Read Sehwi 2 Korintofoɛ 8 Bible Online

2 Korintofoɛ 8 - Sehwi bible

2 Korintofoɛ 8

¹ Aliɛmaa mɔ, yɛpena kyɛ ɛmɔnwu adom bɔ Nyameɛ afa alo Makedonia asɔre nemɔ ɔ.

²B’anwokyere ne nzɔhwɛ kandinga ne asi, benyane anika mmorosoɛ wɔ bɛ hiaa ne anu maa bɛyele bɛ kunu bɛyɔle adɔeɛ kandinga paa.

³ Ofikyɛ bɛyele bɛ kunu bɛyɔle adɔeɛ kyɛbɔ bɛkɔhora ɔ, na medi bɛ nwo adanzeɛ kyɛ bɛmane bɔ ɔbo b’anwoserɛ so po.

⁴ Na bɛkoto bɛsrɛle yɛ pee kyɛ yɛle b’akyɛdeɛ ne, ná yɛma bɛ koso bɛɛboka anwoteefoɛ nemɔ bie.

⁵Nna bɔ yɛsusuli ne ngome po yeɛ bɛyɔle ɔ, na mmom ɔnate Nyameɛ pɛ so belili moa bɛfale bɛ nwo bɛmane Awurade, na afei bɛyɔle sɔ bɛmane yɛ koso.

⁶ Na yasrɛ Tito bɔ olili moa hyɛle adwuma ne abo ne kyɛ ɔɔtoa so ná oyie sɔ adom adwuma ne wɔ ɛmɔ nu.

⁷Na kyɛbɔ ɛmɔbɔ mmɔden mmorosoɛ wɔ nikyee biala nu: gyidie nu, edwudwolɛ nu, nimdeɛ nu, mmɔdenbɔlɛ nu, ɔne kyɛbɔ ɛmɔsi bekuro yɛ dwirɛ ɔ nu ne, ɛ́mɔnea kyɛ sɔ adɔeɛ adom he koso ɛmɔkɔfa bɛkɔyɔ adwuma mmorosoɛ ɔ.

⁸Mendwudwo nhyɛsoɛ so, na mmom mefa ebiemɔ mmɔdenbɔlɛ metoto ɔdɔ bɔ ɛmɔle ye ne anwo menea kyɛ sɛ ɔte kaenn a.

⁹ Ɛmɔse kyɛbɔ y’Awurade Yesu Kristo adom ne si te ɔ: né wanya ye nwo, nakoso ɔnate ɛmɔ ti ɔyɛle hianiɛ, amaa ɛmɔafa ye hiaa ne aso banya bɛ nwo.

¹⁰ Nzusuleɛ bɔ meyɔ ɛhe, na ɔte paa ma ɛmɔ. Ɛmɔ yeɛ afoɛ hene ɛmɔlili moa benyane adwene kyɛ ɛmɔkɔboka ɔ, na ɛmɔ koso ala yeɛ ɛmɔlili moa bɛkekane bɛ sa ase ɔ.

¹¹Yiti ɛmɔbɔ mmɔden beyie sɔ adɔeɛ adwuma ne bɛfa bɛfoa adwene bɔ ɛmɔnyane ye ne aso, kyɛbɔ ɛmɔ anwoserɛ kohyire ɔ.

¹²Na sɛ ɛmɔaye bɛ kunu kyɛ ɛmɔkɔboka a, nikyee bɔ sona le ye fa ma ne yeɛ ɔsɔ anyeɛ ɔ, na nna nikyee bɔ olle bie ne ɔ.

¹³Yɛngyire kyɛ ɛ́mɔma ebiemɔ nwo tɔ bɛ ná ɛmɔ de ɛmɔ nwo hyere ɛmɔ,

¹⁴na mmom kyɛ mmokalɛ ne kɔyɛ pɛpɛɛpɛ yeɛ yɛpena ɔ. Na kekesaala ye bɔ ɛmɔ sa nu le bie ye, ɔte paa kyɛ ɛmɔkɔye bɛ kofi anwokyere nu, amaa sɛ ɛmɔ wora ɛmɔ nwo kyere ɛmɔ ná bele bie a, bɛ koso baboka ɛmɔ, amaa mmokalɛ ne ayɛ pɛpɛɛpɛ.

¹⁵ Ofikyɛ bahyerɛ kyɛ, “Bɔ ɔboaboale pee noa ne annya ye ma wammo so, yeɛ bɔ ɔboaboale kãa bie noa ne koso anhia nikye fee.”

¹⁶Yɛda Nyameɛ ase kyɛ wafa ɛmɔ nwo mmɔden bɔ yɛbɔ ne ala wawura Tito ahone nu ɔ.

¹⁷Nna yɛ nikyeesrɛlɛ ne ngome yeɛ wasɔ nu ɔ, na mmom ɔnate ye mmɔdenbɔlɛ ti ɔfa ye bɔbɔ ye pɛ ɔ́ba ɛmɔ berɛ.

¹⁸ Na yɛ́soma ye ne aliɛmaa bɔ ɔnate nzɛmbahanɛ mmɔdenbɔlɛ ti bɛkamvo ye wɔ asɔre ne amukoraa nu ne.

¹⁹ Asa koso, asɔre mma ne aneanea nu baye ye kyɛ ɔne yɛ nate wɔ sɔ adom adwuma bɔ yafa yato yɛ nwo so ne anu, na yɛyɔ sɔ yɛfa yɛhyɛ Awurade animnyam, ná yɛsa yɛkyire yɛ mmɔdenbɔlɛ.

²⁰Yɛmbena kyɛ ebiala nya yɛ nwo dwirɛ tɛɛ kã fa sɔ adɔeɛ nningyein bɔ yɛnea so ye nwo.

²¹ Ofikyɛ yafa yasie yɛ nye so kyɛ yɛtoto nikyee biala pɛpɛɛpɛ, nna Awurade ngome nyunu, na kuro sona koso nyunu.

²²Na yɛ́soma y’eliɛma bɔ yanwu ye atee pee so kyɛ ɔbɔ mmɔden wɔ nningyein pee nu ne maa ɔboka bɛ so. Na kekesaala ye de po, okuro kyɛ ɔboka paa, ofikyɛ wanya gyidie piri paa wɔ ɛmɔ nu.

²³Tito de, ɔte mmiɛngo ne nniɛma adwumayɔlɛniɛ ma ɛmɔ, na aliɛmaa nemɔ wora bɛte asɔre nemɔ somafoɛ, bɛte Kristo animnyam.

²⁴Yiti ɛ́mɔye ɔdɔ ali behyire bɛ, na ɛ́mɔma ɔyɛ adanzeɛ wɔ asɔre nemɔ nyunu kyɛ m’anwohoahoa wɔ ɛmɔ nwo ne te nahorɛ.