Read Sehwi Romanfoɛ 16 Bible Online

Romanfoɛ 16 - Sehwi bible

Romanfoɛ 16

¹Medi y’eliɛma brasua Fobi bɔ ɔte asɔre somvoɛ wɔ Kɛnkrea ne mekyire ɛmɔ,

²kyɛ ɛ́mɔle ye bɛto nu wɔ Awurade nu, kyɛbɔ ɔsɛ kyɛ anwoteefoɛ bɛyɔ ɔ. Afei ɛ́mɔfa mmokalɛ biala bɔ ohia fi ɛmɔ berɛ bɛboka ye; ofikyɛ ɔte sona bɔ waboka mmeni pee ne me bɔbɔ koso.

³ Ɛ́mɔbisa Prisika ne Akwila ahye bɛ́ma me, bɛte nniɛma adwumayɔlɛfoɛ wɔ Kristo Yesu nu;

⁴bɛ yeɛ bɛfale bɛ ngoa bɛtole serewa bɛmane me ɔ. Nna me ngome yeɛ meda bɛ ase ɔ, na mmom Amaenmaensofoɛ asɔre ne amukoraa koso bɛda bɛ ase.

⁵ Ɛ́mɔbisa asɔre bɔ ɔwɔ b’awuro ne ahye bɛ́ma me. Ɛ́mɔbisa me dɔfo Ɛpaneto bɔ olili moa lele Kristo lili wɔ Asia ne ahye bɛ́ma me.

⁶Ɛ́mɔbisa Maria bɔ wayere ye nwo wayɔ adwuma wama ɛmɔ ne ahye bɛ́ma me.

⁷Ɛ́mɔbisa Androniko ne Yunia bɔ bɛte m’abusuafoɛ ne mmiɛngo kukunufoɛ ɔ ahye bɛ́ma me; bele dumaa wɔ asomafoɛ nemɔ nu, na belili moa bɛyɛle Akristofoɛ bɛyakyili me.

⁸Ɛ́mɔbisa Ampliato, bɔ ɔte me dɔfo wɔ Awurade nu ahye bɛ́ma me.

⁹Ɛ́mɔbisa Yubano, bɔ ɔte yɛ biɛngo adwumayɔlɛniɛ wɔ Kristo nu, ɔne me dɔfo Setaki ahye bɛ́ma me.

¹⁰Ɛ́mɔbisa Apele bɔ bale ye bato nu kyɛ odi nahorɛ ma Kristo ne ahye bɛ́ma me. Ɛ́mɔbisa Aristobulo abusuafoɛ ahye bɛ́ma me.

¹¹Ɛ́mɔbisa m’abusuaniɛ Herodion ahye bɛ́ma me. Ɛ́mɔbisa Nakisu abusuafoɛ bɔ bɛwɔ Awurade nu ne ahye bɛ́ma me.

¹²Mébisa Trifana ne Trifosa bɔ bɛte Awurade adwumayɔlɛfoɛ nemɔ ahye. Mébisa me dɔfo Pɛɛsi bɔ wayɔ Awurade adwuma pee ne ahye.

¹³Mébisa Rufu bɔ ɔbɔ mmɔden paa wɔ Awurade adwuma nu, ɔne ye maame bɔ wafa me wayɛ ɔwa ne ahye.

¹⁴Mébisa Asinkrito, Flɛgɔn, Hɛme, Patroba, Hɛma ne aliɛmaa mɔ bɔ bɛboka bɛ so nemɔ ahye.

¹⁵Mébisa Filologo, Yulia, Nereuse ne oliɛma brasua, Olimpa ne anwoteefoɛ bɔ bɛ ne bɛ wɔ berɛ ne amu ahye.

¹⁶ Ɛ́mɔyɛ bɛ nwo awaawaatuu krongron nu. Kristo asɔre ne amukoraa bebisa ɛmɔ ahye.

¹⁷ Aliɛmaa mɔ, metu ɛmɔ foɛ kyɛ, ɛ́mɔnea ɛmɔ nwo yé wɔ mmenia bɔ bɛfa mbakyembakyemuɛ ne sundidua bɛba, bɔ otia ngyerɛkyerɛ bɔ ɛmɔasua ne. Ɛmɔhwe ɛmɔ nwo befi bɛ nwo!

¹⁸ Ofikyɛ sɔ mmenia nemɔ bɛnzo y’Awurade Kristo, na mmom bɛso bɛ bɔbɔ bɛ ko. Na bɛfa bɛ noa dwirɛ fɛɛ ne anoanubobɔlɛ bɛlakalaka mmenia bɔ b’adwene te nganga ɔ.

¹⁹Ebiala ate ɛmɔ sotie bɔ ɛmɔayɛ bama nzɛmba ne ɔ, yiti me nye gye ɛmɔ nwo, nakoso mekuro kyɛ ɛmɔnwu nworɛ bɛfa bɔ ɔte paa nwo, ná ɛmɔte ɛmɔ nwo béfi bɔ ɔte bɔne nwo.

²⁰ Na ɔngɔhyɛ koraa asomdwee Nyameɛ ne kɔbɛtɛ Abɔnzam wɔ ɛmɔ gya bo. Y’Awurade Yesu Kristo ɔlo ɛmɔ.

²¹ Mmiɛngo adwumayɔlɛniɛ Timoteo ne Lukio ne Yason ne Sosipatro bɔ bɛte m’abusuafoɛ ɔ bebisa ɛmɔ ahye.

²²Me, Tɛtio, bɔ ngyerɛle sɔ krataa he ne, mebisa ɛmɔ ahye wɔ Awurade nu.

²³Gayɔso, bɔ nde ye awuro, ná afei koso asɔre ne yia wɔ ye awuro ne, obisa ɛmɔ ahye; Eraseto bɔ ɔte kuro wa fotoɛsoneafoɛ, ɔne y’eliɛma bienzua Kwato bebisa ɛmɔ ahye. [

²⁴Y’Awurade Yesu Kristo adom ne ɔyɛ ɛmɔ amukoraa bɛ deɛ.][3]

²⁵Bɔ ɔkora ma ɛmɔ tindim, kyɛbɔ me nzɛmba ne Yesu Kristo nwo nzɛmba ne ɔte ne, kyɛbɔ mvealeɛ nu dwirɛ bɔ bɛfa bɛfeale daa tete ne ɔte ne,

²⁶ nakoso afei de bala ye ali, na bɛnate bɔ ngɔmhyɛlɛfoɛ bɛhyerɛle ne aso bala ye ali bahyire maen amukoraati, kyɛbɔ Ɛdangama Nyameɛ ye ahyɛdeɛ te ne, amaa ɔnate so maen maen amukoraa bale bali ná bayɛ sotie bama ye.

²⁷Nyameɛ bɔ ye ngome twe yeɛ ɔte nworɛniɛ ne, animnyam ɔ́fa Yesu Kristo so ɔ́yɛ ye deɛ daa daa! Amen.