Read Sehwi 1 Korintofoɛ 10 Bible Online

1 Korintofoɛ 10 - Sehwi bible

1 Korintofoɛ 10

¹ Aliɛmaa mɔ, mepena kyɛ ɛmɔnwu ye fa yɛ nana mɔ nwo kyɛbɔ munungum ne munduni bɛ mukoraa bɛ so, ná bɛ mukoraa bɛfale ɛpo ne anu ne.

²Bɛbɔle bɛ mukoraa asu wɔ Mose nu, wɔ munungum ne ɛpo ne anu.

³ Bɛ mukoraa belili sunzum nu aleɛ komapɛ ne ala,

⁴ na bɛ mukoraa bɛnone sunzum nu anonneɛ komapɛ ne ala. Ofikyɛ, sunzum nu Nyɔbotaen bɔ né oli bɛ si ne, nu nzue yeɛ bɛnone ɔ, na sɔ Nyɔbotaen ne ole Kristo.

⁵ Nakoso, Nyameɛ nye angye bɛ nu pee bɛ nwo, yiti bewuwuli wɔ ɛserɛ ne aso.

⁶ Na ɛhemɔ te kɔkɔbɔlɛ ma yɛ, amaa yanni bɔne si kyɛbɔ belili ne.

⁷ Nnɛma ɛmɔso bosoen kyɛbɔ bɛ nu biemɔ yɔle ne, kyɛbɔ bahyerɛ kyɛ, “Mmenia ne tenane ase bedidili bɛnone ná bedwɔso begole.”

⁸ Nnɛmɔma yɛbɔ adwaman kyɛbɔ bɛ nu biemɔ yɔle na mmenia apee aburanyɔ ne nza totɔle ɛlɛhomapɛ ne.

⁹ Nnɛmɔma yɛso Kristo yɛnea kyɛbɔ bɛ nu biemɔ yɔle ná ewoo kekale bɛ maa bewuwuli ne.

¹⁰ Yeɛ nnɛmɔma yɛpenepene yɛ komvi kyɛbɔ bɛ nu biemɔ yɔle ná ewue abɔfo oohuhuni bɛ ne.

¹¹Ɛhe amukoraa tole bɛ maa ɔyɛle kɔkɔbɔlɛ, na bɛhyerɛ bɛtole berɛ bɛfa betuli yɛ foɛ, yɛ bɔ wiase ayieleɛ mmerɛ ne wato yɛ ne.

¹²Yiti ma ebiala bɔ ɔdwene kyɛ ogyi berɛ ne ɔ́nea yé ná wamvi ase.

¹³Nzɔhwɛ biala nne berɛ bɔ wato ɛmɔ bɔ sona nnwuni bie le ɔ. Nakoso ɔnate kyɛ Nyameɛ di nahorɛ ne ati, ɔngɔma ate ngɔma nzɔhwɛ bɔ ɔbo ɛmɔ anwoserɛ so ngɔto ɛmɔ. Na mmom, okohyire ɛmɔ atee bɔ ɛmɔkɔfa so bekɔnwati bekofi nzɔhwɛ ne anu ɔ, amaa ɛmɔahora bagyina ye noa.

¹⁴Yiti aliɛmaa mɔ, ɛmɔhwe ɛmɔ nwo befi bosoensolɛ nwo.

¹⁵Medwudwo mekyire ɛmɔ kyɛ mmenia bɔ bɛse nworɛ ɔ, yiti ɛmɔdwene bɔ mekã ye nwo.

¹⁶ Yɛda Awurade Adidie kulie bɔ bayira so ne nwo ase a, aso ongyire kyɛ yɛne Kristo mogya ne afa abiɛngoɛ anaa? Paanoo bɔ yɛbubu ne, aso ongyire kyɛ yɛne Kristo nipadua ne afa abiɛngoɛ anaa?

¹⁷Paanoo ne te komapɛ, na ɔwɔ nu kyɛ yɛsone de, nakoso yɛte nipadua komapɛ, ofikyɛ paanoo komapɛ ne ala yeɛ yɛ mukoraa yɛdi ɔ.

