Read Sehwi Asomafoɛ 9 Bible Online

Asomafoɛ 9 - Sehwi bible

Asomafoɛ 9

¹Sɔ mmerɛ ne, né adwene biala nne Sɔɔlo ti anu te kyɛ anwunanwuna ne kodiawu adwene bɔ ɔfa ko tia Awurade asuafoɛ nemɔ ɔ. Yiti ɔhɔle ɔsɔfo panyi paa ne berɛ

²ɔɔsrɛle ye berɛ tumi krataa, bɔ ɔkɔfa kɔhɔ Damasko nyianu sua nemɔ nu, kyɛbɔ ɔkɔyɛ na onwu ebiala bɔ ɔnate Awurade nwo gyidie atee so a, bienzua oo, brasua oo, wahora wahye ye, ná wafa ye wawa Yerusalem.

³Ɔpene atee so, ná ɔhale kãa maa odwu Damasko nen, mvum nu, kanea bie fili nyameɛso tale brale ye nwo yiale.

⁴Ɔpɛ fini, na ɔtele edwudwolɛ bie kyɛ, “Sɔɔlo, Sɔɔlo! Nzu ati yeɛ ɛtane me nye ye?”

⁵Na obuale kyɛ, “Wɔ nwa ɛne, Awurade?” Na osele kyɛ, “Me ole Yesu bɔ ɛtane ye nye ne, [ɔyɛ se kyɛ ekotu wɔ gya kɔfa kɔwɔ nandwiehanɛniɛ ye pɔmaa noa buralɛ ɔ],

⁶nakoso dwɔso ná kɔ kuro ne anu dɔ, na bɛkɔhã bɔ ɔsɛ kyɛ ɛyɔ ɔ bekohyire wɔ.”

⁷Mmenia bɔ né bɛ ne Sɔɔlo tu atee ne gyinane, bɛtotɔle mmobo; ofikyɛ bɛtele edwudwolɛ ne de, nakoso bannwu sona biala.

⁸Sɔɔlo fili aseɛnwo berɛ dwɔsole, ɔtetele ye nye, nakoso né onnwu ase. Yiti bɛsosɔle ye sa bɛ ne ye hɔle Damasko.

⁹Ngyẽa ɛlɛsa, né onnwu hwee, né onnidi ná ɔnno hwee.

¹⁰Né gyidiniɛ bie bɔ bɛfrɛ ye Anania wɔ Damasko. Né Awurade aha ahyire ye wɔ nyekyire nu kyɛ, “Anania!” Na obuale kyɛ, “Me ɛhe, Awurade.”

¹¹Na Awurade sele ye kyɛ, “Dwɔso kɔ borɔnoɛ bie bɔ bɛfrɛ ye ‘Turoloo’ ne aso, na kɔ Yudase awuro kɔpena biaa bie bɔ bɛfrɛ ye Sɔɔlo bɔ ofi Taaso. Sɔ Sɔɔlo ne gu so ɔbɔ mbaeɛ,

¹²na wanwu biaa bie bɔ bɛfrɛ ye Anania wɔ nyekyire nu kyɛ ɔ́ba ye berɛ bafa ye sa gua ye so maa osa nwu nikye.”

¹³Na Anania buale kyɛ, “Awurade, mmeni pee bahã biaa he nwo dwirɛ, ɔne bɔne worawora bɔ wafa wali w’anwoteefoɛ wɔ Yerusalem ɔ bahyire me.

¹⁴Afei koso wale tumi wafi asɔfo mbanyi nemɔ berɛ, na wawa wa kyɛ ɔbaahye ebiala bɔ ɔbɔ wɔ dumaa ɔ.”

¹⁵Na Awurade sele ye kyɛ, “Wɔ de, kɔ, ofikyɛ maye ye kyɛ ɔso me, ná ɔbɔ me dumaa nwo dawure hyire Amaenmaensofoɛ ne ahemvo ne Yisrael mma.

¹⁶Na ngohyire ye amaneɛ bɔ me dumaa ti odi kyɛ onwu ye ɔ.”

¹⁷Yiti Anania sili nu hɔle. Owurale awuro ne anu, ɔfale ye sa guale ye so, na ɔhane kyɛ, “Aliɛmaa Sɔɔlo, Awurade Yesu bɔ ɔyele ye nwo ali hyirele wɔ wɔ atee bɔ efi so wale ne aso ne, wasoma me wɔ wɔ berɛ, kyɛ esa nwu nikye, ná Sunzum Krongron oyi wɔ tɛkyɛ.”

¹⁸Berɛ ne ala, nikyee bie bɔ ɔte kyɛ tiré si boen fili Sɔɔlo nye so tutu guale ase, na osa nwuni nikye; na odwɔsole maa bɛbɔle ye asu.

¹⁹Afei odidili, na ye nwo yɛle ye se, na olili agyidifoɛ nemɔ nwo berɛ ngyẽa pee wɔ Damasko.

²⁰ Ɔhɔle nyianu sua nemɔ nu berɛ ne ala, ɔɔhane Yesu nwo dwirɛ kyɛ ye ole Nyameɛ Awa ne.

²¹Ɔyɛle bɛ bɔ bɛtele ye dwirɛ ne amu nwanwa, na bebisale kyɛ, “Aso nna biaa he yeɛ Yerusalem ohuhuni mmenia bɔ bɛbɔ Yesu dumaa ne? Aso nna ɛhe ati yeɛ wawa wa ɔ, kyɛ ɔbaahyehye agyidifoɛ ne fa bɛ kɔma asɔfo mbanyi nemɔ ɔ?”

