Read Sehwi 2 Korintofoɛ 5 Bible Online

2 Korintofoɛ 5 - Sehwi bible

2 Korintofoɛ 5

¹Na yɛse kyɛ sɛ yɛ aseɛ ye aso ɛtena sua ne sɛkye a, yɛkonya awuro bɔ ofi Nyameɛ berɛ, bɔ nna sona yeɛ osili ɔ, bɔ ɔwɔ nyameɛso afebɔɔ.

²Ɛtena sua he anu de, yɛpene, ofikyɛ yɛpere kyɛ bɛkɔfa nyameɛso awuro ne bekopuro bɔ yɛte nu ne aso.

³Na sɛ yɛfa nyameɛso deɛ ne yɛpuro so a, yɛ nwo ngɔla so.

⁴Ofikyɛ mmerɛ bɔ yɛwɔ ɛtena sua he anu ye de, yɛpene. Nna kyɛ ebiaa yɛpena kyɛ bepuro befi yɛ nwo ɔ, na mmom yɛpena kyɛ bɛfa nyameɛso deɛ ne bepuro so, amaa ngoa abungam bɔ owu so bɔkɔɔ.

⁵Nyameɛ yeɛ wasiesie yɛ wama sɔ nhyehyɛleɛ ye ɔ, na wafa ye Sunzum ne wasi ye agyinayɛɛ.

⁶Yiti mmerɛ biala yɛle anyelasoɛ. Na yɛse kyɛ mmerɛ bɔ yɛwɔ awuro wɔ anwoɔnaen he anu ye de, yɛ ne Awurade afia atee wale;

⁷ofikyɛ gyidie yeɛ yɛfa yɛnate ɔ, nna bɔ anyeɛ nwu ye ɔ.

⁸Yɛle anyelasoɛ, na yɛkuro kyɛ yɛfi sɔ anwoɔnaen he anu ná yɛne Awurade yaatena.

⁹Yiti yafa yasie yɛ nye so kyɛ, sɛ yɛwɔ anwoɔnaen he anu oo, sɛ yɛnne nu oo, yɛkɔsɔ Awurade nye.

¹⁰ Ofikyɛ, odi kyɛ yɛ mukoraa yɛkogyina Kristo ndɛenbualɛ bia ne nyunu. Na bɔ sona biala wayɔ ye wɔ sɔ anwoɔnaen he anu ne, kyɛ paa oo, anaa bɔne oo, okonya ye nwo akatuaa.

¹¹Ɔnate kyɛ yɛse kyɛbɔ Awurade nwo suronyi si te ɔ ne ati, yɛbɔ mmɔden kyɛ yɛkɔma mmenia kosuro ye ɔ. Nyameɛ se kyɛbɔ yɛsi yɛte ɔ, na mede medi kyɛ ɛmɔ tiboa koso ma ɛmɔse kyɛbɔ yɛsi yɛte ɔ.

¹² Yɛngamvo yɛ nwo ngyire ɛmɔ ko, na mmom yɛma ɛmɔnya atee ɛmɔfa yɛ bɛhoahoa ɛmɔ anwo, amaa ɛmɔanya nyeanoɛ bama mmenia bɔ bɛmva bɔ ɔwɔ ahone nu, na mmom bɛfa bɛ nye so nikyee bɛhoahoa bɛ nwo ne.

¹³Sɛ y’adwene asɛkye a, wasɛkye wama Nyameɛ; yeɛ sɛ y’adwene nu la berɛ a, ɔla ma ɛmɔ.

¹⁴ Na Kristo dɔ ne di yɛ so, ofikyɛ yɛde yɛto nu kyɛ sɛ sona ko wu mane mmenia mukoraa a, nzaade mmenia mukoraa bawu.

¹⁵Owu mane mmenia mukoraa, amaa bɛ bɔ bɛte ase ne bandena bamma bɛ nwo ko, na mmom batena bama bɔ bɛ ti owuli ná otingyele ne.

¹⁶Yiti ofi ɛnɛ bɔ ɔkɔ ɔ, yɛmva dasaniɛ adwene yɛnzusu kyɛbɔ sona si te ɔ, na sɛ sɔ yeɛ daa ne yɛfa yɛsusuli Yesu a, ɛnɛ de yɛnyɔ ye sɔ ko.

¹⁷ Yiti sɛ ebie fa ye nwo bɔ Kristo a, né wayɛ abɔdeɛ foforɛ, nningyein daa ne apɛ nu; amba nningyein mukoraa ayɛ foforɛ.

¹⁸ Nyameɛ yeɛ wayɔ ɛhe amukoraa ɔ. Ɔnate Yesu Kristo so wafa yɛ wabata ye nwo, na wafa ngabonu he nwo dwumadie wawura yɛ sa:

¹⁹kyɛ, Nyameɛ nate Kristo so wahwe ewiase wabata ye nwo, wammu bɛ bɔne nwo ngondaa wandia bɛ, na wafa ngabonu he nwo dawurebɔlɛ wawura yɛ sa.

²⁰ Yiti yɛte ɛbɔfoɛ ma Kristo bɔ Nyameɛ fa yɛ so tu foɛ ɔ; na yɛgyi Kristo gya nu yɛsrɛ ɛmɔ kyɛ, ɛ́mɔma ɛmɔ nwo ate ma Nyameɛ fa ɛmɔ bata ye nwo.

²¹ Ofikyɛ bɔ wanyɔ bɔne ne, Nyameɛ maa fale ye kakyili bɔne mane yɛ, amaa ɔnate ye so yanya Nyameɛ tenenee ne bie.