Read Sehwi 2 Korintofoɛ 6 Bible Online

2 Korintofoɛ 6 - Sehwi bible

2 Korintofoɛ 6

¹ Yɛte bokafoɛ wɔ Nyameɛ adwuma nu, yiti yɛsrɛ ɛmɔ kyɛ, nnɛmɔma Nyameɛ adom bɔ ɛmɔanya ye ne yɛ mbaen.

² Ɔnate kyɛ ɔnwa: “Mmerɛ bɔ ɔsɛ ɔ nu ndiele wɔ, na mmokale wɔ wɔ ngoalelɛ kyẽa ne. Menwa ɛnɛ te adom mmerɛ, ɛnɛ te ngoalelɛ kyẽa.”

³Yɛndo ebiala sundidua, ná ebiala angã yɛ som ne nwo dwirɛ tɛɛ.

⁴ Na mmom yɛye yɛ nwo ali yekyire kyɛ yɛte Nyameɛ asomvoɛ wɔ atee biala so: wɔ aboterɛ pee nu, amaneɛ nu, anwokyere nu, ateetee nu;

⁵ ɛbolɛ nu, kuku nu nnaa nu, basabasayɛlɛ nu, ɛfɛɛ nu, ɛpɛsilɛ nu, ɛhɔen hunɛ nu;

⁶anwotelɛ bra nu, nimdeɛ nu, animia nu, paayɛlɛ nu, Sunzum Krongron nu, ɔdɔ kaenn nu,

⁷ nahorɛ dwirɛ hanɛ nu, Nyameɛ tumi nu, yeɛ tenenee akodeɛ wɔ yɛ bɛen ne famaa so.

⁸Bedi yɛ ni ná basa bagua yɛ nyunu ase, bɛkã yɛ nwo dwirɛ tɛɛ ná basa baye yɛ ayɛ; yɛkã nahorɛ nakoso bɛnwa yɛte nnakannaka,

⁹ bayɛ kyɛ bɛnze yɛ nakoso bɛse yɛ paa, yayɛ kyɛ yawu nakoso amba, yɛte ase, bɛhyɛ yɛ anyeborolɛ, nakoso behhuni yɛ;

¹⁰yayɛ kyɛ yɛ wora abɔ nakoso yɛ nye gye daa, yayɛ kyɛ ehiafoɛ nakoso yɛma mmeni pee benya bɛ nwo, yayɛ kyɛ yɛlle huu nakoso yɛle nningyein mukoraa.

¹¹O Korintofoɛ, yapakyepakye nu yadwudwo yahyire ɛmɔ, yaye y’ahone nu dwirɛ mukoraa yahyire ɛmɔ.

¹²Yahyire kyɛ ɛmɔbata y’ahone nwo, nakoso ɛmɔ de ɛmɔngyire kyɛ yɛbata ɛmɔ ahone nwo.

¹³Yiti ɔsɛ kyɛ ɛmɔ wora ɛmɔmaa yɛnwu ye kyɛ yɛ koso yɛbata ɛmɔ ahone nwo. Ɛhe de medwudwo mekyire ɛmɔ kyɛ me mma oo.

¹⁴Nnɛma ɛmɔfa bɛ nwo bɛbɔ mmenia bɔ benne benni ɔ, ofikyɛ abiɛngoɛfalɛ beni yeɛ ɔla tenenee ne amumuyɛɛ b’afia ɔ? Anaakyɛ abiɛngoɛfalɛ beni yeɛ ɔla kanea ne awosii b’afia ɔ?

¹⁵Koyɛlɛ beni yeɛ ɔwɔ Kristo ne Belia b’afia ɔ? Anaakyɛ abiɛngoɛfalɛ beni yeɛ ɔla gyidiniɛ ne sona bɔ onne nni b’afia ɔ?

¹⁶ Nzikyɛ ngitahoɛ yeɛ ɔwɔ Nyameɛ asɔneyɛɛ sua ne mmosoen b’afia ɔ? Ofikyɛ yɛte Nyameɛ teasefoɛ n’asɔneyɛɛ sua, na Nyameɛ waha ne, “Me ne bɛ kɔtena, na me ne bɛ yanate, Ngɔyɛ bɛ Nyameɛ, na bɛ wora bayɛ me maen.”

¹⁷ Yiti Awurade nwa nyoo: “Ɛ́mɔfi bɛ nu befite, ná ɛmɔhwe ɛmɔ nwo béfi bɛ nwo; nnɛma ɛmɔfa ɛmɔ nwo bɛkã nikyee bɔ ye nwo nde ɔ, na ngole ɛmɔ.

¹⁸ Ngɔyɛ ɛmɔ Baba na ɛmɔ wora ɛmɔayɛ me mma mmienzua ne mmrasua. Bɔ Tuminiɛ Awurade kã hɔ ɛne.”