Read Sehwi Ɛfesofoɛ 4 Bible Online

Ɛfesofoɛ 4 - Sehwi bible

Ɛfesofoɛ 4

¹Yiti afei me, Awurade kukununiɛ, mesrɛ ɛmɔ kyɛ ɛ́mɔbɔ bra bɔ ɔfata ɛfrɛlɛ bɔ bafa bafrɛ ɛmɔ ne,

² anwobrɛaseɛ ne awiɛmvoɛyɛlɛ amukoraati nu, aboterɛ nu, ná ɛmɔhurohuro ebiala dwirɛ kyɛbɔ ebiala te ɔ wɔ ɔdɔ nu;

³ɛ́mɔbɔ mmɔden bɛ́ma Sunzum koyɛlɛ ne ɔ́tena berɛ wɔ asomdwee ngabonu nu.

⁴Ofikyɛ nipadua komapɛ ne Sunzum komapɛ yeɛ ɔwɔ berɛ ɔ, kyɛbɔ bafrɛ ɛmɔ koso wɔ anyelasoɛ komapɛ nu wɔ ɛmɔ frɛlɛ ne anu ne;

⁵Awurade komapɛ, gyidie komapɛ, asubɔlɛ komapɛ;

⁶yɛ mukoraa yɛ Nyameɛ ne Baba komapɛ bɔ odi yɛ mukoraa so ɔ, odi dwumaa wɔ yɛ mukoraa nu, na ɔte yɛ mukoraa nu.

⁷Nakoso bafa adom balo yɛ nu biala, kyɛbɔ Kristo asusu ye akyɛdeɛ wafa wama ɔ.

⁸ Yiti ɔnwa: “Mmerɛ bɔ ɔfo hɔle anwuro anwuro nen; ɔhyele pee nnure ɔne bɛ hɔle, na ɔmane mmenia akyɛdeɛ.”

⁹(Na sɛ ɔkã kyɛ: Ɔfo hɔle anwuro anwuro a, aso né ongyire kyɛ olili moa odwu hɔle aseɛ bo dɔ koraka?

¹⁰Na bɔ odwu wale ne, ye ala yeɛ ɔfo hɔle anwuro trale nyameɛso amukoraa ne, amaa wayi nningyein amukoraa nu tɛkyɛ.)

¹¹Na ye akyɛdeɛ ne ama ebiemɔ ayɛ asomafoɛ, ebiemɔ ngɔmhyɛlɛfoɛ, ebiemɔ nzɛmbahanɛfoɛ, ebiemɔ neafoɛ mɔ, yeɛ ebiemɔ akyerɛkyerɛfoɛ,

¹²kyɛ bɛfa bɛtete anwoteefoɛ bɛma ɛsolɛ adwuma ne, amaa Kristo nipadua ne anya ngɔsoɛ,

¹³kodwu kyɛ yɛ mukoraa yɛkonya Nyameɛ Awa ne nwo gyidie ɔne ye nwo nimdeɛ wɔ koyɛyɛlɛ nu, ná yayɛ mmenia bɔ yanyi yayie, bɔ yanya Kristo ye sue tebea ne tɛkyɛ ɔ,

¹⁴amaa ɔnate so yangɔ so yanyɛ ngwadaammaa bɔ ngyerɛkyerɛ mvrama biala ɔbɔ bɛ papapapa fa bɛ di akɔneaba ɔ, mmenia nnakannaka nu, bɔ bɛfa kanda nworɛ so bɛdɛɛdɛɛ ne.

¹⁵ Na mmom, ɛ́mɔma yɛli nahorɛ yɛfa ɔdɔ nu yɛnyi wɔ nningyein amukoraa nu, wɔ Kristo bɔ ye yeɛ ɔte tire ne anu,

¹⁶ ye bɔ ye nu yeɛ nipadua ne amukoraa ayɛ mumua, ɔnate akwaa ahoroɔ bɔ wahã watoatoa nu wasiesie so pɛpɛɛpɛ, bɔ ebiala ɔyɔ ye adwuma kyɛbɔ ɔfata ne ati, na ɔma nipadua ne nyi, na ɔpagya ye nwo wɔ ɔdɔ nu.

¹⁷Yiti mesi ɛhe pi, ná medi adanzeɛ wɔ Awurade nu, kyɛ nnɛma ɛmɔbɔ ɛmɔ bra ko kyɛbɔ Amaenmaensofoɛ ngaa nemɔ bɛyɔ ye wɔ b’adwene mbaen mbaen nu ne.

¹⁸Bɛ de, awosii akata bɛ ndeaseɛ so, na ɔnate ndeaseɛ bɔ belle bie, ná bayɛ asoserɛ ne ati, ngoa bɔ Nyameɛ fa ma ne wabɔ bɛ.

¹⁹Bɛnze nyanzoen ko, bama ahohwibra ali bɛ ti, na bɛbɔ bra fiɛ bɔ nikye fee nzi bɛ ate ɔ.

²⁰Nakoso ɛmɔ de, nna sɔ yeɛ ɛmɔasuasua Kristo ɔ.

²¹Ɛmɔate ye nwo dwirɛ amba, yeɛ bayɛ ngyerɛkyerɛ bahyire ɛmɔ wɔ ye nu, kyɛbɔ Yesu nu nahorɛ ne ɔte ne.

²² Brabɔlɛ daa bɔ ɛmɔbɔle ne, ɔte ɛmɔ sona sue daa, na ɔte porɔlowaa wɔ nnakannaka akɔnnɔ nu, yiti ɛ́mɔgyi bégua,

²³ná ɛ́mɔma bɛyɛ ɛmɔ foforɛ wɔ ɛmɔ adwene sunzum nu,

²⁴ ná ɛ́mɔfa sona sue foforɛ bɔ Nyameɛ bɔle ye kyɛ ye sɛso wɔ nahorɛ tenenee ne anwotelɛ nu ne bewura.

²⁵ Yiti ɛ́mɔyakyi ngondombopɛlɛ, ná ebiala li nahorɛ ohyire obiɛngo; ofikyɛ yɛte yɛ nwo yɛ nwo akwaa.

²⁶ Ɛ́mɔfɛ yaa, nakoso nnɛma ɛmɔyɔ bɔne! Nnɛmɔma eyia kɔtɔ ɛmɔ yaafɛlɛ so,

²⁷nnɛmɔma abɔnzam ate!

²⁸Nnɛma awueniɛ wua ko, na mmom ɔsɛ kyɛ ɔbɔ mmɔden ɔfa ye sa yɔ adwuma bɔ ɔfata ɔ; amaa wanya bie wafa waboka sona bɔ wahia ye ɔ.

²⁹Nnɛmɔma edwirɛ fiɛ biala fi ɛmɔ noa, na mmom edwirɛ paa bɔ ɔfata ná ɔma ngɔsoɛ ɔ, ná walo bɛ bɔ betie ne.

³⁰ Nyameɛ Sunzum Krongron bɔ bafa bahyɛ ɛmɔ nzorɛ bama ngoalelɛ kyẽa ne, nnɛma ɛmɔbɔ ye wora.

³¹Ɛ́mɔgyi amvamviri, ahonetɛɛ, ɛyaafɛlɛ, basabasayɔlɛ, ɛsoentolɛ ne bra fiɛ biala bégua.

³² Ɛmɔhurohuro ɛmɔ nwo dwirɛ, ɛ́mɔnwu ɛmɔ nwo anwumvoin, ná ɛ́mɔfa bɛhyehyɛ ɛmɔ nwo, kyɛbɔ Nyameɛ nate Kristo so wafa wahyɛ ɛmɔ ne.