Read Sehwi 1 Korintofoɛ 13 Bible Online

1 Korintofoɛ 13 - Sehwi bible

1 Korintofoɛ 13

¹Sɛ mekã mmenia ne abɔfo mɔ dwudwolɛ ahoroɔ ná nnne ɔdɔ a, né nde kyɛ ayaa bɔ ɔgyegye mbaen anaakyɛ akasaa bɔ ɔwoso mbaen ɔ.

² Sɛ nne ngɔmhyɛlɛ akyɛdeɛ, ná mete mvealeɛ nu dwirɛ amukoraa ne nimdeɛ mukoraa bo, ná nne gyidie mukoraa bɔ ɔmaa mekora metutu mmokaa bo, nakoso nnne ɔdɔ a, né nnde huu.

³Sɛ mefa me nwo nningyein mukoraa mekyɛ, na mefa me nipadua mema kyɛ bɛyera ye, na nnne ɔdɔ a, mennya mvasoɛ biala so.

⁴Ɔdɔ le aboterɛ, na ye ti anu yɛ mmerɛ; ɔdɔ de, ɔtte ahoɔyea, ongyire ye nwo, na ɔmmoma ye nwo so.

⁵Ɔdɔ mma ye nye ndra ye ndo nwiaa, ɔtte pɛsɛmangomenya, ɔmvɛ yaa mbaen mbaen, yeɛ ɔmva bɔne nzie ye ti anu.

⁶Ɔdɔ nye ngye bɔne nwo, na mmom ye nye gye nahorɛ nwo.

⁷Ɔdɔ abasanu mmu, ode nningyein mukoraa di, ole nningyein mukoraa nu anyelasoɛ, na ole nningyein mukoraa nu animia.

⁸Ɔdɔ bo ngɔpɛ le, nakoso ngɔmhyɛlɛ bo kɔpɛ, edwudwolɛ ahoroɔ kɔpɛ nu kɔhɔ, yeɛ nimdeɛ koso kotu komini.

⁹Ɔnate kyɛ yɛ nimdeɛ ne yɛ ngɔmhyɛlɛ nni mu,

¹⁰nakoso bɔ odi mu ne ba a, bɔ onni mu ne kotu komini.

¹¹Mmerɛ bɔ né nde akwadaa ne, ndwudwole kyɛ akwadaa, ndwenene kyɛ akwadaa, me ndeaseɛ yɛle kyɛ akwadaa. Nakoso nyɛle panyi ye de, mayakyi ngwadasɛm ne.

¹²Kekesaala ye de, yɛnwu nikyee wusiwusi wɔ neanu nu. Nakoso kyẽa bie yɛkonwu ye pefee. Kekesaala ye de, bɔ mese ne onni mu, nakoso kyẽa bie okoli mu kyɛbɔ Nyameɛ koso se me ne.

¹³Afei nningyein nza yeɛ bɛwɔ berɛ ɔ: gyidie, anyelasoɛ, yeɛ ɔdɔ, nakoso ɔdɔ di mu tra bɛ mu.