Read Sehwi Galatiafoɛ 5 Bible Online

Galatiafoɛ 5 - Sehwi bible

Galatiafoɛ 5

¹ Kristo ama yɛ fawɔnwodi amaa yayɛ nnehyeɛ. Yiti ɛ́mɔgyina pindinn, na nnɛma ɛmɔfa ɛmɔ nwo bewura ngoaasolɛ nu ko.

² Ɛ́mɔtie! Me, Pɔɔlo, mekã mekyire ɛmɔ kyɛ sɛ ɛmɔmaa bɛpɛ ɛmɔ bienzua a, Kristo nwo ngɔwa mvasoɛ biala ngɔma ɛmɔ.

³ Na mebɔ kɔkɔ bieku kyɛ, sona biala bɔ ɔkɔmaa bɛkɔpɛ ye bienzua ne, mmeraa ne kyekye ye, na ɔsɛ kyɛ odi ye mukoraa so.

⁴ Ɛmɔ bɔ ɛmɔpena kyɛ bɛfa mmeraa ne aso bebua ɛmɔ be nen, ɛmɔ ne Kristo afia atete, na Nyameɛ adom abɔ ɛmɔ.

⁵ Na yɛ de, gyidie yeɛ yɛfa yɛnate Sunzum ne so bɔ yanya tenenee nwo anyelasoɛ ɔ.

⁶ Ofikyɛ sɛ yɛne Kristo Yesu yɛ ko de a, bienzuapɛlɛ oo, nna bienzuapɛlɛ oo, ye nwo nhia, na mmom gyidie bɔ ɔnate ɔdɔ so yɔ adwuma yeɛ ohia ɔ.

⁷ Né ɛmɔtu amirika ne paa! Na afei nwa yeɛ osili ɛmɔ ate bɔ ɔmaa ɛmɔyɛ nahorɛ ne nwo asoserɛ ɔ?

⁸Bɔ ɔfrɛle ɛmɔ ne, nna ye yeɛ osele ɛmɔ kyɛ ɛmɔyɔ sɔ ɔ.

⁹ Mɔle harewaa kãa bie yeɛ ɔma mɔle torɛ ne amu keka ɔ.

¹⁰ Mede ɛmɔ medi wɔ Awurade nu kyɛ ɛmɔngonya adwene foforɛ biala. Na mmom ebiala bɔ ɔha ɛmɔ nen, sɛ ɔte nzikyɛ sona po a, okonya ye nwo akatuaa.

¹¹ Aliɛmaa mɔ, sɛ mekɔ so mekã kyɛ bienzuapɛlɛ nwo hia a, nzu ati yeɛ bɛkɔ so bɛtane me nye ɔ? Nzaade ahaa mmeamudua ne sundidua ne ɔnne berɛ ko.

¹²Na sɛ ɔhale me ngome a, ahaa bɛ bɔ bɛsɛkye ɛmɔ adwene ne atutu bɛ bienzua bo bagua!

¹³ Aliɛmaa mɔ, bafrɛ ɛmɔ bawa fawɔnwodi nu; yiti nnɛmɔma fawɔnwodi ne diedie ɛmɔ kɔ anwoɔnaen akɔnnɔ nu, na mmom ɛ́mɔfa ɔdɔ so bɛso bɛ nwo ngoko ngoko.

¹⁴ Ofikyɛ babɔ mmeraa ne amukoraa porɛ komapɛ kyɛ, “Kuro ebiɛngo dwirɛ kyɛ wɔ bɔbɔ wɔ nwo.”

¹⁵Nakoso sɛ ɛmɔkeka ná ɛmɔpurapura ɛmɔ nwo de a, ɛ́mɔnea yé ná ɛmɔangukũ ɛmɔ nwo.

¹⁶ Bɔ mekã ɛhe: ɛ́mɔnate Sunzum nu, na nnɛma ɛmɔdi anwoɔnaen akɔnnɔ si.

¹⁷ Ofikyɛ anwoɔnaen akɔnnɔ ko tia Sunzum ne, na Sunzum koso ko tia anwoɔnaen akɔnnɔ ne. Bɛ munyɔ benyia, yiti ɔmaa ɛmɔngora nyɔ nikyee bɔ ɛmɔkuro kyɛ ɛmɔyɔ ɔ.

¹⁸ Nakoso sɛ Sunzum ne kyire ɛmɔ atee a, ye de nna mmeraa bo yeɛ ɛmɔwura ɔ.

¹⁹ Anwoɔnaen dwumadie bɔ odi da adi pefee. Bɛ ɛhe: agyaasɛkyelɛ, adwamanbɔlɛ, efiɛ, ahohwie,

²⁰bosoensolɛ, bayie, ɛpɔen, ngondii, ahoɔyea, ɛyaafɛlɛ, pɛsɛmangomenya, ɛyakalɛ, ndoto,

²¹ anyeboroborolɛ, awuelilɛ, nzaabolɛ, ewiase anigye mbaen mbaen ɔne nningyein bɔ ɔtete sɔa ɔ. Mebɔ ɛmɔ ɛhemɔ nwo kɔkɔ, kyɛbɔ mabɔ ɛmɔ kɔkɔ daa ne, kyɛ bɛ bɔ bɛyɔ sɔ nningyein nemɔ ngɔhɔ Nyameɛ ahennie ne anu.

²² Nakoso Sunzum ne de, ɔma ɔdɔ, anigye, asomdwee, aboterɛ, adɔeɛyɛlɛ, paayɛlɛ, gyidie,

²³anwobrɛaseɛ, anwohyɛsoɛ. Mmeraa biala nne berɛ bɔ ɔko tia ɛhemɔ ɔ.

²⁴Na bɛ bɔ bɛte Kristo Yesu deɛ ne, babɔ anwoɔnaen ne ne ye akɔnnɔ, ɔne bɔ ɔhyɛ anwoɔnaen ne aso mmeamudua nu.

²⁵Sɛ Sunzum ne ama yɛ ngoa a, nzaade ɛmɔma Sunzum ne koso li yɛ nyunu wɔ asetena nu.

²⁶ Nnɛmɔma yɛmoma yɛ nwo so, yɛfefɛ yɛ nwo yaa ná yɛma yɛ nye boro yɛ biɛngo.