Read Sehwi 1 Korintofoɛ 11 Bible Online

1 Korintofoɛ 11 - Sehwi bible

1 Korintofoɛ 11

¹ Ɛ́mɔsuasua me, kyɛbɔ me koso mesuasua Kristo ne.

²Aliɛmaa mɔ, mekamvo ɛmɔ, ofikyɛ ɛmɔkaye me wɔ nikyee biala nu, na ɛmɔdi ngyerɛkyerɛ bɔ mva mane ɛmɔ ne aso.

³Na mepena kyɛ ɛmɔte ye bo kyɛ Kristo te bienzua biala mene, brasua koso ohu te ye mene, na Nyameɛ koso te Kristo mene.

⁴Bienzua biala bɔ ɔbɔ mbaeɛ anaa ɔhyɛ ngɔm ná ɔkata ye ti so ne, onni ye mene ni.

⁵Nakoso brasua biala bɔ ɔbɔ mbaeɛ anaakyɛ ɔhyɛ ngɔm ná wangata ye ti so ne, onni ye mene ni; na ɔte kyɛ wabɔ tikwa ne ala.

⁶Na sɛ brasua angata ye ti so de a, ye de maa ɔtete ye ti; nakoso sɛ ɔte animguaseɛ ma brasua kyɛ ɔkɔtete ye ti, anaakyɛ ɔkɔbɔ tikwa a, ye de maa ɔkata so.

⁷ Bienzua de, onhia kyɛ ɔkata ye ti so ɔ, ɔnate ɔte Nyameɛ animnyam ne ye sue; nakoso brasua de, ɔye bienzua animnyam kyire.

⁸ Ofikyɛ bammɔ bienzua bamvi brasua nu, na mmom brasua yeɛ bɛbɔle ye befili bienzua nu ɔ.

⁹Afei koso, nna brasua ti yeɛ bɛbɔle bienzua ɔ, na mmom bienzua ti yeɛ bɛbɔle brasua ɔ.

¹⁰Ye sɔ ti, odi kyɛ brasua nya ngatasoɛ wɔ ye ti so, ɔnate abɔfo mɔ ti.

¹¹Nakoso Awurade nyunu de, bienzua ngɔ nyakyi brasua, yeɛ brasua koso ngɔ nyakyi bienzua;

¹²ɔnate kyɛ, kyɛbɔ bɛbɔle brasua befili bienzua nu ne, sɔ ala yeɛ brasua koso wo bienzua ɔ, na nningyein mukoraa fi Nyameɛ nu.

¹³Sɛ ɔte paa kyɛ brasua bɔ mbaeɛ kyire Nyameɛ bɔ wangata ye ti so a, ɛmɔ bɔbɔ bébua.

¹⁴Aso abɔdeɛ po ngyire ɛmɔ kyɛ sɛ bienzua ti fu gua ye nwo a ɔte animguaseɛ ma ye ɔ?

¹⁵Nakoso sɛ brasua de, ye ti fu gua ye nwo a ɔte ye animnyam. Ofikyɛ bɛfale nwiaa bɛmane ye kyɛ ɔfa kata ye ti so.

¹⁶Na sɛ ebie su ɛhe nwo aporowaa a, yɛ de yɛnne nhyehyɛleɛ foforɛ biala yɛndo nu, yeɛ Nyameɛ asɔre nemɔ koso benne bɛndo nu.

¹⁷Na ɛhe bɔ mekã mekyire ɛmɔ ye, mengamvo ɛmɔ, ofikyɛ sɛ ɛmɔyia nu a, ɛmɔnyɔ nikye paa, na mmom bɔ ɔtte mayee yeɛ ɛmɔyɔ ɔ.

¹⁸Bɔ oli moa ɔ, sɛ ɛmɔyia nu kyɛ asɔre a, mete kyɛ mbakyembakyemuɛ ba ɛmɔ nu, na mede medi kyɛ bɛ nu bie te nahorɛ.

