Read Sehwi Romanfoɛ 2 Bible Online

Romanfoɛ 2 - Sehwi bible

Romanfoɛ 2

¹ Yiti kuro sona, wɔ ole nwa bɔ ebua ebiɛngo ndɛen ɔ? Sɛ ebua ebiɛngo ndɛen a, né ebua wɔ bɔbɔ wɔ nwo ndɛen. Ofikyɛ wɔ bɔ ebua sɔ ndɛen ne, wɔ koso ɛyɔ sɔ yɔleɛ ne bie.

²Na yɛse kyɛ Nyameɛ ndɛen bɔ obua bɛ bɔ bɛyɔ sɔ nningyein ne te nahorɛ.

³Yiti sɛ ɛyɔ sɔ nningyein nemɔ, na sɛ ebua bɛ bɔ bɛyɔ bie ne ndɛen a, aso esusu kyɛ Nyameɛ ndɛenbualɛ ne kɔpa wɔ ti?

⁴ Aso ɛmva Nyameɛ paayɛlɛ mmorosoɛ ne ye aboterɛ pee ne nyɛ hwee hɔ ɔ? Ɛnze kyɛ Nyameɛ paayɛlɛ ne ɔboka wɔ maa ɛsakyera w’adwene hɔ ɔ?

⁵ Ɛnze kyɛ ɛyɔ asoserɛ na epini w’ahone a, né ɛboaboa Nyameɛ yaa piri paa noa ma wɔ nwo wɔ ɛyaafɛlɛ piri kyẽa bɔ Nyameɛ baabua ye tenenee ndɛen ne ɔ?

⁶ Ofikyɛ Nyameɛ kotua sona biala nikyee bɔ wayɔ ɔ nwo kerɛ.

⁷Bɛ bɔ bemia bɛ nye bɛyɔ paa, na bɛpena animnyam, anidie ne daa ngoa nen, bɛ yeɛ Nyameɛ kɔma bɛ daa ngoa ɔ.

⁸ Yiti Nyameɛ kɔfɛ bɛ bɔ bɛte pɛsɛmangomenya ná bɛyɛ nahorɛ ne nwo asoserɛ, ná afei bedi bɔne si ne aso yaa piri paa, ná wamaa banwu amaneɛ.

⁹ Amaneɛnwunɛ ne ahometrɛ kɔwa sona biala bɔ odi bɔne so; Yudafoɛ yeɛ beli moa ɔ, yeɛ Amaenmaensofoɛ toa berɛ ɔ.

¹⁰Na Nyameɛ kɔma bɛ bɔ bɛyɔ paa mukoraa animnyam, anidie ne asomdwee. Yudafoɛ yeɛ beli moa ɔ, yeɛ Helafoɛ toa berɛ ɔ.

¹¹ Ofikyɛ Nyameɛ nnea sona nyunu mmua ndɛen.

¹² Amaenmaensofoɛ bɔ bɛnze Mose mmeraa ne, sɛ bɛyɔ bɔne a, nna Mose mmeraa so yeɛ bekogyina bekobua bɛ ndɛen maa bekomini ɔ. Nakoso Yudafoɛ bɔ bɛ de bɛse Mose mmeraa nen, sɛ bɛyɔ bɔne a, Mose mmeraa ne aso yeɛ bekogyina bekobua bɛ ndɛen ɔ.

¹³ Ofikyɛ nna bɛ bɔ bɛse mmeraa ne yeɛ bɛte teneneefoɛ wɔ Nyameɛ nyunu ɔ, na mmom bɛ bɔ bedi mmeraa ne aso yeɛ bekobua bɛ be ɔ.

¹⁴ Amaenmaensofoɛ de, bɛnze mmeraa ne; nakoso sɛ bɛ tiboa maa bɛ bɔbɔ bɛyɔ bɔ mmeraa ne kyire a, ɔte mmeraa ma bɛ, ɔwɔ nu kyɛ bɛnze mmeraa ne de.

