Read Sehwi 1 Korintofoɛ 4 Bible Online

1 Korintofoɛ 4 - Sehwi bible

1 Korintofoɛ 4

¹Odi kyɛ ebiala bu yɛ kyɛ yɛte Kristo asomvoɛ ne Nyameɛ mvealeɛ nu dwirɛ so neafoɛ.

²Afei koso, bɔ bɛpena ye wɔ somvoɛ mɔ nwo ole kyɛ bekoli nahorɛ ɔ.

³Na me de, ɔmva me nwo kyɛ ɛmɔ anaa sona biala kobua me ndɛen ɔ; me bɔbɔ po memmua me nwo ndɛen.

⁴Ofikyɛ me tiboa mmua me foɛ, nakoso ɛhe ngyire kyɛ mendɔ sii. Na Awurade yeɛ obua me ndɛen ɔ.

⁵Yiti nnɛma ɛmɔbua ndɛen koraka ná mmerɛ ne wadwu, koraka né Awurade awa, na ye yeɛ ɔkɔye mvealeɛ nu dwirɛ bɔ ɔwɔ awosii nu kofite ɔ, ná wasa mmenia ti anu nzusuleɛ wagua dwaaso. Na afei ebiala konya ɛkamvolɛ bɔ ɔfata ye ɔ kofi Nyameɛ berɛ.

⁶Aliɛmaa mɔ, ɛmɔ ti yeɛ mafa me ne Apolo yɛ nwo mayɛ mvandoho ye, amaa ɛmɔasua yɛ, ná ɛmɔammu bɔ bahyerɛ bato berɛ ne aso, ná ɛmɔ nu biala wamva sona bie wanhoahoa ye nwo wambɛ sona foforɛ poa.

⁷Nwa yeɛ osele wɔ kyɛ asora wɔ ngome ɔ? Nzu yeɛ ele ye bɔ nna Nyameɛ yeɛ ɔfa mmane wɔ ɔ? Na sɛ ɔfa mane wɔ de a, nzu ati yeɛ ɛfa hoahoa wɔ nwo kyɛ nna akyɛdeɛ ahɔ ɔ?

⁸Nna ɛmɔ ɔ! Ɛmɔ sa ahã bɔ ɛmɔpena ɔ dada! Ɛmɔanya bɛ nwo bayie. Ɛmɔakwati yɛ bayɛ bɛ nwo ahemvo! Me kunu a, ahaa ɛmɔte ahemvo amba, amaa yɛne ɛmɔ abɔ nu yali hene.

⁹Ofikyɛ ɔyɛ me kyɛ Nyameɛ wafa yɛ asomafoɛ wasie berɛ kyɛ mmenia bɔ babua bɛ kumfɔ ɔ, ɔnate kyɛ yayɛ ahyerɛ[1] yama ewiase ne abɔfo mɔ ne adasa mmaa.

¹⁰Kristo ti yayɛ ngwaseafoɛ, nakoso ɛmɔ de, ɛmɔayɛ nworɛfoɛ wɔ Kristo nu! Yɛyɛ mmerɛ, nakoso ɛmɔ de, ɛmɔ nwo yɛ se. Ɛmɔ de, bedi ɛmɔ nni, nakoso yɛ de, bemmu yɛ.

¹¹Ɛnɛ ne ɛnɛ ye, ɛhɔen ne nzuhɔen ku yɛ, yɛ nwo la so, bɛkã yɛ mbire, yeɛ yɛlle amandena,

¹² na yɛyere yɛ nwo yɛfa yɛ bɔbɔ yɛ sa yɛyɔ adwuma. Bɛbɔ yɛ alapaa a, yɛyirayira bɛ. Bɛtane yɛ nye a, yɛgyina pindinn.

¹³Bɛsɛkye yɛ dumaa a, yɛne bɛ nyaka. Yayɛ kyɛ ewiase fiɛ, na yayɛ nningyein mukoraa boso wura maa waadwu ɛnɛ.

¹⁴Mengyerɛ ɛhe memma ngua ɛmɔ nyunu ase, nakoso mefa metu ɛmɔ foɛ kyɛ me mma bɔ mekuro ɛmɔ dwirɛ ɔ.

¹⁵Na sɛ ɛmɔle foɛtulɛfoɛ apee buru wɔ Kristo nu po a, ɛmɔ baba mɔ de, bɛnzone, ofikyɛ ɔnate nzɛmba ne aso mayɛ ɛmɔ baba wɔ Yesu Kristo nu.

¹⁶ Yiti mesrɛ ɛmɔ kyɛ ɛmɔsua me.

¹⁷Ɛhe ati, mésoma mma Timoteo bɔ mekuro ye dwirɛ ná odi nahorɛ wɔ Awurade nu ne wɔ ɛmɔ berɛ, kyɛ ɔɔkayekaye ɛmɔ me Kristo nu brabɔlɛ, kyɛbɔ mekyirekyire ye asɔre biala nu wɔ nekaa biala ne.

¹⁸Ɛmɔ nu biemɔ di tutureasɛm kyɛ gyamea mengɔɔsra ɛmɔ.

¹⁹Sɛ Awurade ma me ate a, ɔngɔhyɛ biala ngɔwa ɛmɔ berɛ, ná maanwu bɛ bɔ bɛyɛ anwomasoɛ nemɔ bɛ tumi, na nna bɔ bɛkekã hɔ ɔ.

²⁰Ofikyɛ Nyameɛ ahennie ne oggyi edwudwolɛ mbaen so, na mmom ogyi tumi so.

²¹Beni yeɛ ɛmɔkuro ɔ? Kyɛ ngɔfa mbire, anaakyɛ ngɔfa ɔdɔ ne anwobrɛaseɛ ngɔwa ɛmɔ berɛ ɔ?