¹⁹Yoo, ye nwo kohia kyɛ fekue fekue kɔwa ɛmɔ nu ɔ, na ɛhe kɔma ɛmɔ nu mmenia bɔ bɛnate nahorɛ atee so ne, bɛ nwo kɔla nzorɛ.

²⁰Sɛ ɛmɔbayia nu neka horɛ a, nna Awurade adidie yeɛ ɛmɔbadi ɔ,

²¹ɔnate kyɛ sɛ ɛmɔdidi a, ebiala di ye aleɛ deɛ koraka; na ɛhɔen ku ebie ne, né ebie koso nzaa abo ye.

²²Nzu ɔ! Ɛmɔlle awuro mɔ bɔ ɛmɔdidi nu ná ɛmɔno wɔ nu hɔ ɔ? Anaakyɛ Nyameɛ asɔre ne yeɛ ɛmɔbu ye animtia ná ɛmɔsa begua ehiafoɛ nyunu ase ɔ? Nzikyɛ koraa yeɛ nga ngyire ɛmɔ ɔ? Ngamvo ɛmɔ wɔ ɛhe anwo anaa? Daabi! Mengɔkamvo ɛmɔ.

²³Ofikyɛ, bɔ nya mvili Awurade berɛ ne yeɛ me koso mva mane ɛmɔ ɔ: kyɛ, kɔngɔen ne bɔ bɛyele Awurade Yesu bɛmane ne, ɔfale paanoo,

²⁴ɔlale ase, na obubuli nu, na ɔhane kyɛ, “[Ɛmɔle beli.] Ɛhe te me nipadua bɔ bébubu bɛ́ma ɛmɔ ɔ; ɛ́mɔyɔ he bɛ́fa bɛ́kaye me.”

²⁵ Sɔ ala yeɛ bedidi beyiele nen, ɔfale kulie ne, na ɔhane kyɛ, “Kulie he te apam foforɛ me mogya nu; mmerɛ biala bɔ ɛmɔkɔno ne, ɛ́mɔyɔ he bɛ́fa bɛ́kaye me.”

²⁶ Na mmerɛ biala bɔ ɛmɔkoli paanoo he ná ɛmɔkɔno kulie he noa nen, ɛmɔbɔ Awurade wue ne dawure kodwu mmerɛ bɔ ɔkɔwa ɔ.

²⁷Yiti sona biala bɔ okoli paanoo he, anaakyɛ ɔkɔno Awurade kulie ne noa wɔ atee bɔ ɔmvata so ne, okoli Awurade nipadua ne ye mogya nwo fɔ.

²⁸Yiti sɛ ebiala ɔbaali paanoo ne bie, ná ɔno kulie ne noa bie a, maa ɔpɛnzɛpɛnzɛ ye nu ɔnea koraka.

²⁹Ofikyɛ ebiala bɔ odi ná ɔno ye wɔ atee bɔ ɔmvata so nen, odi ná ɔno ɔfa ndɛenbualɛ ɔbrɛ ye bɔbɔ ye nwo; ofikyɛ wammu [Awurade] nipadua ne.

³⁰Ɛhe ati yeɛ ɛmɔ nu pee bayɛ mmerɛ ná bɛ nwo yɛ bɛ yea, na pee koso bawuwu ɔ.[2]

³¹Na sɛ yɛpɛnzɛpɛnzɛ yɛ nu nahorɛ nu a, bengobua yɛ ndɛen.

³²Nakoso sɛ Awurade bua yɛ ndɛen a, ɔtwe yɛ so, amaa ɔnate so bamva yɛ bamvra wiase so bammua yɛ ndɛen.

³³Yiti aliɛmaa mɔ, sɛ ɛmɔyia nu kyɛ ɛmɔbaadidi a, ɛ́mɔnwondɛnwondɛ bɛ nwo.

³⁴ Sɛ ɛhɔen ku ebie a, maa odidi awuro koraka, ná ɛmɔammanyia nu bandwetwe ndɛenbualɛ bamma bɛ nwo. Edwirɛ bɔ wahã ne de, meba a yeɛ ngɔhã ye nwo bie ɔ.