¹⁵Bɛ yɔleɛ kyire kyɛ, bahyerɛ bɔ mmeraa ne hyɛ sona kyɛ ɔyɔ ne wɔ b’ahone nu, yeɛ bɛ tiboa koso di adanzeɛ kyɛ ɛhe te nahorɛ. Ofikyɛ ɔtɔ mmerɛ bie a, b’adwene bɔ bɛ kwaadu; na ɔtɔ mmerɛ bie koso a, b’adwene bua bɛ be.

¹⁶ Yiti kyɛbɔ me nzɛmba ne okyire ne, sɔ kyẽa ne, Nyameɛ kɔfa Yesu Kristo so kobua sona biala ye mvealeɛ nu dwirɛ nwo ndɛen ɔ.

¹⁷ Sɛ ɛfrɛ wɔ nwo Yudaniɛ, na ɛfa wɔ nwo to mmeraa ne aso, na ɛfa Nyameɛ hoahoa wɔ nwo;

¹⁸na sɛ ɛse Nyameɛ apɛdeɛ, na asua fi mmeraa ne anu anwu bɔ ɔte paa ɔ;

¹⁹na sɛ ede di kyɛ wɔ yeɛ ɛse anyesiniwaafoɛ atee kyire ɔ, na esa te bɛ bɔ bɛte awosii nu kanea,

²⁰ɔne kyɛ ɛte bɛ bɔ bɛnze nworɛ ɔ bɛ foɛtulɛniɛ, ɔne ngokwaammaa kyerɛkyerɛniɛ, na sɛ w’adwene si wɔ pi kyɛ ɛse mmeraa ne anu nimdeɛ ne nahorɛ,

²¹ na afei esa kyire ebiemɔ nikyee a, nzu ati yeɛ engyire wɔ nwo nikye ɔ? Wɔ bɔ edwudwo tia awue ne, aso wɔ bɔbɔ ewua?

²² Wɔ bɔ ɛkã kyɛ nnɛmaa bɛsɛkye agyaa ne, aso ɛsɛkye agyaa? Wɔ bɔ ekyi mmosoen nen, aso ɛyɔ musue nikyee wɔ asɔneyɛɛ sua nu?

²³Wɔ bɔ ɛfa mmeraa ne hoahoa wɔ nwo ne, aso ebu mmeraa ne aso gua Nyameɛ nyunu ase anaa?

²⁴ Ofikyɛ bahyerɛ kyɛ, “Ɔnate ɛmɔ Yudafoɛ ti, Amaenmaensofoɛ bedwudwo betia Nyameɛ.”

²⁵ Sɛ edi mmeraa ne aso de a, né wɔ bienzua bɔ bapɛ ne nwo le mvasoɛ, nakoso sɛ ebu mmeraa ne aso de a, né ɛte kyɛ ebie bɔ bɛppɛle ye bienzua koraa ɔ.

²⁶ Sɛ Amaenmaensoniɛ bɔ bɛppɛle ye bienzua ɔ odi mmeraa ne anu dwirɛ so a, aso bengobu ye kyɛ bapɛ ye bienzua anaa?

²⁷ Nzaade bɛmbɛ-bɛ-bienzuafoɛ bɔ bedi mmeraa ne aso ne, bekobua ɛmɔ bienzuapɛlɛfoɛ bɔ ɛmɔse mmeraa ne ná koso ɛmɔbu mmeraa ne aso ne ndɛen.

²⁸ Nna Yudaniɛ kaenn ole bɔ bapɛ ye bienzua anwoɔnaen nu ɔ. Yeɛ bienzuapɛlɛ paa koso ɔtte bɛ nye so nikye.

²⁹ Na mmom Yudaniɛ kaenn ole sona bɔ ɔte Yudaniɛ wɔ ahone nu ɔ; ɔte sunzum nu nikye, na ɔtte anwoɔnaen nu nikye. Nna kuro sona, na mmom Nyameɛ yeɛ ɔye sɔ sona ne ayɛ ɔ.