Read Sehwi 2 Korintofoɛ 7 Bible Online

2 Korintofoɛ 7 - Sehwi bible

2 Korintofoɛ 7

¹Aliɛmaa mɔ, ɔnate kyɛ yanya bɔhyɛ hemɔ ne ati, ɛ́mɔma yɛte yɛ nwo yɛfi nikyee biala bɔ ogua anwoɔnaen ne sunzum nwo fiɛ nwo, ná yɛfa Nyameɛ surolɛ nu yɛma yɛ bra yɛ krongron.

² Odi kyɛ ɛmɔfa yɛ bɛbata ɛmɔ ahone nwo; yɛyyɛle ebiala tɛɛ, yɛssɛkyele ebiala, yeɛ yɛllili ebiala aminɛ.

³ Menga he memmua ɛmɔ foɛ, ofikyɛ mali moa mahã kyɛ ɛmɔbata y’ahone nwo, bɔ sɛ ewue nu oo, ngoa nu oo, yɛne ɛmɔ ala.

⁴Mede ɛmɔ medi paa, na mefa ɛmɔ mehoahoa me nwo koso paa. Me wora akyekye paa, na ɔwɔ nu kyɛ yɛfa amaneɛ nu de, nakoso m’anika abu afa so koraa.

⁵ Mmerɛ bɔ yɛhɔle Makedonia nen, yɛfɛle yɛ nwonaen nu paa, na ɛhawo wale yɛ so wɔ nekaa biala: ngondii pɛle yɛ nwo yiale, na yɛ bɔbɔ yɛ nu koso ɛserɛ hane yɛ.

⁶ Nakoso Nyameɛ bɔ ɔkyekye bɛ bɔ bɛ wora abɔ wora ne, ɔfale Tito walɛ ne aso kyekyele yɛ wora.

⁷Nna ye walɛ ne angome, na mmom aworakyekyerɛ bɔ onya fili ɛmɔ berɛ ne koso boka so. Ofikyɛ ɔbɔle yɛ amaneɛ kyɛ ɛmɔ wora dɔ me, aworabɔlɛ aha ɛmɔ, na ɛmɔgyi me si, na ɛhe maa nyane anika mmorosoɛ.

⁸ Sɛ mvale me krataa ne mmamɔle ɛmɔ wora po a, nnuni me nwo, nakoso kekesaala ye de nnnuni me nwo. Ofikyɛ manwu kyɛ sɔ krataa ne mane ɛmɔ wora bɔle wɔ mmerɛ kãa bie ala.

⁹Na kekesaala ye de me nye ahã, nna kyɛ ɛmɔ wora bɔ ɔbɔle ne ati ɔ, na mmom ɛmɔ aworabɔlɛ ne maa ɛmɔnyane adwenesakyera. Ofikyɛ Nyameɛ fale ɛmɔ aworabɔlɛ ne aso lili dwumaa, yiti yanyɛ ɛmɔ tɛɛ biala.

¹⁰Aworabɔlɛ bɔ ɔnate Nyameɛ surolɛ so ba ne ma adwenesakyera bɔ ɔfa sona kɔ ngoalelɛ nu ɔ, na ɔmma sona nnu ye nwo. Nakoso ewiase aworabɔlɛ de ɔfa sona kɔ ewue nu.

¹¹Na sɔ aworabɔlɛ he bɔ ɔnate Nyameɛ surolɛ so wawa ye, ɛmɔnea dwumadie paa bɔ wali wɔ ɛmɔ nu ɔ: bɛ noa yelɛ nu, ahinzɛm nu, ɛserɛ nu, me nwo aworadɔlɛ, ɛmɔ mmɔdenbɔlɛ nu, ɔne wereɛtɔlɛ nu. Na atee biala so ɛmɔahyire kyɛ ɛmɔnni fɔ wɔ ɛhemɔ nwo.

¹² Nna bɔ wayɔ ebie tɛɛ, anaa bɔ ebie ayɔ ye tɛɛ ti yeɛ ngyerɛle krataa ne mmrɛle ɛmɔ ɔ; na mmom ngyerɛ mmrɛle ɛmɔ, kyɛbɔ ɔkɔyɛ ná mmɔden bɔ ɛmɔbɔ wɔ yɛ nwo ne ala ali ama ɛmɔ wɔ Nyameɛ nyunu.

¹³Ye sɔ ne ati, yɛ wora akyekye. Nna yɛ wora ngome yeɛ wakyekye ɔ, na Tito anika ne koso ama yɛ anika mmorosoɛ; ofikyɛ ɛmɔ amukoraa bɛbokale maa onyane aworakyekyerɛ.

¹⁴Na sɛ mvale ɛmɔ nhoahoale me nwo ngyirele ye a, ɛmɔamma me nyunu angua ase. Na kyɛbɔ edwirɛ biala bɔ yɛhã yɛhyirele ɛmɔ te nahorɛ nen, sɔ ala yeɛ ɛmɔ nwo bɔ yɛhoahoale yɛhyirele Tito ne koso ayɛ nahorɛ ɔ.

¹⁵Na sɛ Tito kaye kyɛbɔ ɛmɔ amukoraa ɛmɔyɛle sotie bɛmane ye, ɔne kyɛbɔ ɛmɔsi bɛfale esuronyi ne anwopopolɛ belele ye nyemene so ne a, né okuro ɛmɔ dwirɛ soma.

¹⁶Yiti ɔyɛ me fɛ kyɛ manya gyidie wɔ ɛmɔ nu wɔ nikyee biala nu ɔ.