Read Sehwi Romanfoɛ 1 Bible Online

Romanfoɛ 1 - Sehwi bible

Romanfoɛ 1

¹ Pɔɔlo, Yesu Kristo akoaa, bɔ bafrɛ me kyɛ mmanyɛ somafoɛ, ná batu me basie berɛ bama Nyameɛ nzɛmba ne,

² bɔ ɔnate ye ngɔmhyɛlɛfoɛ so hyɛle ye nwo bɔ tole berɛ wɔ Ahyerɛlɛ Krongron ne anu,

³ nzɛmba ne bɔ ɔfa Ɔwa Yesu Kristo bɔ ɔte y’Awurade ne, bɔ anwoɔnaen nu de, ɔte Dawide bosoniɛ ne nwo;

⁴ bɔ bafa tumi baye ye bahyire kyɛ Nyameɛ Awa, kyɛbɔ anwotelɛ Sunzum te ne, awufoɛ tingyelɛ nu, Yesu Kristo, yɛ Awurade,

⁵ bɔ ɔnate ye so yeɛ yanya adom ne asomafoɛ adwuma bɔ yɛfa yɛma amaen maen mukoraa bɛyɛ sotie wɔ gyidie ne dumaa ne anwo,

⁶bɔ ɛmɔ bɔ bafrɛ ɛmɔ kyɛ ɛmɔɔyɛ Yesu Kristo deɛ ne koso ɛmɔboka so ɔ.

⁷ Mekyerɛ mebrɛ ɛmɔ amukoraa bɔ Nyameɛ kuro ɛmɔ dwirɛ bɔ ɛmɔwɔ Rome, bɔ wafrɛ ɛmɔ kyɛ ɛmɔɔyɛ anwoteefoɛ ɔ. Adom ne asomdwee bɔ ofi yɛ Baba Nyameɛ ne Awurade Yesu Kristo berɛ ɔyɛ ɛmɔ deɛ.

⁸ Bɔ oli moa ɔ, ɔnate ɛmɔ amukoraa ti mefa Yesu Kristo so meda me Nyameɛ ase, ofikyɛ ɛmɔ gyidie ne nwo dwirɛ adwu wiase nekaa biala.

⁹ Nyameɛ bɔ meso ye sunzum nu, ná mebɔ Ɔwa ne nzɛmba ne dawure ne, odi me adanzeɛ kyɛ nnyakyili ɛmɔ dumaa bɔlɛ le wɔ me mbaeɛbɔlɛ nu.

¹⁰ Mesrɛ Nyameɛ daa kyɛ ɔyɛ ye pɛ kyɛ ɔkɔma me ate maa ngɔɔpasa ɛmɔ ɔ.

¹¹ Ofikyɛ me wora dɔ ɛmɔ, kyɛ ngɔfa sunzum nu akyɛdeɛ ngɔbrɛ ɛmɔ, ná wahyɛ ɛmɔ nguraen;

¹²mekyire kyɛ, ɔnate ɛmɔ gyidie ne me deɛ so, yɛ mukoraa yɛkonya aworakyekyerɛ wɔ yɛ nu.

¹³ Aliɛmaa mɔ, mekuro kyɛ ɛmɔnwu ye kyɛ, mmerɛ pee yeɛ mayɛ m’adwene kyɛ ngɔɔpasa ɛmɔ nwo ɔ, amaa me nzɛmbahanɛ ne asakyera ɛmɔ nu bie, kyɛbɔ wayɛ wama Amaenmaensofoɛ ngaa nen, nakoso ɔyɛ a né nikyee foforɛ bie asi m’ate.

¹⁴Ofikyɛ ɔte asodie ma me kyɛ mebɔ nzɛmba ne dawure mekyire Helafoɛ ne Pɔtɔfoɛ, nimdeɛfoɛ ne bɛ bɔ belle nimdeɛ ɔ.

¹⁵Ɛhe ati yeɛ mepere kyɛ ngɔhã nzɛmba ne ngohyire ɛmɔ bɔ ɛmɔwɔ Rome ne koso ɔ.

¹⁶ Na nzɛmba ne nwo nyɛ me nya, ofikyɛ ɔte Nyameɛ tumi bɔ ɔkɔ ngoalelɛ nu ma bɛ bɔ bede bedi amukoraa, Yudafoɛ yeɛ beli moa ɔ, yeɛ Amaenmaensofoɛ koso bɛtoa berɛ ɔ.

