Read Sehwi Romanfoɛ 12 Bible Online

Romanfoɛ 12 - Sehwi bible

Romanfoɛ 12

¹ Yiti aliɛmaa mɔ, ngyi Nyameɛ anwumvoinnwunɛ so mesrɛ ɛmɔ, kyɛ ɛ́mɔtu ɛmɔ nipadua bésie berɛ kyɛ afɔleɛ bɔ ɔte ase ɔ, bɔ ɔte krongron ná ɔsɔ Nyameɛ nye ɔ, na ɛhe yeɛ ɔte ɛmɔ nyamesom bɔ ɔfata ɔ.

² Nnɛma ɛmɔyɛ ɛmɔ nwo kyɛ wiase he, na mmom ɛ́mɔma ɛmɔ adwene nu foforɛyɛlɛ ne ɔsakyera ɛmɔ, amaa ɔnate so ɛmɔanwu bɔ ɔte Nyameɛ apɛdeɛ ɔ, bɔ ɔte paa, ɔsɔ anyeɛ ná odi mu ɔ.

³ Ɔnate adom akyɛdeɛ bɔ wafa wama me ne ati, mekã mekyire ɛmɔ kyɛ nnɛma ɛmɔ nu biala bu ye nwo kyɛ odi mu tra kyɛbɔ ɔte ɔ. Na mmom ɛmɔdwene anwobrɛaseɛ adwene kyɛbɔ Nyameɛ gyidie bɔ wafa wama ebiala ne si te ɔ.

⁴ Na kyɛbɔ yɛle akwaa pee wɔ nipadua ko nu, ná nzonzoleɛ wɔ akwaa nemɔ amukoraa b’adwuma nu ne,

⁵ sɔ ala yeɛ yɛ koso bɔ yɛsone ne, yɛte nipadua komapɛ wɔ Kristo nu ɔ. Ebiala te sonongo de, nakoso yɛ mukoraa yatoatoa nu yayɛ nipadua ko.

⁶ Yiti ɛ́mɔma yɛfa yɛ adom akyɛdeɛ ahoroɔ ne yɛyɛ adwuma kyɛbɔ Nyameɛ alo yɛ ɔ. Sɛ ɔte ngɔmhyɛlɛ a, ɛmɔma yɛhyɛ ngɔm kyɛbɔ yɛ gyidie te ɔ;

⁷sɛ ɔte ɛsolɛ a, ɛmɔma yɛso; sɛ ɔte ngyerɛkyerɛ a, ɛmɔma yɛhyirehyire;

⁸sɛ ɔte nguraenhyɛlɛ a, ɛmɔma yɛhyɛ. Sɛ ebie yɛ adɔeɛ a, maa ɔye ye kunu ɔyɛ; ebiala bɔ ɔnea mmenia so ne, maa ɔyere ye nwo; na bɔ ɔse anwumvoin ne, maa ɔte ye nyunu yɔ.

⁹ Ɛ́mɔma ɛmɔ ɔdɔ ɔyɛ kaenn; ɛ́mɔhyi bɔne, ná ɛ́mɔtira bɔ ɔte paa ɔ nu serɛserɛ.

¹⁰Ɛmɔhurohuro ɛmɔ nwo dwirɛ kyɛ aliɛmaa mɔ, ná ɛ́mɔli moa bɛ́fa anidie bɛ́moma bɛ nwo bɛ nwo.

¹¹Nnɛmɔma ɛmɔ mmɔdenbɔlɛ ɔkɔ ase, ɛ́mɔyɛ hye wɔ sunzum nu, ná ɛ́mɔso Awurade.

¹² Ɛ́mɔnya anigye wɔ anyelasoɛ nu, ɛ́mɔnya aboterɛ wɔ amaneɛnwunɛ nu, ná ɛmɔhɔ so bɛbɔ mbaeɛ daa.

¹³Ɛ́mɔboka anwoteefoɛ wɔ bɔ ohia bɛ ɔ nwo, ná ɛ́mɔbɔ mmɔden wɔ ɛwɔfoɛsolɛ nwo.

¹⁴Ɛ́mɔyirayira bɛ bɔ bɛtane ɛmɔ nye ɔ, ɛ́mɔyirayira bɛ, na nnɛma ɛmɔnoma bɛ.

¹⁵Ɛmɔ ne bɛ bɔ bɛ nye aha ne nye ha, na ɛmɔ ne bɛ bɔ besu ne besu.

¹⁶ Ɛmɔ amukoraa bɛ́yɛ adwene ko; na nnɛma ɛmɔmoma ɛmɔ nwo so, na mmom ɛ́mɔbrɛ ɛmɔ nwo ase. Nnɛma ɛmɔbu ɛmɔ nwo nworɛfoɛ.

¹⁷Nnɛma ɛmɔfa bɔne betua ebiala bɔne kerɛ. Na mmom ɛ́mɔdwene bɔ ɔte paa wɔ mmenia mukoraa bɛ nye so ɔ nwo.

¹⁸Sɛ ɛmɔkɔhora a, ɛmɔ bue nu de, ɛmɔ ne ebiala bɛ́tena asomdwee nu.

¹⁹ Aliɛmaa mɔ, nnɛma ɛmɔtotɔ ɛmɔ nwo wereɛ, na mmom ɛ́mɔyakyi bɛ́ma Nyameɛ ahonehulɛ ne. Ofikyɛ bahyerɛ kyɛ, “Wereɛtɔlɛ te me deɛ, na ngotua so kerɛ, Awurade noa dwirɛ ɛne.”

²⁰ Yiti sɛ ɛhɔen ku wɔ pɔfoɛ a, ma ye nikyee ma oli; yeɛ sɛ nzuhɔen ku ye a, ma ye nzue ma ɔno; ofikyɛ sɛ ɛyɔ sɔ a, ɛkɔboaboa see nzramaa noa ekogua ye ti afia.

²¹Nnɛma bɔne di wɔ so ngonim, na mmom fa paa di bɔne so ngonim.