²²Nakoso Sɔɔlo hɔle so nyane anwoserɛ wɔ ye nzɛmbahanɛ nu. Ye adanzeɛ bɔ olili kyɛ Yesu ole Kristo ne lale berɛ turoloo bɔ aporowaa biala nne ye nwo ɔ. Na Yudafoɛ bɔ bɛwɔ Damasko ne annya edwirɛ biala ko bɔ bɛha bɛfa bebua ye ɔ.

²³ Ngyẽa kãa asi ne, Yudafoɛ ne yiale, na bɛbɔle Sɔɔlo ti so porɛ kyɛ bekohu ye,

²⁴nakoso ɔtele bɛ porɛ ne nwo bie. Bɛbɔle kuro n’anoa nemɔ nwo nzra eyia ne kɔngɔen kyɛ bɛ sa kɔha ye na bahu ye ɔ.

²⁵Nakoso Sɔɔlo asuafoɛ nemɔ fale ye besiele kɛndɛenmboho bie nu ɛlɛho bie kɔngɔen, na bedwurale ye bɛfale fasue ne aso.

²⁶Sɔɔlo hɔle Yerusalem, na ɔyɛle kyɛ ɔfa ye nwo bɔ asuafoɛ nemɔ, nakoso bɛ mukoraa besurole ye, ofikyɛ banne ye banni kyɛ ɔte suaniɛ.

²⁷Nakoso Banaba fale ye hɔle asomafoɛ nemɔ berɛ, na ɔmaa benwuni kyɛbɔ Sɔɔlo si nwuni Awurade wɔ atunu, ɔne kyɛ odwudwo hyirele ye ɔ, ɔne kyɛbɔ osili ye ahone hane nzɛmba ne wɔ Yesu dumaa nu wɔ Damasko ɔ.

²⁸Afei Sɔɔlo ne asomafoɛ nemɔ bɛtenane, ɔne bɛ hyinini Yerusalem, na osili ye ahone hane nzɛmba ne wɔ Awurade dumaa nu.

²⁹Asa koso, ɔhane bie hyirele Yudafoɛ bɔ bɛkã Hela dwudwolɛ; ɔne bɛ suli aporowaa, na bɛyɛle kyɛ bekohũ ye.

³⁰Mmerɛ bɔ agyidifoɛ nemɔ tele sɔ dwirɛ nen, bɛfale Sɔɔlo bɛhɔle Kaesarea, na bɛmaa ɔhɔle Taaso.

³¹Yiti asɔre nemɔ bɔ bɛwɔ Yudea ne Galilea ne Samaria mukoraa benyane asomdwee, na benyini nyamesom nu. Na bɛnate Awurade surolɛ ne Sunzum Krongron aworakyekyerɛ nu bɛsone pee.

³²Na ɔwale kyɛ Petro hyinini bɛ mukoraa bɛ so, na ɔɔsrale anwoteefoɛ bɔ bɛwɔ Lida ne koso.

³³Berɛ yeɛ oonwuni bubuaniɛ biaa bie bɔ bɛfrɛ ye Yinea bɔ wali bɛen so afoɛ mmɔtwɛ ɔ.

³⁴Na Petro sele ye kyɛ, “Yinea, Yesu Kristo ama wɔ nwo asa; dwɔso na bobɔ wɔ bɛen ne.” Na berɛ ne ala Yinea dwɔsole.

³⁵Na Lidafoɛ ne bɛ bɔ bɛwɔ Saron mboanoa nwuni biaa ne, na bɛfale bɛ nwo bɛmane Awurade.

³⁶Né gyidiniɛ braa bie bɔ bɛfrɛ ye Tabita wɔ Yopa. (Hela dwudwolɛ nu, Tabita bo kyire Dɔkase, bɔ ye koso ye bo kyire wanzane). Braa he fale paayɛlɛ ne ehiafoɛ adɔeɛyɛlɛ yɛle ye adwuma.

³⁷Sɔ mmerɛ ne anu anwonyerɛ bɔle ye, na owuli. Bebiale ye, na bɛdedale ye wɔ sua bie anu wɔ aborɔsaen so.

³⁸Yopa ne Lida anwa biala. Yiti mmerɛ bɔ Yopa agyidifoɛ tele kyɛ Petro wɔ Lida nen, bɛsomane mmenia nyɔ maa beesele ye kyɛ, “Yɛsrɛ wɔ, ma wɔ nwo yɛ nyera ná bra yɛ wa.”

³⁹Yiti Petro dwɔsole, na ɔne bɛ hɔle. Oodwuli berɛ, na bɛne ye hɔle aborɔsaen ne aso. Yeɛ akunafoɛ mmrasua ne amukoraa beegyinagyinane ye nwo berɛ bɔ né besũ ɔ, na bɛfale ndaadeɛ ne ndena bɔ Dɔkase pombale wɔ mmerɛ bɔ né ɔne bɛ wɔ berɛ ne behyirele ye.

⁴⁰Na Petro mane bɛ mukoraa befitele, oguale ndwerɛ bɔle mbaeɛ, ɔkakyili ye nye hɔle efuin ne anwo na ɔhane kyɛ, “Tabita, dwɔso!” Ɔtetele ye nye, na onwuni Petro nen, odwɔsole tenane berɛ.

⁴¹Petro sɔle ye sa maa odwɔso gyinane berɛ. Na ɔfrɛle agyidifoɛ nemɔ, akunafoɛ mmrasua nemɔ koso boka so, na ɔfale bɔ wawu watingye ne mane bɛ.

⁴²Edwirɛ he tenele Yopa mukoraa, na mmeni pee lele Awurade lili.

⁴³Na Petro tenane Yopa lili ngyẽa pee wɔ Simɔn bie bɔ owura naen nwomaa ayire ɔ ye awuro.