¹⁸ Ɛmɔnea Yisraelfoɛ! Aso bɛ bɔ bedi afɔlebɔdeɛ nen, bɛ ne afɔleɛ bokyea ne bennyane abiɛngoɛfalɛ anaa?

¹⁹Afei sɛɛ koraa yeɛ mekyire ɔ? Bosoen te nzu koraa, anaakyɛ bosoen so aleɛ te nzu koraa?

²⁰ Mekyire kyɛ aleɛ bɔ bosoensolɛfoɛ bɛfa bɛbɔ afɔleɛ ne, bɛfa bɛma sunzummɔne mɔ, na bɛmva bɛmma Nyameɛ; yiti menguro kyɛ ɛmɔ ne sunzummɔne mɔ kɔbɔ afɛ ɔ.

²¹Ɛmɔngɔhora bɛngɔno Awurade kulie noa, ná ɛmɔano sunzummɔne mɔ koso bɛ kulie noa. Ɛmɔngɔhora bengodidi Awurade poen so, ná ɛmɔasa badidi sunzummɔne mɔ bɛ poen so.

²² Anaa yɛpena kyɛ yɛwura Awurade apue maa ɔtwe nungunɛ hɔ ɔ? Yɛbu ye kyɛ yɛ nwo yɛ se tra ye anaa?

²³ Bɛtaa bɛkã kyɛ, “Yɛle nikyee biala nwo ate”, nakoso nna nikyee biala yeɛ ɔte paa ɔ; yeɛ nna nikyee biala yeɛ ɔma ngɔsoɛ ɔ.

²⁴Ɔnzɛ kyɛ sona biala dwene ye ngome ye deɛ nwo, na mmom ɔsɛ kyɛ ɔma obiɛngo koso deɛ nwo hia ye.

²⁵Ɛmɔli naen biala bɔ bɛtɔne ye dwaanu, na ɔnate sona tiboa ti nnɛma ɛmɔbisabisa ye nwo dwirɛ biala.

²⁶ Ofikyɛ “Aseɛ ne bɔ ɔwɔ so amukoraa te Awurade deɛ.”

²⁷Sɛ ebie bɔ ɔtte gyidiniɛ frɛ ɛmɔ adidie, ná ɛmɔpene so kyɛ ɛmɔkɔhɔ a, bɔ ɔkɔfa kosie ɛmɔ nyunu biala, ɛmɔli. Sona tiboa ti nnɛma ɛmɔbisa ye nwo dwirɛ biala.

²⁸Nakoso sɛ ebie kã kyire ɛmɔ kyɛ, “Aleɛ he te bosoen so aleɛ” de a, ye de bɔ ɔbɔle ɛmɔ amaneɛ ne ti, ɔne kuro sona tiboa ti nnɛma ɛmɔdi.

²⁹Mengyire ɛmɔ bɔbɔ bɛ tiboa, na mmom mekyire sona bɔ ɔha hyirele ɛmɔ ne tiboa. Nzu ati yeɛ ebie tiboa bua bɔ mekuro kyɛ meyɔ nwo ndɛen ɔ?

³⁰Nakoso sɛ mefa asennaa medi a, nzu ati yeɛ ebie kã me nwo dwirɛ tɛɛ fa bɔ mala ye nwo ase nwo ɔ?

³¹Yiti sɛ ɛmɔdidi oo, sɛ ɛmɔno oo, nikyee biala bɔ ɛmɔyɛ ne, ɛ́mɔyɔ ye mukoraa bɛfa bɛhyɛ Nyameɛ animnyam.

³²Nnɛma ɛmɔyɔ bɔ ɔkɔha Yudafoɛ anaa Helafoɛ anaa Nyameɛ asɔre ne;

³³kyɛbɔ mebɔ mmɔden kyɛ ngɔsɔ mmenia mukoraa nye wɔ nikyee biala nu ne. Membena me ngome me yeeyɛlɛ, na mmom mmeni soma yeeyɛlɛ, kyɛbɔ bekonya daa ngoa ɔ.