Read Sehwi 1 Korintofoɛ 1 Bible Online

1 Korintofoɛ 1 - Sehwi bible

1 Korintofoɛ 1

¹ Krataa he fi me Pɔɔlo, bɔ Nyameɛ nate ye pɛ so wafrɛ me kyɛ nyɛ Kristo Yesu somafoɛ ɔ, ɔne aliɛmaa Sositene berɛ.

² Yɛfa yɛbrɛ Nyameɛ asɔre bɔ ɔwɔ Korinto, bɛ bɔ ɔnate Yesu Kristo ti bafrɛ bɛ maa baayɛ krongron; mekyire ɛmɔ bɔ bafrɛ ɛmɔ ne bɛ bɔ bɛwɔ nekaa biala maa ɛmɔayɛ anwoteefoɛ, na ɛmɔ ne yɛ bɔ nu bɔ Yesu Kristo dumaa kyɛ y’Awurade ɔ.

³ Adom ne asomdwee bɔ ofi yɛ Baba Nyameɛ ne Awurade Yesu Kristo berɛ ɔyɛ ɛmɔ deɛ.

⁴ Ɔnate ɛmɔ ti daa meda me Nyameɛ ase, ofikyɛ Nyameɛ nate Yesu Kristo so walo ɛmɔ.

⁵Na nikyee biala nu ɛmɔanya bɛ nwo wɔ Kristo nu, ebie te kyɛ edwudwolɛ amukoraa ne nimdeɛ mukoraa nu.

⁶Kristo nwo nzɛmba ne atira ndii wɔ ɛmɔ nu,

⁷bɔ ɔmaa ɛmɔ ndɔ sii wɔ adom akyɛdeɛ biala nu, wɔ aberɛ bɔ ɛmɔnwondɛ y’Awurade Yesu Kristo walɛ ne ɔ.

⁸ Ye yeɛ okogyina ɛmɔ si pindinn koodwu ayieleɛ, amaa ɛmɔanni nikyee biala nwo fɔ wɔ y’Awurade Yesu Kristo kyẽa ne.

⁹ Nyameɛ bɔ wafrɛ ɛmɔ kyɛ ɛmɔ ne Ɔwa, y’Awurade Yesu Kristo bɛfa abiɛngoɛ ne, odi nahorɛ.

¹⁰Nniɛma mɔ, mefa y’Awurade Yesu Kristo dumaa mesrɛ ɛmɔ kyɛ ɛmɔ amukoraa ɛ́mɔyɛ ko ná mbakyembakyemuɛ amma ɛmɔ nu; na ɛ́mɔyɛ ko wɔ adwene ko ne porɛ bɔlɛ ko nu.

¹¹Nniɛma mɔ, Kloe awuro ama mɔ baatia me gya so kyɛ ɛmɔ afia nwo koraa.

¹² Mekyire kyɛ, asora bɔ ɛmɔ nu biala kã ye deɛ fa ɔ. Ebie nwa, “Me de, nwɔ Pɔɔlo bue nu”, ebie wora nwa, “Me de, nwɔ Apolo bue nu”, ebie koso nwa, “Me de, nwɔ Kefa bue nu”, yeɛ ebie koso nwa, “Me de, nwɔ Kristo bue nu.”

¹³Aso bahyehyɛ Kristo nu hɔ ɔ? Pɔɔlo yeɛ bɛbɔle ye mmeamudua nu bɛmane ɛmɔ ɔ, anaakyɛ Pɔɔlo dumaa nu yeɛ bɛbɔle ɛmɔ asu bewurale ɔ?

¹⁴ Meda Nyameɛ ase kyɛ mammɔ ɛmɔ nu biala asu, sana Krispo ne Gayɔso ngome,

¹⁵na ebiala anga kyɛ bɛbɔle ye asu wɔ me dumaa nu.

¹⁶ Mekaye kyɛ mmɔle Setefana awuro ama koso asu; na mengaye kyɛ mmɔle ebiala asu mmokale bɛ so ɔ.

