Read Sehwi Asomafoɛ 6 Bible Online

Asomafoɛ 6 - Sehwi bible

Asomafoɛ 6

¹ Na sɔ mmerɛ ne anu, bɔ né asuafoɛ nemɔ bɛ́kɔ so bɛ́sone pee ne, Helafoɛ nemɔ bɛyɛlɛ nwuhunwuhu betiale Hebrifoɛ nemɔ, ofikyɛ né bebu bɛ nye begua Helafoɛ akunafoɛ mmrasua mɔ so, sɛ ɔba daa biala nningyein hyɛlɛ nu a.

²Ye sɔ ati, asomafoɛ buru ne nyɔ nemɔ bɛfrɛle asuafoɛ kure ne maa beeyiale, na besele bɛ kyɛ, “Onhia kyɛ yɛyakyi Nyameɛ dwirɛ ne hanɛ yɛto berɛ, ná yɛfa aleɛhyɛlɛ yɛyɛ yɛ adwuma ɔ.

³ Yiti aliɛmaa mɔ, ɛmɔye ɛmɔ nu mmienzua nzoo bɔ ebiala bu bɛ, nworɛfoɛ bɔ Sunzum Krongron ayi bɛ tɛkyɛ, na yɛfa bɛ yɛsie sɔ adwuma he noa,

⁴na yɛ koso yanya mmerɛ yatu yɛ nwo yasie berɛ yama mbaeɛbɔlɛ ne nzɛmbahanɛ.”

⁵Asomafoɛ nemɔ nzusuleɛ ne yɛle agyidifoɛ ne amu fɛ, yiti bɛyele Setefano bɔ gyidie ne Sunzum Krongron ayi ye tɛkyɛ, Filipo, Prokoro, Nikanɔ, Timon, Pamena yeɛ Amaenmaensoniɛ Nikolao bɔ ofi Antiokia ná koso wasɔ Yudasom nu ɔ.

⁶ Bɛmaa beegyinane asomafoɛ ne nyunu berɛ, na bɛfale bɛ sa beguale bɛ so bɛbɔle mbaeɛ bɛmane bɛ.

⁷ Nyameɛ dwirɛ ne hɔle so trɛle; agyidifoɛ bɔ bɛwɔ Yerusalem yɛle pee; asa koso Yuda asɔfo pee bɛɛbokale agyidifoɛ nemɔ aso.

⁸Setefano bɔ adom ne tumi ayi ye tɛkyɛ ne yɔle nzɛngyerɛnneɛ ne anwanwadeɛ wɔ maen ne anu.

⁹Na mmenia bie bɔ banya fawɔnwodi bafi ngoaasolɛ nu, na bɛtaa bɛkɔ nyianu sua nu ne, bɛ ne ye amva anyeɛ. Sɔ mmenia ne te Yudafoɛ bɔ befi Kirene ne Aleksandria, na ebiemɔ koso te Yudafoɛ bɔ befi Kilikia ne Asia, na bɛhyɛle ye bo bɛ ne Setefano suli aporowaa.

¹⁰ Nakoso bangora bangyina nworɛ ne sunzum bɔ Setefano fa dwudwole ne noa.

¹¹ Yiti bɛpesa bewurale mmenia biemɔ noa maa bɛhane kyɛ, “Yɛtele kyɛ ɔkã musue dwirɛ otia Mose ne Nyameɛ ɔ.”

¹²Na besili maen ne ne maen mbanyi ne ahyerɛlɛfoɛ nemɔ adua, na bɛwale ye so bɛɛhyele ye, na bɛfale ye bɛhɔle badwa ne anyunu.

¹³ Na bɛmane adanzewiafoɛ beegyinane berɛ bɛhane kyɛ, “Sɔ biaa he, ɔnyakyi musue dwirɛ bɔ ɔkekã tia nekaa krongron he ne mmeraa ne;

¹⁴ofikyɛ yɛtele kyɛ ɔkã kyɛ sɔ Yesu ne bɔ ofi Nasarɛte ne, okodwiri ɛwa kogua, ná wasa wasesã amanneɛ bɔ Mose hyehyɛle mane yɛ ne!”

¹⁵Badwafoɛ ne amukoraa neane Setefano haa, na benwuni kyɛ ye nyunu ayɛ kyɛ abɔfo nyunu.