Read Sehwi Romanfoɛ 10 Bible Online

Romanfoɛ 10 - Sehwi bible

Romanfoɛ 10

¹Nniɛma mɔ, m’ahone nu dwirɛ ne me mbaeɛ bɔ mebɔ mekyire Nyameɛ mema Yisrael ole kyɛ bekonya daa ngoa ɔ.

²Medi bɛ nwo adanzeɛ kyɛ bele Nyameɛ nwo dɔ; nakoso bɛ mmɔdenbɔlɛ ne oggyi nahorɛ nimdeɛ so.

³Ofikyɛ bɛnze atee bɔ Nyameɛ fa so siesie ye ne mmenia b’afia ɔ, na mmom bɛyɛle kyɛ bɛkɔfa bɛ bɔbɔ bɛ tenenee atee so; yiti bammrɛ bɛ nwo ase bamma Nyameɛ atee bɔ ɔfa so yɛ kuro sona teneneeniɛ ne.

⁴ Na ɔnate kyɛ Kristo di mu tra mmeraa ne ati, amaa ɔnate so ebiala bɔ ode di ne babua ye be.

⁵ Mose hyerɛle fale tenenee bɔ ebie di mmeraa ne aso a ɔyɛ ne nwo kyɛ, “Sona bɔ odi mmeraa n’ahyɛdeɛ so ne, ɔkɔfa so konya nu ngoa.”

⁶ Na tenenee bɔ ogyi gyidie so ne, ɔkã kyɛ, “Nnɛkã ye wɔ w’ahone nu kyɛ, nwa yeɛ ɔkɔfo kɔhɔ nyameɛso ɔ?” (Mekyire bɔ ɔkwaafa Kristo dwu ba ase ɔ);

⁷ anaakyɛ, “Nwa yeɛ okodwu kɔhɔ kumaa kuronguronn ne anu ɔ?” (Mekyire bɔ ɔkwaafa Kristo fi awufoɛ nu dɔ ba ɔ).

⁸ Nzikyɛ yeɛ Ahyerɛlɛ ne ɔkã ɔ? “Edwirɛ ne apingye wɔ, ɔwɔ wɔ noa ne w’ahone nu,” (ye ole gyidie dwirɛ bɔ yɛbɔ ye dawure ne).

⁹ Ofikyɛ sɛ ɛfa wɔ noa kã ye pefee kyɛ Yesu te Awurade, ná ede di wɔ w’ahone nu kyɛ Nyameɛ atingye ye afi awufoɛ nu a, ekonya daa ngoa.

¹⁰Ɔnate kyɛ, sona fa ye ahone yeɛ ode di ɔkɔ tenenee nu ɔ; na ye noa yeɛ ɔfa kã ye pefee onya daa ngoa ɔ.

¹¹ Na Ahyerɛlɛ ne kã kyɛ, “Ebiala bɔ ode ye di ne, ye nyunu ngogua ase.”

¹² Ofikyɛ nzonzoleɛ biala nne Yudaniɛ ne Helaniɛ nu; Awurade komapɛ ne ala yeɛ ɔte bɛ mukoraa bɛ Mene ɔ, na oyira ebiala bɔ osũ frɛ ye ɔ.

¹³ Ofikyɛ ebiala bɔ ɔbɔ Awurade dumaa ne, okonya ngoa.

¹⁴Na ɔkɔyɛ sɛɛ ná mmenia basu bafrɛ ye wɔ abrɛ bɔ benne ye benni ɔ? Na ɔkɔyɛ sɛɛ ná bale bɔ bɛttele ye nwo dwirɛ le ɔ bali? Na ɔkɔyɛ sɛɛ ná bate, wɔ abrɛ bɔ nzɛmbahanɛniɛ nne berɛ ɔ?

¹⁵ Na sɛ banzoma mmenia a, ɔkɔyɛ sɛɛ ná babɔ edwirɛ ne dawure? Kyɛbɔ bahyerɛ ye kyɛ, “Bɛ bɔ bɛso ndɛenvɛen bɛnate ne, kyɛbɔ bɛ gya bo osi yɛ nyemene ɔ!”

¹⁶ Nakoso nna bɛ mukoraa yeɛ bayɛ sotie bama nzɛmba ne ɔ. Ofikyɛ Yesaya kã kyɛ, “Awurade, nwa yeɛ wale yɛ noa dwirɛ ne wali ɔ?”

¹⁷ Né nzaade, gyidie nate edwirɛ ne tielɛ nu yeɛ ɔba ɔ, na bɔ bɛte ne, ɔnate Kristo dwirɛ ne aso yeɛ ɔba ɔ.[2]

¹⁸ Nakoso mebisa kyɛ, bennya bɛttele anaa? Amba, bate, ofikyɛ, “Bɛ komvi adwu aseɛ so nekaa biala, na bɛ dwirɛ adwu wiase nekaa biala.”

¹⁹ Mesa mebisa kyɛ, yiti Yisrael ande edwirɛ ne bo anaa? Mose lili moa hane kyɛ, “Ngɔma ɛmɔ nye kɔboro mmenia bɔ bɛ de nna me maen ahɔ ɔ; na ngɔfa maen bɔ b’adwene te nganga ɔ ngohu ɛmɔ ahone.”

²⁰ Afei Yesaya sili ye ahone hane kyɛ, “Bɛ bɔ bambena me si atee ne, banwu me, na maye me nwo ali mahyire bɛ bɔ bammisa me boso ɔ.”

²¹ Na ɔfa Yisrael nwo de, ɔhane kyɛ, “Alehyeleɛ biala, matrɛ me sa nu kyɛ ngole asoserɛfoɛ mmenia bɔ bayɛ me so lɔen ɔ.”