aso,

⁷na bɛhane nzɛmba ne wɔ berɛ.

⁸Né biaa bie wɔ Lisetra, opofo aseɛnwo, bɔ ɔngora ngyina ye gya so ɔ. Bɛwole ye bubuaniɛ, na né ɔnnatele le.

⁹Né otie edwirɛ bɔ Pɔɔlo ɔkã ne; na Pɔɔlo neane ye haa, na onwuni kyɛ biaa ne le gyidie kyɛ okonya ayaresa ɔ.

¹⁰Yiti ɔteane nu sele ye kyɛ, “Dwɔso gyina wɔ gya so fɔngɔnn!” Na ohuru gyinane, na ɔnatele.

¹¹Na ɛlɔen ne nwuni nikyee bɔ Pɔɔlo ayɔ nen, bɛteateane nu wɔ Likaonia dwudwolɛ nu kyɛ, “Mmosoen nemɔ bayeyɛ bɛ nwo kyɛ mmenia badwu bawa yɛ wa!”

¹²Yiti bɛfrɛle Banaba Seuse,[7] yeɛ Pɔɔlo koso bɛfrɛle ye Hɛme, ɔnate kyɛ né Pɔɔlo yeɛ odwudwo ma bɛ ɔ.

¹³Na bosoen Seuse bɔ ye asɔneyɛɛ sua wɔ kuro ne tiwaa ne, ye kɔmeɛ fale nandwie ne flawase wale kuro berɛ pambim ne anwo, na ɔyɛle kyɛ ɔne ɛlɔen ne bɛbaafa bɛbɔ afɔleɛ.

¹⁴Na mmerɛ bɔ Banaba ne Pɔɔlo tele sɔ dwirɛ nen, besunzuale bɛ ndaadeɛ[8] nu; betuli amirika bɛhɔle mmenia ne anu, na bɛteateane nu kyɛ,

¹⁵ “Biamɔ, nzu ati yeɛ ɛmɔyɔ sɔ ye? Yɛ koso yɛte mmenia kyɛ ɛmɔ ala! Yɛwale kyɛ yɛbaabɔ nzɛmba ne dawure yɛkyire ɛmɔ, kyɛ ɛ́mɔhwe ɛmɔ nwo befi sɔ nningyein mbaen mbaen hemɔ nwo, ná ɛ́mɔfa ɛmɔ nwo bɛma Nyameɛ teasefoɛ bɔ ɔbɔle nyameɛso ne aseɛ ne ɛpo ne bɔ ɔwɔ bɛ nu amukoraa ne.

¹⁶Daa tete mmerɛ bɔ wapɛ nu ne de, ɔmane maen maen amukoraa ate maa bɛyɔle bɔ bekuro ɔ,

¹⁷nakoso wanyakyi ye nwo adanzeɛlilɛ, ofikyɛ ɔyɛle paa, na ɔmane yɛ nzue fili nyameɛso, ɔne mmerɛ bɔ aleɛ ba ɔ, ɔmane ɛmɔ aleɛ, na ɔmaa yɛnya aleɛ ne anigye ma yɛ kunu dwo yɛ fɔnn.”

¹⁸Na edwirɛ bɔ bɛhane ne mukoraa asi ne po, bɛhã bɛfɛle paa koraka yeɛ bɛkora bɛma mmenia ne yakyi afɔleɛ bɔ ahaa bɛbaabɔ bɛma bɛ ne ɔ.

¹⁹ Na Yudafoɛ biemɔ fili Antiokia ne Yikoniom bɛwale berɛ; betuli mmenia ne foɛ tɛɛ, na bɛborole Pɔɔlo nyɔboɛ bɛhwene ye befili kuro ne anu; né besusuli kyɛ wawu.

²⁰Nakoso mmerɛ bɔ asuafoɛ nemɔ pɛle ye nwo yiale ne, odwɔsole, na osa hɔle kuro ne anu. Na aleɛ hyene ne, ɔne Banaba befili berɛ bɛhɔle Dɛɛbi.

²¹Na bɛhane nzɛmba ne behyirele kuro berɛ ama, ná benyane asuafoɛ pee nen, afei besa bɛhɔle Lisetra, Yikoniom ne Antiokia,

²²na bɛhyɛle asuafoɛ nemɔ kra nguraen, betuli bɛ foɛ kyɛ bɛhɔ so begyina pindinn wɔ gyidie ne anu, na bɛhane kyɛ, ɔsɛ kyɛ yɛfa amaneɛnwunɛ pee nu yɛkɔ Nyameɛ ahennie nu.

²³Na besili asɔre biala nu mbanyi bɛmane bɛ, na bɛfale mbaeɛbɔlɛ ne akɔngyere betuli bɛ bewurale Awurade bɔ bale ye bali ne sa.

²⁴Afei bɛɛpɛle nu Pisidia bɛwale Pamfilia.

²⁵Na bɛhane nzɛmba ne wɔ Pɛɛga nen, bɛtoale so bɛhɔle Atalia.

²⁶ Na befili berɛ bɛfale ɛlɛen bɛwale Antiokia, nekaa bɔ bɛfale bɛ bewurale Nyameɛ adom ne sa bɛmane adwuma bɔ bayɔ bayie ne.

²⁷Beedwuli berɛ ne, bɛmane asɔre mma ne yiale, na bɛhane nikyee biala bɔ Nyameɛ afa bɛ so wayɔ ɔ behyirele bɛ, ɔne kyɛbɔ wasi wabukye gyidie anoa wama Amaenmaensofoɛ koso ɔ.

²⁸Na bɛne asuafoɛ nemɔ bɛtenane berɛ bɛhyɛle.