Read Sehwi Galatiafoɛ 1 Bible Online

Galatiafoɛ 1 - Sehwi bible

Galatiafoɛ 1

¹ Me Pɔɔlo, offi kuro sona, yeɛ ɔnnate sona so; na mmom ɔnate Yesu Kristo ne Baba Nyameɛ bɔ otingyele ye fili awofoɛ nu ne so yeɛ maayɛ somafoɛ ɔ.

² Me ne aliɛmaa mɔ mukoraa bɔ bɛboka me so yeɛ yɛfa krataa he yɛbrɛ Galatia asɔre nemɔ ɔ.

³ Adom ne asomdwee bɔ ofi Baba Nyameɛ ne Awurade Yesu Kristo berɛ ɔyɛ ɛmɔ deɛ.

⁴ Ye yeɛ ɔfale ye ngoa tole berɛ mane yɛ bɔne ɔ, amaa ɔnate so waye yɛ wafi kekesaala ye bɔne wiase ye anu, kyɛbɔ yɛ Baba Nyameɛ apɛdeɛ te ne.

⁵ Ye yeɛ animnyam ɔhã ye afebɔɔ ɔ. Amen.

⁶ Ɔyɛ me nwanwa kyɛ wangyɛ biala yeɛ ɛmɔtwe ɛmɔ nwo befi ye nwo ɔ, ye bɔ ɔfrɛle ɛmɔ wale Kristo adom ne anu, ná ɛmɔkwaali nzɛmba foforɛ si ɔ.

⁷ Nakoso nzɛmba foforɛ biala nne berɛ; na mmom mmenia biemɔ wɔ berɛ bɔ bɛha ɛmɔ, bɔ bɛpena kyɛ bɛsesã Kristo nzɛmba ne ɔ.

⁸ Nakoso sɛ yɛ, anaa abɔfo bie fi nyameɛso po ba bakã nzɛmba foforɛ bɔ ɔne yɛ deɛ bɔ yahã yahyire ɛmɔ ne bɛnzɛ a, ye de ye yaakɔ!

⁹ Yahã ye daa, na mekã ye bieku, sɛ ebie bakã nzɛmba foforɛ bɔ ɔne yɛ deɛ bɔ ɛmɔale bato nu ne bɛnzɛ a, abue bu ye!

¹⁰ Afei, kuro sona, anaa Nyameɛ yeɛ mepena kyɛ ɔkamvo me ɔ? Anaa mepena kyɛ mesɔ adasa nye? Sɛ kuro sona yeɛ ngu so mesɔ ye nye a, ahaa nnde Kristo akoaa.

¹¹ Aliɛmaa mɔ, mepena kyɛ ɛmɔnwu ye kyɛ nzɛmba bɔ nga ngyirele ɛmɔ ne, nna kuro sona deɛ ɔ.

¹² Ɔnate kyɛ mannya mamvi kuro sona berɛ, yeɛ bangyire me koso; na mmom Yesu Kristo yeɛ ɔyele ye ali hyirele me ɔ.

¹³ Ɛmɔate me daa brabɔlɛ bɔ né nwɔ nu wɔ Yudasom nu, ɔne kyɛbɔ ndanene Nyameɛ asɔre ne nye anyeborolɛ so, na mmɔle mmɔden kyɛ ngɔsɛkye ye ɔ.

¹⁴ Na nyane ngɔsoɛ wɔ Yudasom nu ndrale Yudafoɛ pee bɔ me ne bɛ bɔ tipɛen, na nzɔle me nana mɔ amammerɛ ne anu serɛserɛ.

¹⁵ Nakoso Nyameɛ bɔ ɔneaneane nu yele me koraka yeɛ bɛbaawo me, na ɔlole me frɛle me ne, mmerɛ bɔ ɔsɔle ye nye

¹⁶ kyɛ ɔkɔla Ɔwa ne ali kohyire me, amaa ɔnate so mahã ye nwo nzɛmba ne mahyire Amaenmaensofoɛ ne, berɛ ne ala manzusu ye nwo mangyire sona biala.

¹⁷Yeɛ mangɔ asomafoɛ bɔ belili me nyunu moa ne berɛ wɔ Yerusalem, na mmom ngɔle Arabia, na nziɛ ye nza male Damasko bieku.

¹⁸ Na afoɛ nza si ne, ngɔ nzrale Kefa wɔ Yerusalem, na nnili ye berɛ eleburu ne nnu.

¹⁹ Nakoso mannwu asomafoɛ ne anu biala, sana Awurade aliɛma Yakobo.

²⁰ Na edwirɛ bɔ mekyerɛ mebrɛ ɛmɔ ye, Nyameɛ nyunu, membɛ ngondombo.

²¹ Na ɛhe asi ne, ngɔle Siria ne Kilikia mbɔtam.

²² Né Kristo asɔre mɔ bɔ bɛwɔ Yudea ne bennwuni me nyunu le.

²³ Bɔ né bate hɔ ala ɛhe: “Sona bɔ né daa ɔtane yɛ nye ne, afei de ɔbɔ gyidie bɔ ahaa ɔpena kyɛ ɔsɛkye ye ne nwo dawure.”

²⁴ Na ɔnate me ti bɛhyɛle Nyameɛ animnyam.