¹⁷ Ofikyɛ nzɛmba ne kyire kyɛ, Nyameɛ siesie kuro sona ne ye afia maa bɛyɛ ko: na ɛhe gyi gyidie ngome so. Kyɛbɔ bahyerɛ kyɛ, “Teneneeniɛ de, ɔnate ye gyidie so yeɛ okonya ngoa ɔ.”

¹⁸ Na bɛda Nyameɛ ahonehulɛ ne ali befi nyameɛso bɛfa betia mmenia bɔ benzuro Nyameɛ ná bɛ yɔleɛ ndengyɛ, bɔ bɛfa b’amumuyɛɛ so besi nahorɛ ne nwo atee ɔ.

¹⁹ Ɔnate kyɛ nikyee biala bɔ ɔsɛ kyɛ benwu ye fa Nyameɛ nwo ne, wala ye ali pefee wahyire bɛ.

²⁰ Ofi mmerɛ bɔ Nyameɛ bɔle wiase ɔ, ye tumi afebɔɔ ne ɔne ye Nyameɛ sue te nikyee bɔ yɛmva yɛ nye nnwu ye ɔ, nakoso waye bɛ ali wahyire yɛ wɔ ye abɔdeɛ nu, yiti belle nyeanoɛ biala.

²¹ Né bɛse Nyameɛ de, nakoso banhyɛ ye animnyam kyɛ Nyameɛ, banna ye ase, na mmom b’adwene yɛle ngwaseaa adwene, na bɛ ti anu adwene yɛle awosii.

²² Bɛdwenene kyɛ bɛse nworɛ, nakoso bɛte ngwaseafoɛ.

²³ Bɛfale Nyameɛ bɔ onwu ɔ n’animnyam bɛsesane honi mɔ bɔ bɛte kyɛ kuro sona bɔ owu ɔ, ɔne nnomaa ne ndɔteboa ne ngaka bɔ bɛtwe bɛ nwo ase ɔ.

²⁴ Yiti Nyameɛ pole b’akɔnnɔ fiɛ bra ne mane bɛ maa beguaguale bɛ nwo bɛ nwo nipadua nwo fiɛ.

²⁵ Ofikyɛ nahorɛ bɔ ɔfa Nyameɛ nwo ne bɛfa bɛsesane ngondombo. Bɛsɔnene na bɛsole abɔdeɛ, na bɛyakyili Ɛdangama Nyameɛ bɔ saleɛ te ye deɛ afebɔɔ ne! Amen.

²⁶ Ɔnate sɔ ati, Nyameɛ pole b’animguaseɛ akɔnnɔ bra ne mane bɛ. Bɛ mmrasua mɔ ne bɛ mmango mmrasua bɛlelale bɔ otia abɔdeɛ nu nhyehyɛleɛ ɔ.

²⁷ Sɔ ala yeɛ mmienzua yakyili kyɛ bɛ ne mmrasua kɔla ɔ, na bɛsosɔle kyɛ kyea bɛmane bɛ nwo. Mmienzua ne mmienzua beguaguale bɛ nwo fiɛ, na bɛ sa hane bɛ bɔne ne nwo akatuaa bɔ ɔfata ɔ.

²⁸Bɛpole kyɛ bekonwu Nyameɛ nwo nimdeɛ, yiti Nyameɛ pole bɛ bɔbɔ b’adwene fiɛ ne mane bɛ, maa bɛyɔle nningyein bɔ ɔmvata ɔ.

²⁹ Sɔ bɔne hemɔ ayi bɛ ti anu tɛkyɛ, amumuyɛɛ, aborɛ, anyeboroborolɛ, ɛpɔen, anyeborolɛ, awuelilɛ, patapaa, nnakannaka, kanda, nzekure;

³⁰ koowaabɔlɛ, bɛpɔ Nyameɛ, nduhoɛ, soentolɛ, anyeserɛ, anwokyerɛ, awofoɛ so asoserɛ, ɔne

³¹ ngwaseasɛm; belle gyidie, atianuserɛ, bɛnze anwumvoin.

³² Bɛse Nyameɛ mmeraa ne kyɛ bɛ bɔ bɛyɔ sɔ nningyein nemɔ ne, ewue yeɛ ɔfata bɛ ɔ. Nna kyɛ bɛyɔ sɔ nningyein hemɔ angome, na mmom bɛhyɛ bɛ bɔ bɛyɔ sɔ ne nguraen.