Read Sehwi Asomafoɛ 8 Bible Online

Asomafoɛ 8 - Sehwi bible

Asomafoɛ 8

¹ Sɔɔlo penene Setefano hunɛ ne aso. Na ofi sɔ kyẽa ne, bɛhyɛle ye bo kyɛ bɛtane asɔre ne nye anyeborolɛ so wɔ Yerusalem. Yiti agyidifoɛ nemɔ amukoraa bɛbɔle aya bɛhɔle Yudea ne Samaria mbɔtam, maa ɔhale asomafoɛ nemɔ ngome.

²Nyamesurofoɛ biemɔ hɔle bɛɛfale Setefano besiele ye, na besuni ye paa.

³ Nakoso Sɔɔlo de, ɔbɔle mmɔden ala kyɛ ɔkɔha asɔre ne; owurawurale awuro mɔ nu hyehyele agyidifoɛ mmienzua ne mmrasua maa bɛfale bɛ beguale kuku nu.

⁴Na agyidifoɛ bɔ bɛbɔle aya ne, behyinini bɛhane nzɛmba ne.

⁵Filipo hɔle Samaria kuro bie aso, na ɔhane Kristo nwo dwirɛ hyirele berɛ ama.

⁶Na ɛlɔen ne tele bɔ Filipo hane ne, ná benwuni nzɛngyerɛnneɛ bɔ ɔyɔle nen, bɛ mukoraa bɛyɛle adwene ko betiele ye,

⁷ofikyɛ sunzummɔne mɔ teateane nu serɛserɛ betutu befili mmeni pee nu, na mmubuafoɛ ne mbakye pee benyane ayaresa.

⁸Yiti kuro berɛ ama lili ahurusi piri paa.

⁹Né biaa bie bɔ bɛfrɛ ye Simɔn bɔ ɔte kuro berɛ ne wali moa wafa ngonyaa wanwunya Samariafoɛ nye so, na ɔyɛle ye nwo kyɛ sona bɔ odi mu wɔ berɛ.

¹⁰Na bɛ mukoraa betiele ye, ofi ngwadaa so kodwu mbanyi so, na bɛhane kyɛ: Biaa he ole Nyameɛ Tumi Piri ne.

¹¹Bɛyɛle asoɛ betiele ye paa, ɔnate kyɛ né wafa ye ngonyaa ne wanwunya bɛ nye so wahyɛ.

¹²Nakoso mmerɛ bɔ belele Filipo nzɛmba bɔ ɔfa Nyameɛ ahennie ne, ɔne Yesu Kristo dumaa nwo belili nen, mmienzua ne mmrasua maa bɛbɔle bɛ asu.

¹³Simɔn bɔbɔ po lele Yesu Kristo lili, na bɛbɔle ye asu beyiele ne, wande ye nwo wamvi Filipo nwo; na onwuni anwanwadeɛ ne nzɛngyerɛnneɛ bɔ né Filipo yɔ nen, ye nwo dwirili ye.

¹⁴Asomafoɛ bɔ né bɛwɔ Yerusalem ne, bɛtele kyɛ Samariafoɛ basɔ Nyameɛ dwirɛ ne anu nen, bɛsomane Petro ne Yohane maa bɛhɔle bɛ berɛ.

¹⁵Bedwuli berɛ ne, bɛbɔle mbaeɛ bɛmane agyidifoɛ ne kyɛ benya Sunzum Krongron ne.

¹⁶Ɔnate kyɛ né babɔ bɛ asu wɔ Awurade Yesu dumaa nu de, nakoso né Sunzum Krongron ne nnya ɔwwale bɛ so.

¹⁷Afei Petro ne Yohane fale bɛ sa guale bɛ so, na benyane Sunzum Krongron ne.

¹⁸Simɔn nwuni kyɛ asomafoɛ ne fa bɛ sa gua agyidifoɛ nemɔ so a benya Sunzum Krongron ne, yiti ɔmane Petro ne Yohane sikaa,

¹⁹na ɔhane kyɛ, “Ɛ́mɔma me koso tumi he bie, amaa sona biala bɔ ngɔfa me sa ngogua ye so ne wanya Sunzum Krongron ne.”

²⁰Na Petro buale ye kyɛ, “Abue bu wɔ ne wɔ sikaa ne, ofikyɛ ɛdwene kyɛ ɛkɔhora kɔfa sikaa kɔtɔ Nyameɛ akyɛdeɛ ne!

²¹ Yɛ dwumadie ne ɛbboka so, yeɛ elle kyɛfa biala koso wɔ nu, ɔnate kyɛ wɔ nzusuleɛ ndengyɛ wɔ Nyameɛ nyunu.

