Read Sehwi Asomafoɛ 28 Bible Online

Asomafoɛ 28 - Sehwi bible

Asomafoɛ 28

¹Yɛnyane yɛ ti ngoa yɛyiele nen, yɛtele kyɛ bɛfrɛ sɔ supɔ ne Mɔɔta.

²Supɔ ne aso ama yɛle yɛ paa paa. Esue bɔ né ɔtɔ ne fale ɛyerɛ wale, yiti behuane see bɛmaa yɛ mukoraa yɛtenane ye nwo.

³Pɔɔlo sesale nwuaka guale see ne anu, na ɔnate see ne hyerɛ ne ati, ewoo bie fili nwuaka ne anu fitele, na ɔbrabrale ye sa.

⁴Na mmerɛ bɔ supɔ ne aso ama nwuni kyɛ ewoo ne abrabra ye sa nen, besisele bɛ nwo kyɛ, “Aporowaa biala nne ye nwo, biaa he te wudiniɛ. Ɔwɔ nu kyɛ wanya ye ti ngoa wafi ɛpo nu de, nakoso ye bɔne nwo asohwenɛ bɔ oli ye si ngɔma ongonya ngoa.”

⁵Nakoso ɔpetene ewoo ne tole see ne anu bɔ ɛhwee anyɛ ye (Pɔɔlo) ɔ.

⁶Né berɛ ama ne dwene kyɛ ɔngɔhyɛ biala ye nwo konwunwu, anaakyɛ ɔkɔpɛ kofi kowu. Nakoso bɛneane alaa bɔ ɛhwee biala anyɛ ye ne, benyane adwene foforɛ, na bɛhane kyɛ, “Bosoen bie ɔ!”

⁷Berɛ ne nekaa bɔ supɔ ne aso panyi Publio aseɛ wɔ ne anwa biala. Olele yɛ nyemene so, na yɛlili ye awuro berɛ ɛlɛsa.

⁸Né ebunu ahye Publio baba ato berɛ; asa koso né ahunundulɛ aha ye. Pɔɔlo hɔle ye berɛ ɔɔbɔle mbaeɛ mane ye, na ɔfale ye sa guale ye so maa ɔtele apɔ.

⁹Na sɔ dwirɛ ne sili nen, supɔ ne aso ayarefoɛ mukoraa wale maa Pɔɔlo sale bɛ anwonyerɛ.

¹⁰Bɛhyɛle yɛ nningyein pee paa, na nziɛ ye yɛfi berɛ yɛkɔ ne, bɛmane yɛ nningyein bɔ yɛkohia wɔ yɛ ateetulɛ ne anu ɔ.

¹¹Bosome nza pɛle nu, na afei yɛfole ɛlɛen bie bɔ “Bosoen Ndaa” sɛngyerɛnneɛ bɔ ye nyunu, bɔ ofi Aleksandria yɛhɔle. Né ɛlɛen ne ali prakasua mmerɛ ne wɔ supɔ ne aso.

¹²Yɛɛgyinane kuro bie bɔ bɛfrɛ ye Sirako so, na yɛlili berɛ ɛlɛsa.

¹³Yɛfili berɛ yɛkondone y’atee ne alaa yɛɛdwuli kuro bie bɔ bɛfrɛ ye Regyiom so. Aleɛ hyene ne, mvrama bie bɔle fili ngwaen, na ye elenyɔ ne aso yɛɛdwuli kuro bie bɔ bɛfrɛ ye Puteoli so.

¹⁴Yɛnwuni agyidifoɛ biemɔ berɛ, na bɛsrɛle yɛ kyɛ yɛli bɛ nwo berɛ ɛlɛsoo. Yiti yɛɛdwuli Rome.

¹⁵Rome agyidifoɛ tele yɛ nga nen, bɛwale tonn beeyiale yɛ wɔ Apeɔse dwaanu ɔne nekaa bie bɔ bɛfrɛ ye Ɛwɔfoɛ Sua Nza nu. Na Pɔɔlo nwuni bɛ ne, ɔlale Nyameɛ ase, na ɔmaa ye ahone tɔle ye kunu.

¹⁶Yɛdwuli Rome nen, Pɔɔlo de, bɛmane ye ate kyɛ ɔne asraaniɛ bɔ ɔnea ye so ne bɛɛtena nekaa bɔ Pɔɔlo bɔbɔ okuro ɔ.

