Read Sehwi Filipifoɛ 3 Bible Online

Filipifoɛ 3 - Sehwi bible

Filipifoɛ 3

¹Aliɛmaa mɔ, bɔ ɔpɛ ye bo ɔ, ɛ́mɔma ɛmɔ nye gye wɔ Awurade nu. Ɔnha me kyɛ ngosa ngɔhyerɛ nikyee komapɛ ne ala ngɔbrɛ ɛmɔ ɔ, na ye sɔ te paa ma ɛmɔ.

²Ɛ́mɔnea ɛmɔ nwo yé wɔ ngyea nemɔ nwo; ɛ́mɔnea ɛmɔ nwo yé wɔ adwumayɔlɛfoɛ bɔnefoɛ nemɔ nwo, ɛ́mɔnea ɛmɔ nwo yé wɔ bienzuapɛlɛfoɛ nemɔ ne.

³Ofikyɛ yɛ yeɛ yɛte bienzuapɛlɛfoɛ ɔ, bɔ yɛsɔne Nyameɛ wɔ sunzum nu, bɔ yɛhoahoa yɛ nwo wɔ Kristo Yesu nu, ná yɛmva yɛ nwo yɛndo anwoɔnaen so ɔ.

⁴Ɔwɔ nu kyɛ me bɔbɔ koso, ahaa nne anwoɔnaen nu nikyee bie bɔ mefa me nwo meto so ɔ. Na sɛ ebie dwene kyɛ ole anwoɔnaen nu nikyee bie bɔ ɔfa ye nwo to so a, me deɛ de ɔtra so.

⁵ Ye ɛlɛbɔtwɛ ne aso yeɛ bɛpɛle me bienzua ɔ. Mvi Yisrael bosofoɛ nu, mvi Benyamin abusua kure nu, Hebrifoɛ nu Hebriniɛ; na mmeraa ne aso lilɛ de, nde Farasiiniɛ;

⁶ mmɔdenbɔlɛ nu, ndanene asɔre ne nye; mmeraa ne anu tenenee koso, me nwo sonn.

⁷Nakoso nningyein bɔ ahaa ɔte mvasoɛ ma me ne, Kristo ti mebu ye kyɛ wafi me sa.

⁸Amba, ɔnate m’Awurade Kristo Yesu nwo nimdeɛ mmorosoɛ ne ati, mebu nningyein amukoraa kyɛ bafi me sa. Ɔnate ye ti nningyein amukoraa afi me sa, nakoso mebu bɛ kyɛ fofoɛ so wura mbaen, amaa ɔnate so manya Kristo;

⁹amaa wanwu me wɔ ye nu, kyɛ me de, nnne me bɔbɔ me tenenee bɔ ofi mmeraa ne anu ɔ, na mmom bɔ ɔnate Kristo nu gyidie so ɔba ɔ, tenenee bɔ ofi Nyameɛ berɛ, bɔ ɔnate gyidie so ɔ.

¹⁰Me botaeɛ ole kyɛ ngonwu ye ne ye wutingyelɛ tumi ne, kyɛ ngonwu ye amaneɛ ne bie, kyɛ ɔkɔmaa ngɔyɛ kyɛ ye wɔ ewue nu,

¹¹ná sɛ ɔkɔyɛ yee a, manya awufoɛ nu ewutingyelɛ ne.

¹²Nna kyɛ ebiaa me sa anya ahã ye, anaakyɛ mali mu mayie ɔ; na mmom mepere mekɔ me nyunu kyɛbɔ ɔkɔyɛ me deɛ ɔ, kyɛbɔ Kristo Yesu koso wafa me wayɛ ye deɛ ne.

¹³Aliɛmaa mɔ, menzusu kyɛ wanya wayɛ me deɛ; nakoso nikyee komapɛ yeɛ meyɔ ɔ: mema me wora fi bɔ wapɛ nu wahɔ ɔ, na metwe me nu kyɛ ngodwu bɔ ɔla me nyunu ne anwo ɔ.

¹⁴Mepere mekɔ me nyunu kyɛ ngodwu botaeɛ ne anwo ngonya ngonimlilɛ abasobɔdeɛ ne, bɔ ɔte anwuro frɛlɛ bɔ Nyameɛ nate Yesu Kristo so wafrɛ me ne.

¹⁵Yiti yɛ nu pee bɔ yanyi wɔ pɛpɛɛpɛyɛlɛ nu ne, ɔsɛ kyɛ yɛnya sɔ adwene ne, na sɛ ