Read Sehwi 1 Korintofoɛ 2 Bible Online

1 Korintofoɛ 2 - Sehwi bible

1 Korintofoɛ 2

¹Aliɛmaa mɔ, mmale ɛmɔ berɛ kyɛ mebaali Nyameɛ dwirɛ ne nwo adanzeɛ mekyire ɛmɔ ne, mamma kyɛ sona bɔ ye noa ate anaakyɛ ɔse nworɛ ɔ.

²Ofikyɛ nyɛle m’adwene kyɛ membena kyɛ menwu nikye fee wɔ ɛmɔ nwo, sana Kristo ne ye mmeamudua ne aso wue.

³ Na mvale anwobrɛaseɛ ne esuronyi ne anwopopolɛ yeɛ me ne ɛmɔ yɛtenane ɔ.

⁴ Mamva sona nworɛ ne tetateta yeɛ ngane me dwirɛ ná nyɔle me ngyerɛkyerɛ ɔ; na mmom mvale Sunzum ne ɔne tumi yeɛ nyɔle adwuma ɔ,

⁵amaa ɛmɔ gyidie wanggyina sona nworɛ so, na mmom wagyina Nyameɛ tumi so.

⁶ Nakoso nworɛ dwirɛ yeɛ yɛkã yɛkyire bɛ bɔ banyi sunzum nu ɔ. Ɔtte wiase he anu nworɛ, yeɛ ɔtte wiase atumifoɛ deɛ bɔ ɔpɛ nu kɔ ne bie.

⁷ Na mmom mworɛ bɔ yɛbɔ ye nwo dawure ne te Nyameɛ mvealeɛ nu nworɛ, bɔ kyɛbɔ ɔkɔyɛ ná yanya animnyam ti, ɔhyehyɛ tole berɛ koraka yeɛ ɔbɔ wiase ɔ.

⁸ Ewiase atumifoɛ biala ande nworɛ he abo, ofikyɛ sɛ bɛtele ye bo a, ahaa bammɔ animnyam Hene ne mmeamudua nu.

⁹ Nakoso bahyerɛ kyɛ, “Bɔ anyeɛ nnwuni ye, anaa bɔ asoɛ ɔttele ye le, anaa bɔ ebiala ɔddwenene ye nwo le ne, yeɛ ɔte nikyee bɔ Nyameɛ asiesie ama bɛ bɔ bekuro ye dwirɛ ɔ.”

¹⁰Nakoso yɛ yeɛ Nyameɛ nate ye Sunzum so waye wahyire yɛ ɔ. Ofikyɛ Sunzum ne pɛnzɛpɛnzɛ nikyee biala nu, ɔne Nyameɛ mvealeɛ nu nhyehyɛleɛ po.

¹¹Nwa yeɛ ɔse kuro sona ti anu dwirɛ ɔ? Sana sɔ sona ne sunzum bɔ ɔte ye nu ne. Sɔ ala yeɛ ebiala koso nze Nyameɛ ti anu dwirɛ ɔ, sana Nyameɛ Sunzum ne yeɛ ɔse ɔ.

¹²Nna ewiase wa sunzum yeɛ yanya ye ɔ, na mmom Sunzum bɔ ofi Nyameɛ berɛ yeɛ yanya ye ɔ; na ɛhe maa yɛte akyɛdeɛ bɔ Nyameɛ afa ama yɛ ne bo.

¹³Bɔ yɛkã ne, yɛmva kuro sona nworɛ yeɛ yɛfa yɛkyirekyire ɔ, na mmom bɔ Sunzum Krongron ne okyirekyire ɔ; na yɛfa sunzum nu nningyein yɛtoto sunzum nu nningyein nwo.

¹⁴Ebiala bɔ Nyameɛ Sunzum nne ye nu ne, onnya akyɛdeɛ bɔ befi Sunzum ne berɛ ne, ofikyɛ akyɛdeɛ ne te sɔ sona ne nye so ngwaseasɛm; yeɛ ɔngora nde bɛ bo koso, ofikyɛ Sunzum ne yeɛ ɔboka sona maa ɔte akyɛdeɛ ne bo ɔ.

¹⁵Sona bɔ Nyameɛ Sunzum wɔ ye nu ne, onwu nikye tɛɛ ne paa mukoraa, na ye de, ebiala ngora mmua ye ndɛen.

¹⁶ “Na nwa yeɛ ɔse Awurade ti anu dwirɛ ná watu ye foɛ ɔ?” Nakoso yɛ de, yɛle Kristo adwene.