¹⁷Ye ɛlɛsa ne aso, Pɔɔlo tole ye sa frɛle Yudafoɛ mbanyi bɔ bɛwɔ Rome maa beyiale, na osele bɛ kyɛ, “Aliɛmaa mɔ, ɔwɔ nu kyɛ manyɔ tɛɛ biala mandia yɛ mmenia anaakyɛ yɛ nana mɔ amanneɛ ne de, nakoso Yudafoɛ maa bɛtole me kuku nu wɔ Yerusalem, na bɛfale me bewurale Romanfoɛ sa.

¹⁸Roman mbanyi neaneane me dwirɛ ne anu yiele nen, ahaa bɛpena kyɛ bɛyakyi me, ofikyɛ bannwu nikyee biala bɔ mayɔ bɔ ɔmaa mefata ehunɛ ɔ.

¹⁹ Nakoso Yudafoɛ ambene so, yiti ɛhe maa ngane kyɛ bɛye dwirɛ ne bɛhɔ Kaesare gya so; na ɔtte kyɛ ebiaa me ne me maen yɛbaabɔ nguro ɔ.

²⁰Na ɛhe ati yeɛ ɔmaa ndole me sa mvrɛle ɛmɔ kyɛ me ne ɛmɔ yɛbaali ngɔmɔ ɔ, ofikyɛ ɔnate Yisrael anyelasoɛ ti yeɛ bagua me ngɔnzɔngɔnzɔ ye.”

²¹Na besele ye kyɛ, “Yɛnnyane krataa biala bɔ ɔfa wɔ nwo yɛffili Yudea; asa koso aliɛmaa mɔ bɔ befi dɔ bɛba ne anu biala nne berɛ bɔ waabɔ amaneɛ, anaakyɛ waahã wɔ nwo dwirɛ tɛɛ ɔ.

²²Nakoso yɛpena kyɛ ekyire yɛ w’adwene, ɔnate kyɛ yɛse kyɛ nekaa biala mmenia dwudwo tia sɔ som he.”

²³Bɛ ne Pɔɔlo hyɛle kyẽa, na kyẽa ne dwuli ne, mmeni pee wale ye berɛ wɔ nekaa bɔ ɔte ne. Ɔhane Nyameɛ ahennie ne nwo dwirɛ, na ohyirehyirele nu hyirele bɛ. Na ɔfale Mose mmeraa ne ngɔmhyɛlɛfoɛ dwirɛ ne hyirele bɛ Yesu nwo dwirɛ tonn fite ngyerɛmɔ ma aleɛ dwole.

²⁴Bɛ nu biemɔ lele bɔ ɔhane ne lili, nakoso ebiemɔ de, banne banni.

²⁵Bɛ ne bɛ nwo anyɛ adwene; na anzana bɛbaafi berɛ bɛkɔ ne, Pɔɔlo ha hyirele bɛ kyɛ “Edwirɛ bɔ Sunzum Krongron ne nate ngɔmhyɛlɛniɛ Yesaya so ha hyirele ɛmɔ nana mɔ ne te nahorɛ turoloo!

²⁶ Ɔnwa: ‘Kɔhã kyire mmenia hemɔ kyɛ, Ye tielɛ de ɛmɔkotie, nakoso ɛmɔngɔte ye bo; ye nealɛ de ɛmɔkɔnea, nakoso ɛmɔngonwu ye.

²⁷Ofikyɛ maen he b’adwene ala, batuatua bɛ so, yeɛ bamuamua bɛ nye. Anyɛ a, né bɛ nye anwu nikye, né bɛ so ate dwirɛ, né b’adwene ate dwirɛ bo, ná basa bawa me berɛ maa masa bɛ anwonyerɛ.’ ”

²⁸ Afei Pɔɔlo dwurale ye dwirɛ ne kyɛ, “Mema ɛmɔnwu ye kyɛ bafa Nyameɛ ngoalelɛ nwo dwirɛ ne baama Amaenmaensofoɛ, na bekotie koso!” [

²⁹Na ɔhane sɔ dwirɛ nen, Yudafoɛ nemɔ fale aporowaasulɛ kyengyekyengye bedwɔso bɛhɔle.][30]

³⁰Afoɛ nyɔ mumua yeɛ Pɔɔlo tenane sua bɔ né ye bɔbɔ otua ye kerɛ nu ɔ, na berɛ yeɛ bɛ bɔ bɛɛsrale ye ne amukoraa bɛwale ɔ.

³¹Ɔhane Nyameɛ ahennie ne nwo dwirɛ; ɔyɛle ngyerɛkyerɛ fale Awurade Yesu Kristo nwo, na osili ye ahone yɔle sɔ nikyee ne bɔ ebiala anzi ye ate ɔ.