Read Sehwi 2 Korintofoɛ 1 Bible Online

2 Korintofoɛ 1 - Sehwi bible

2 Korintofoɛ 1

¹ Krataa he fi me, Pɔɔlo, bɔ ɔnate Nyameɛ pɛ so nde Kristo Yesu somafoɛ berɛ. Me ne aliɛmaa Timoteo yeɛ yɛhyerɛle ɔ. Yɛ́fa yɛbrɛ Nyameɛ asɔre bɔ ɔwɔ Korinto, ɔne anwoteefoɛ amukoraa bɔ bɛwɔ Akaia[1] mukoraa ɔ.

² Adom ne asomdwee bɔ ofi yɛ Baba Nyameɛ ne Awurade Yesu Kristo berɛ ɔyɛ ɛmɔ deɛ.

³ Animnyam hã Nyameɛ bɔ ɔte y’Awurade Yesu Kristo Baba ne, anwumvoinnwunɛ Baba ne aworakyekyerɛ mukoraa Nyameɛ ne,

⁴ bɔ ɔkyekye yɛ wora wɔ y’amaneɛnwunɛ mukoraa nu, amaa yɛ koso yahora yafa aworakyekyerɛ bɔ Nyameɛ fa kyekye yɛ wora ne yakyekye bɛ bɔ benwu amaneɛ ahoroɔ ɔ bɛ wora.

⁵Na kyɛbɔ yɛnwu Kristo amaneɛ worawora ne bie ne, sɔ ala yeɛ yɛnate Kristo so yɛnya aworakyekyerɛ mmorosoɛ ɔ.

⁶ Na sɛ yɛnwu amaneɛ a, né ɛmɔ aworakyekyerɛ ne ɛmɔ ngoalelɛ ti ɔ; yeɛ sɛ yɛnya aworakyekyerɛ a, né ɛmɔ aworakyekyerɛ ti ɔ, bɔ sɛ ɛmɔle aboterɛ begyina amaneɛ bɔ yɛ koso yɛnwu ye ne noa bie a, ɛmɔ sa kã ye ne.

⁷Yiti y’anyelasoɛ bɔ yele yɛma ɛmɔ ne gyi berɛ pindinn, ofikyɛ yɛse kyɛ, kyɛbɔ ɛmɔ ne yɛ nwu amaneɛ ye ne, sɔ ala yeɛ ɛmɔ ne yɛ konya aworakyekyerɛ ɔ.

⁸ Aliɛmaa mɔ, kyɛbɔ yɛ nwo si hyerele yɛ wɔ Asia nen, yɛmbena kyɛ yɛfa yɛsie ɛmɔ, ofikyɛ yɛ nwo hyerele yɛ paa maa ɔbole yɛ so, na afei yɛ ngoa nwo anyelasoɛ mukoraa tu minini.

⁹Yɛ bɔbɔ ala yɛtele nga wɔ yɛ nu kyɛ yawu yayie, nakoso ɛhe maa yamva yɛ nwo yando yɛ nwo so; na mmom yɛfale yɛ nwo yɛtole Nyameɛ bɔ otingye awufoɛ ne so.

¹⁰ Ye yeɛ ɔyele yɛ fili ewue suronyisuronyi sɔa nu ɔ, na ɔkɔpepɛ kole yɛ; ye yeɛ yafa yɛ wora yawura ye nu ɔ, kyɛ okosa kɔpepɛ kole yɛ ɔ.

¹¹Odi kyɛ ɛmɔ koso ɛmɔboka yɛ wɔ mbaeɛbɔlɛ nu, amaa mmeni pee bala Nyameɛ ase ama yɛ kyɛ wafa mmeni soma mbaeɛ so wafa sɔ adom ye walo yɛ ɔ.

¹²Bɔ yɛfa yɛhoahoa yɛ nwo ɛhe: yɛ tiboa di yɛ adanzeɛ kyɛ yafa nahorɛlilɛ ne nyamesuro yeɛ yabɔ yɛ bra wɔ wiase ɔ, nganga yɛ ne ɛmɔ asetena nu. Yamva ewiase nworɛ so yeɛ yɛbɔle yɛ bra ɔ, na mmom yɛnate Nyameɛ adom so.

¹³Na yɛngyerɛ hwee yɛmmrɛ ɛmɔ sana bɔ ɛmɔkɔhora ye kenga ná ɛmɔkɔte ye bo ɔ. Mede medi kyɛ ɛmɔkɔte ye bo bekoyie bɔkɔɔ,

¹⁴kyɛbɔ ɛmɔate yɛ bo bue bue ne, amaa ɔnate so ɛmɔafa yɛ bahoahoa ɛmɔ nwo kyɛbɔ yɛ koso yɛkɔfa ɛmɔ yɛkɔhoahoa yɛ nwo wɔ Awurade Yesu kyẽa ne.

¹⁵Ɔnate kyɛ m’adwene si pi wɔ ɛhe anwo ne ati, nyɛle m’adwene kyɛ medi moa meba ɛmɔ berɛ, amaa ɛmɔanya saleɛ mmɔhoɛ.

¹⁶ Nyɛle kyɛ sɛ mesẽ mekɔ Makedonia a, ahaa ngɔɔpasa ɛmɔ nwo, yeɛ sɛ mvi dɔ mesa meba koso a, masa maapasa ɛmɔ nwo, ná ɛmɔagua m’ate maa mahɔ Yudea.

¹⁷Nzusuleɛ he bɔ nyɛle ye, aso okyire kyɛ m’adwene yɛ me ndaa ndaa anaa? Aso meyɛ me nhyehyɛleɛ wɔ anwoɔnaen nu, bɔ mekã “Yoo” a, né mesa mekyire “Daabi” ɔ?

¹⁸Na kyɛbɔ Nyameɛ di nahorɛ ngome ye de, yɛnga “Yoo” na yasa yahã “Daabi” yahyire ɛmɔ.

¹⁹ Ofikyɛ Nyameɛ Awa Yesu Kristo bɔ me ne Silwano ne Timoteo yɛhane ye nwo dwirɛ yɛhyirele ɛmɔ ne, ɔnga “Yoo” na wasa wahã “Daabi”; na mmom mmerɛ biala ɔma ye “Yoo” yɛ yoo.

²⁰ Ofikyɛ Nyameɛ bɔhyɛ bɔ ɔwɔ ye nu amukoraa te “Yoo.” Na ɔnate sɔ ne ati, ye so yeɛ yɛfa yɛkã “Amen” yɛhyɛ Nyameɛ animnyam ɔ.

²¹Nakoso Nyameɛ yeɛ wamaa yɛ ne ɛmɔ yatindim wɔ Kristo nu ɔ, watu yɛ wasie berɛ kyɛ yɛyɔ ye adwuma.

²² Wafa ye nzɔanoɛ wahyɛ yɛ nzorɛ, na wama ye Sunzum ne atena yɛ nu asi yɛ nzolɛhyɛlɛ ne agyinayɛɛ.

²³Na afei mefrɛ Nyameɛ kyɛ oli me adanzeɛ; né membena kyɛ mebɔ ɛmɔ wora ti yeɛ manza mamma Korinto ɔ.

²⁴Nna kyɛ yɛhyɛ ɛmɔ so wɔ ɛmɔ gyidie nwo ɔ, na mmom kyɛbɔ ɛmɔ nye kɔha ti yeɛ yɛ ne ɛmɔ yɔ adwuma yɛbɔ nu ɔ, ofikyɛ ɛmɔ gyidie gyi berɛ pindinn.