²²Yiti sakyera w’adwene fi wɔ bɔne he nwo, na srɛ Awurade kyɛ sɛ ɔkɔyɛ yee a, ɔfa wɔ nzusuleɛ tɛɛ he hyɛ wɔ.

²³ Ofikyɛ manwu kyɛ wɔ nye boro nikyee paa, na ɛte bɔne akoaa.”

²⁴Na Simɔn sele Petro ne Yohane kyɛ, “Mepa ɛmɔ kyerɛ, ɛmɔbɔ mbaeɛ bɛsrɛ Awurade bɛma me, na bɔ ɛmɔaha ye anu biala ando me.”

²⁵Na belili adanzeɛ ná bɛhane Awurade dwirɛ ne nen, besa bɛhɔle Yerusalem. Na békɔ nen, bɛhane nzɛmba ne wɔ Samaria nguraa pee nu.

²⁶Na Awurade abɔfo sele Filipo kyɛ, “Dwɔso ná fa ngwaen dɔ atee bɔ ofi Yerusalem ɔtoro kɔ Gasa ne aso.” Ɛhe te ɛserɛ so atee.

²⁷Na odwɔso hɔle. Na onwuni Yitiopianiɛ bie, bɔ ɔte Yitiopia hemmaa Kandake ye sayɛɛ titire, bɔ ɔnea ye fotoɛ amukoraa so ɔ; bɔ ɔwale Yerusalem ɔɔsɔnene ɔ.

²⁸Né ɔte ye teaseɛnam nu osa kɔ, na né ɔ́kenga ngɔmhyɛlɛniɛ Yesaya nwomaa ne.

²⁹Na Sunzum ne sele Filipo kyɛ, “Kɔ teaseɛnam ne anwo berɛ!”

³⁰Yiti Filipo tuli amirika hɔle ye nwo berɛ, ɔtele kyɛ ɔ́kenga ngɔmhyɛlɛniɛ Yesaya nwomaa ne, na obisale ye kyɛ, “Aso ɛte bɔ ɛ́kenga ye bo?”

³¹Na obuale ye kyɛ, “Ngɔyɛ sɛɛ né mate ye bo, sana ebie kyirekyire me nu.” Na ɔsrɛle Filipo kyɛ ɔɔfo tena ye teaseɛnam ne anu bie.

³² Né ɔkenga Ahyerɛlɛ ne anu dwirɛ he: “Bɛfale ye bɛhɔle kyɛ boaen bɔ bɛ́fa ye bɛkɔ akumyɛɛ ɔ, anaakyɛ boaen ba bɔ watɔ mumu wɔ sona bɔ ɔpepɛ ye nwiaa nyunu ɔ, wammukye ye noa.

³³Beguale ye nyunu ase, na bebuale ye ndɛengyea. Nwa yeɛ ɔkɔhora kohyire ye boso ama ɔ, ɔnate kyɛ bapɛ ye ngoa so bafi aseɛ so.”

³⁴Na sayɛɛ ne bisale Filipo kyɛ, “Mepa wɔ kyerɛ, nwa nwo dwirɛ yeɛ ngɔmhyɛlɛniɛ ne ɔkã ne? Ye bɔbɔ ye nwo, anaakyɛ ebie nwo ɔ?”

³⁵Na Filipo dwudwole, na ɔhyɛle ye bo fale Ahyerɛlɛ he anu dwirɛ hane Yesu nwo nzɛmba ne hyirele ye.

³⁶Na bɛwɔ atee so bɛ́kɔ nen, bedwuli nekaa bie bɔ nzue wɔ ɔ; na sayɛɛ ne sele kyɛ, “Nea, nzue ɛhe! Nzikyɛ yeɛ osi m’asubɔlɛ nwo ate ɔ?”

³⁷[Na Filipo buale kyɛ, “Sɛ ede di bɔkɔɔ wɔ w’ahone nu de a, bɛbɔ wɔ asu a ɔyɛ yee.” Na ye koso obuale ye kyɛ, “Mede medi kyɛ Yesu Kristo ole Nyameɛ Awa ne.”][5]

³⁸Na ɔmane teaseɛnam ne gyinane, na bɛ munyɔ bedwu bɛhɔle nzue ne anu, Filipo ne sayɛɛ ne, na ɔbɔle ye asu.

³⁹Na befili nzue ne anu befitele nen, Awurade Sunzum hwimini Filipo hɔle, na sayɛɛ ne annwu ye ko, nakoso ɔfale anigye toale ye ateetulɛ ne aso.

⁴⁰Na Filipo de, oofitele Asoto, na ɔpɛ nu kɔ nen, ɔhane nzɛmba ne wɔ nguro ne amukoraati so tonn oodwuli Kaesarea.