Read Sehwi Ɛfesofoɛ 6 Bible Online

Ɛfesofoɛ 6 - Sehwi bible

Ɛfesofoɛ 6

¹ Mmaa, ɛ́mɔtie ɛmɔ awofoɛ dwirɛ wɔ Awurade nu, ofikyɛ sɔ yeɛ ɔte paa ɔ.

² “Di ɛse ne eni ni” (ɛhe te mmeraa dwirɛ bɔ oli moa bɔ bɔhyɛ bata ye nwo ɔ),

³“amaa wayie wɔ yé, ná anyi ahyɛ wɔ aseɛ ye aso.”

⁴ Seɛ mɔ, nnɛma ɛmɔhu ɛmɔ mma mɔ b’ahone, na mmom ɛ́mɔtete bɛ wɔ Awurade ndeteyɛɛ ne foɛtulɛ nu.

⁵ Ngoaa mɔ, ɛ́mɔye ɛmɔ ahone nu bɛ́fa esuronyi ne anwowosolɛ bɛ́yɛ sotie bɛ́ma ɛmɔ anwoɔnan nu meneɛ mɔ, kyɛbɔ ɛmɔyɔ bɛma Kristo ne;

⁶nnɛmɔma ɛmɔ solɛ ne ɔyɛ bɛ nye so nikyee mbaen, kyɛ bɛ bɔ bɛfa bɛsɔ mmenia nye ɔ, na mmom kyɛ Kristo ngoaa bɔ baye b’ahone nu bɛyɔ Nyameɛ apɛdeɛ,

⁷bɔ baye bɛ kunu sefaa bɛyɔ ɛsolɛ adwuma, kyɛ bɛyɔ bɛma Awurade, na nna kuro sona ɔ.

⁸Na ɛmɔse kyɛ nikye paa biala bɔ sona yɔ ne, sɛ ɔte akoaa oo, dehyeɛ oo, okonya ye nwo akatuaa kofi Awurade berɛ.

⁹ Meneɛ mɔ, ɛmɔ koso ɛ́mɔyɛ bɛ sɔ ala, nnɛma ɛmɔyɛ bɛ so ahupoo; ofikyɛ ɛmɔse kyɛ bɔ ɔte ɛmɔ ne bɛ Meneɛ ne ɔwɔ nyameɛso, bɔ ye de, ɔnyɛ mmenia nu nyeyemuɛ ɔ.

¹⁰Bɔ ɔpɛ ye bo ɔ, aliɛmaa mɔ, ɛ́mɔma ɛmɔ nwo yɛ se wɔ Awurade nu, ɔne ye anwoserɛ tumi ne anu.

¹¹Ɛ́mɔfa Nyameɛ akodeɛ ne amukoraa bewura, amaa ɛmɔahora bagyina baho batia abɔnzam nnakannaka.

¹²Ofikyɛ nna yɛne anwoɔnaen ne mogya yeɛ yɛdi ahoɛ ɔ; na mmom yɛne mbanyililɛ ne tumi mɔ ne ewiase awosii nu tumifoɛ ne ewienu dɔ sunzummɔne mɔ.

¹³Yiti ɛ́mɔfa Nyameɛ akodeɛ ne amukoraa bewura, amaa ɛmɔahora bagyina wɔ kyẽa tɛɛ ne anu; na sɛ ɛmɔyɔ ɛhe amukoraa beyie a, né ɛmɔagyina pirim.

¹⁴ Yiti ɛ́mɔgyina pindinn, ɛ́mɔfa nahorɛ bɛyɛ abɔsoɛ bɛbɔ ɛmɔ yaase, ná ɛ́mɔfa tenenee bɛyɛ buralɛ bɛkata ɛmɔ hue so,

¹⁵ ná ɛ́mɔfa asomdwee nzɛmba ne nwo mmɔdenbɔlɛ bɛyɛ mbaboa bewura.

¹⁶Na ɛhe amukoraa si ne, ɛ́mɔfa gyidie akokyɛm bétira, na ye yeɛ ɛmɔkɔhora bɛkɔfa bekonua bɔnefoɛ n’agyaen mɔ bɔ begye ne amukoraa ɔ.

¹⁷ Ɛ́mɔfa ngoalelɛ buralɛ kyerɛ, ɔne Sunzum ngrandɛ ne, bɔ ye ole Nyameɛ dwirɛ ne.

¹⁸Ɛ́mɔfa mbaeɛbɔlɛ ne ngotosrɛ amukoraa bɛ́bɔ mbaeɛ daa wɔ Sunzum nu. Yiti ɛ́mɔwɛne, ná ɛmɔhɔ so bɛsrɛ bɛma anwoteefoɛ amukoraa,

¹⁹yeɛ ɛ́mɔsrɛ bɛ́ma me koso, amaa sɛ mebukye me noa kyɛ medwudwo a, bama me dwirɛ bɔ nga ɔ, ná mahora masi m’ahone mabɔ nzɛmba ne anu mvealeɛ nu dwirɛ ne dawure;

²⁰bɔ ye nwo bɔfoɛ bɔ nde ti yeɛ bagua me ngɔnzɔngɔnzɔ ye; amaa mahora masi m’ahone mahã, kyɛbɔ ɔsɛ kyɛ mekã ɔ.

²¹ Na kyɛbɔ ɔkɔyɛ bɔ ɛmɔ koso ɛmɔkonwu kyɛbɔ me nwo si te ɔ, ɔne bɔ meyɔ ne, aliɛmaa dɔfo Tihiko, bɔ ɔte Awurade nu somvoɛ nahorɛniɛ ne, ɔkɔfa ye mukoraa nwo amaneɛ kɔbɔ ɛmɔ.

²²Na ɛhe ati yeɛ masoma ye ɛmɔ berɛ ɔ, amaa ɛmɔanwu kyɛbɔ yɛ nwo si te ɔ, ná wakyekye ɛmɔ wora.

²³Asomdwee ne ɔdɔ ne gyidie bɔ ofi Baba Nyameɛ ne Awurade Yesu Kristo berɛ ɔyɛ ɛmɔ deɛ.

²⁴Bɛ bɔ befi b’ahone nu bekuro y’Awurade Yesu Kristo dwirɛ amukoraa ne, adom ɔyɛ bɛ deɛ.