Read Sehwi Filipifoɛ 2 Bible Online

Filipifoɛ 2 - Sehwi bible

Filipifoɛ 2

¹Yiti sɛ Kristo nu nguraenhyɛlɛ bie wɔ berɛ, sɛ ɔdɔ aworakyekyerɛ bie wɔ berɛ, sɛ Sunzum nu abiɛngoɛfalɛ bie wɔ berɛ, sɛ ahunundetelɛ ne anwumvoinnwunɛ bie wɔ berɛ a,

²ye de, ɔsɛ kyɛ ɛmɔdwene adwene ko, ɛmɔnya ɔdɔ ko, ɛmɔnya koyɛlɛ ne adwene ko maa m’anigye osi pi.

³Nnɛma ɛmɔfa pɛsɛmangomenya anaa nduhoɛ bɛyɔ nikyee biala, na mmom ɔsɛ kyɛ ɛmɔfa anwobrɛaseɛ adwene bebu ɛmɔ mmango mɔ bɛtra ɛmɔ bɔbɔ ɛmɔ nwo.

⁴Nnɛma ɛmɔ nu biala pena ye ngome ye deɛ, na mmom ɔsɛ kyɛ ɔma ye mmango deɛ koso hia ye.

⁵Ɛ́mɔma adwene bɔ ɔwɔ Kristo Yesu nu ne ala yeɛ ɔ́tena ɛmɔ nu ɔ.

⁶Ye bɔ ɔwɔ Nyameɛ tebea nu de, nakoso wambere wanyɛ ye nwo kyɛ ɔne Nyameɛ bɛte pɛ ɔ,

⁷na mmom ɔfale ye dibea tole berɛ fale akoaa tebea tole ye nwo so, na bɛwole ye maa ɔɔyɛle dasaniɛ ye sɛso.

⁸Benwuni ye kyɛbɔ kuro sona osi soma ɔ, ɔbrɛle ye nwo ase, na ɔyɛle asoɛmmerɛlɛ fa hɔle ewue nu, mmeamudua ne aso wue nu po.

⁹Ye sɔ ati, Nyameɛ koso apagya ye piri paa, na wama ye dumaa bɔ ɔbo dumaa biala so ɔ,

¹⁰ kyɛ Yesu dumaa nu yeɛ ɔsɛ kyɛ nangoroma mukoraa bɛkoto, bɔ ɔwɔ nyameɛso, bɔ ɔwɔ aseɛ so, ɔne bɔ ɔwɔ aseɛ bo dɔ ɔ,

¹¹na noa biala ɔsɛ kyɛ ɔkã ye pefee kyɛ Yesu Kristo te Awurade ná ɔfa hyɛ Baba Nyameɛ animnyam.

¹²Yiti mmiɛngo paa mɔ, kyɛbɔ ɛmɔyɛ sotie daa ne, nna kyɛ mmerɛ bɔ me ne ɛmɔ yɛwɔ berɛ ne angome, na mmom afei bɔ nne ɛmɔ berɛ ye de po, ɔtra so; ɛ́mɔfa esuronyi ne anwowosowolɛ béli ɛmɔ bɔbɔ ɛmɔ ngoalelɛ nwo dwumaa ma oli mu,

¹³ɔnate kyɛ Nyameɛ yeɛ ɔyɔ adwumaa wɔ ɛmɔ nu maa ɛmɔkuro kyɛ ɛmɔyɔ, ná ɛmɔyɔ nnwumaa kyɛbɔ ɔsɔ ye nye ɔ.

¹⁴Nnɛma ɛmɔfa nwuhunwuhu ne aporowaasulɛ bɛyɔ nikyee biala,

¹⁵ amaa ɛmɔayɛ mmenia bɔ edwirɛ nne bɛ nwo bɔ bɛ nwo sonn, Nyameɛ mma bɔ ngekalewa biala nne ɛmɔ nwo wɔ bɔnefoɛ maen bɔ bali makyebu, bɔ ɛmɔta wɔ bɛ nu kyɛ kanea bɔ ɔwɔ wiase,

¹⁶wɔ mmerɛ bɔ ɛmɔtira ngoa dwirɛ ne anu serɛserɛ ɔ; amaa wayɛ m’anwohoahoa wɔ Kristo kyẽa ne, kyɛ amirika bɔ nduli ne wanyɛ mbaen, yeɛ me fɛɛ adwumaa ne koso wanyɛ mbaen.

¹⁷Na sɛ ɔba kyɛ behwie me begua kyɛ afɔlebɔdeɛ wɔ ɛmɔ gyidie solɛ nwo a, ɔyɛ me fɛ, na me ne ɛmɔ amukoraa yɛdi ahurusi.

¹⁸Na sɔ ala yeɛ ɔsɛ kyɛ ɛmɔ koso ɛmɔma ɛmɔ nye gye, ná ɛmɔ ne me yɛdi ahurusi ɔ.

¹⁹Me nye la so wɔ Awurade Yesu nu, kyɛ ɔngɔhyɛ biala ngɔsoma Timoteo maa ɔkɔwa ɛmɔ berɛ, na sɛ ɔfa ɛmɔ nwo amaneɛ babɔ me a, ɔkɔma me wora kɔkyekye.

²⁰Ebiala nne berɛ bɔ ɔne m’adwene te ko, kyɛ ye bɔ ɛmɔ yeeyɛlɛ hia ye ɔ.

²¹Bɛ mukoraa bɛpena bɛ bɔbɔ bɛ deɛ, na mmom nna bɔ ɔte Yesu Kristo deɛ ɔ.

²²Nakoso ɛmɔ de, kyɛbɔ ɛmɔdi ye nwo adanzeɛ ne, ɛmɔse kyɛbɔ yasi yayɛ kyɛ seɛ ne baa bɔ yɛso wɔ nzɛmba ne nwo ɔ.

²³Sɛ menya menwu kyɛbɔ me dwirɛ ne ɔkwaasi pɛ a, ye yeɛ me nye la ye so kyɛ ngɔsoma ye ɛmɔ berɛ ɔ.

²⁴Na m’anyelasoɛ wɔ Awurade nu kyɛ ɔngɔhyɛ biala me bɔbɔ koso ngɔwa ɛmɔ berɛ.

²⁵Nakoso madwene ye nwo kyɛ ohia kyɛ mesoma nniɛma Epafrodito ɛmɔ berɛ. Ɔte mmiɛngo adwumayɔlɛniɛ ne mmiɛngo asraaniɛ, ɛmɔ bɔfoɛ ne me bokafoɛ;.

²⁶ofikyɛ ye wora dɔ ɛmɔ amukoraa, na ɔha ye kyɛ ɛmɔtele kyɛ anwonyerɛ bɔle ye ɔ.

²⁷Amba, ewue anwonyerɛ bɔle ye. Nakoso Nyameɛ nwuni ye anwumvoin; nna ye ngome, na me koso onwuni me anwumvoin bie, na wamma me wora ammɔ somaa.

²⁸Na ɛhe ati po yeɛ ɔmaa mabɔ mmɔden masoma ye ɔ, amaa sɛ ɛmɔnwu ye bieku a, ɛmɔ nye agye, ná me koso m’aworabɔlɛ ne so ate.

²⁹Yiti ɛ́mɔle ye nyemene so wɔ Awurade nu, na ɛ́mɔfa anidie bɛ́ma mmenia bɔ bɛte kyɛ ye ne amukoraa.

³⁰Ofikyɛ, Kristo adwuma ne ati ɔhale kãa maa owuli, na ɔfale ye ngoa tole serewa gyinane ɛmɔ gya nu kyɛ ɔkɔso me.