Read Sehwi 1 Korintofoɛ 3 Bible Online

1 Korintofoɛ 3 - Sehwi bible

1 Korintofoɛ 3

¹ Aliɛmaa mɔ, mangora me ne ɛmɔ andwudwo kyɛ mmenia bɔ Nyameɛ Sunzum ne ayi bɛ tɛkyɛ ɔ, na mmom kyɛ anwoɔnaenufoɛ bɔ bɛte nnɔma wɔ Kristo nu ɔ.

² Nyɔfonesue yeɛ mva maa ɛmɔnone ɔ; na mamma ɛmɔ aleɛ bɔ nu yɛ se ɔ, ɔnate kyɛ né ɛmɔnnya beddwuli kyɛ bedi aleɛ bɔ nu yɛ se ɔ. Na kekesaala ye po, ɛmɔnnya beddwuli.

³Ofikyɛ ɛmɔ brabɔlɛ tɛte kyɛ ewiasefoɛ abrabɔ. Na aberɛ bɔ anyeboroborolɛ ne apindapinda wɔ ɛmɔ afia ye de, aso ɛhe ngyire kyɛ ɛmɔte anwoɔnaenufoɛ bɔ ɛmɔ yɔleɛ te kyɛ ewiasefoɛ ɔ?

⁴ Sɛ ɛmɔ nu ko kã kyɛ, “Me de nwɔ Pɔɔlo bue nu” ná ko kã kyɛ, “Me de nwɔ Apolo bue nu” a, aso nna kuro sona yɔleɛ yeɛ ɛmɔyɔ ye?

⁵ Pɔɔlo te nzu? Apolo te nzu? Yɛte Nyameɛ ngoaa bɔ ɛmɔnate yɛ so bele belili ɔ, na yɛ nu ko biala le adwuma kyɛbɔ Awurade afa awura ye sa ɔ.

⁶ Me de nnuale, yeɛ Apolo wora oguaguale so nzue ɔ, nakoso Nyameɛ yeɛ ɔmaa onyini ɔ.

⁷Yiti bɔ oluale ne, ɔne bɔ oguaguale so nzue ne, bɛ de bɛtte huu; na mmom Nyameɛ bɔ ɔmaa onyini ne yeɛ ɔte piri ɔ.

⁸Bɔ oluale ne, ɔne bɔ oguaguale so nzue ne, bɛ mukoraa pɛ, na bɛ nu biala sa kɔha ye akatuaa kyɛbɔ ye bɔbɔ ye adwuma si te ɔ.

⁹ Ofikyɛ yɛ de, yɛte Nyameɛ adwumayɔlɛfoɛ, bɔ yɛ ne ye bɔ nu yɛyɔ adwuma ɔ; na ɛmɔte ye boo, Nyameɛ sua.

¹⁰Ɔnate kyɛ Nyameɛ ama me adom ne ati, ndole fapem kyɛ suasilɛniɛ nimdeɛniɛ, na sona foforɛ koso ɔ́to bie toa so. Na ebiala bɔ ɔto bie toa so ne, ɔnea kyɛ ɔkɔto ye yé ɔ.

¹¹Ofikyɛ Yesu Kristo ole fapem bɔ bali moa bato ye dada ne, na ebiala ngora ndo fapem foforɛ ko.

¹²Na sɛ ebie fa sikaa kɔkorɛ, ɛdwetɛ, nyɔbosanyene, bakaa, ndondonyi anaa ɛserɛ toa fapem ne aso a,

¹³ebiala adwuma kɔye ye nwo ali. Ndɛenbualɛ kyẽa ne kɔmaa ɔkɔla ali, ofikyɛ see kɔma ebiala adwuma kɔla ali, na see ne koso ebiala adwuma bɔ wayɔ ɔ kɔnea.

¹⁴Sɛ ebie adwuma bɔ wayɔ wafa watoa fapem ne aso kora gyina see ne noa a, okonya ye nwo akatuaa.

¹⁵ Na sɛ see ne yera ebie adwuma a, ɔkɔhwere nikye; ye bɔbɔ de, Nyameɛ kole ye ngoa, nakoso ɔte kyɛ watutu wafa see nu ɔ.

¹⁶ Aso ɛmɔnze kyɛ ɛmɔte Nyameɛ asɔneyɛɛ sua na Nyameɛ Sunzum te ɛmɔ nu ɔ?

¹⁷Yiti sɛ ebie sɛkye Nyameɛ asɔneyɛɛ sua a, Nyameɛ koso kɔsɛkye ye, ofikyɛ Nyameɛ asɔneyɛɛ sua te krongron, na ɛmɔ ole ye Asɔneyɛɛ sua ne.

¹⁸ Nnɛma ebiala lakalaka ye nwo. Sɛ ɛmɔ nu bie dwene kyɛ ɔse wiase nworɛ a, maa ɔyɛ kwaseaa ná wanwu nworɛ.

¹⁹ Na ewiase nworɛ te ngwaseasɛm wɔ Nyameɛ nyunu, ofikyɛ bahyerɛ kyɛ, “Nworɛfoɛ bɛ bɔbɔ bɛ kanda yeɛ ɔfa sua bɛ ngaen kye bɛ ɔ.”

²⁰ Osa kã ye bieku kyɛ, “Awurade se kyɛ nworɛfoɛ bɛ nzusuleɛ te mbaen.”

²¹Yiti nnɛma ebiala fa kuro sona hoahoa ye nwo, ɔnate kyɛ nikyee biala te ɛmɔ deɛ.

²²Pɔɔlo oo, Apolo oo, Kefa oo, ewiase oo, ngoa oo, ewue oo, ɛnɛ deɛ oo, anaa kyẽa bie deɛ oo, bɛ mukoraa bɛte ɛmɔ deɛ,

²³na ɛmɔte Kristo deɛ, yeɛ Kristo koso te Nyameɛ deɛ.