¹⁷Ofikyɛ Kristo anzoma me kyɛ mmamɔ asu, na mmom ɔsomane me kyɛ mmanga nzɛmba ne, bɔ memva kuro sona nworɛ yeɛ mekã ɔ, amaa Kristo mmeamudua ne wanyɛ mbaen.

¹⁸Kristo mmeamudua ne nwo dwirɛ te ngwaseasɛm ma bɛ bɔ bɛwɔ so bemini ne, nakoso ɔte Nyameɛ tumi ma yɛ bɔ ogu so ode yɛ ngoa ne.

¹⁹ Ofikyɛ bahyerɛ kyɛ, “Ngɔsɛkye nworɛfoɛ nworɛ ne, na mama nimdeɛfoɛ ndeaseɛ ayɛ mbaen.”

²⁰ Nzaade, né nworɛfoɛ gyi ye sɛ? Nimdeɛfoɛ koso begyi ye sɛ? Bɛ bɔ babe aporowaasulɛ nu wɔ ewiase wa ne koso begyi ye sɛ? Aso Nyameɛ mmane wiase wa nworɛ ɔkkakyili ngwaseasɛm?

²¹Ɔnate Nyameɛ nworɛ (nhyehyɛleɛ) ne ati, adasammaa bangora bamva bɛ nworɛ so bannwu Nyameɛ. Yiti ɔsɔle Nyameɛ nye kyɛ ɔkɔfa edwirɛ bɔ yɛkã, bɔ bebu ye ngwaseasɛm ne aso kole bɛ bɔ bede bedi ne ngoa.

²² Ofikyɛ Yudafoɛ bɛpena nzɛngyerɛnneɛ, yeɛ Helafoɛ koso bɛpena ewiase nworɛ.

²³ Nakoso yɛ de, yɛbɔ Kristo bɔ bɛbɔle ye mmeamudua nu ne nwo dawure. Ɛhe te sundidua ma Yudafoɛ, yeɛ ɔte ngwaseasɛm ma Helafoɛ.

²⁴Na bɛ bɔ bafrɛ bɛ ne de, Yudafoɛ oo, Helafoɛ oo, Kristo te Nyameɛ tumi ne ye nworɛ ma bɛ.

²⁵Ɔnate kyɛ Nyameɛ nhyehyɛleɛ bɔ bebu ye ngwaseasɛm ne, nworɛ wɔ nu tra adasammaa nworɛ; yeɛ bɔ bebu ye kyɛ ɔte Nyameɛ mmerɛyɛlɛ nen, anwoserɛ wɔ nu tra adasammaa anwoserɛ.

²⁶Afei aliɛmaa mɔ, ɛ́mɔkaye ɛmɔ frɛlɛ bɔ ɔfrɛle ɛmɔ ne. Sɛ ɛnea ye sona bue nu de a, ɛmɔ nu kãa bie yeɛ né bele dibea anaa bɛte nnehyeɛ ɔ.

²⁷ Nakoso Nyameɛ fale bɔ ewiase bu ye kyɛ ɔte ngwaseasɛm ne kyɛ ɔfa gua ewiase nworɛfoɛ nyunu ase; na ɔfale bɔ ewiase bu ye kyɛ ɔyɛ mmerɛ ne, kyɛ ɔfa gua anwoserɛfoɛ nyunu ase,

²⁸ na ewiase nningyein bɔ ye nwo olle mvasoɛ, ɔne bɔ bemmu ye ne yeɛ Nyameɛ waneanea nu waye ɔ, yeɛ nningyein bɔ ɔnne berɛ ɔ, kyɛ ɔfa sɛkye bɔ ewiase bu ye kyɛ ye nwo hia ne,

²⁹ amaa sona biala anhoahoa ye nwo wɔ Nyameɛ nyunu.

³⁰ Ngoa bɔ ɛmɔle ye wɔ Yesu nu ne fi Nyameɛ berɛ, na Nyameɛ afa Kristo ayɛ yɛ nworɛ, yɛ tenenee, yɛ fawɔnwodi ne krongronyɛlɛ.

³¹ Ɛhe ati, bahyerɛ kyɛ, “Ebiala bɔ ɔhoahoa ye nwo ne, maa ɔhoahoa ye nwo wɔ Awurade nu.”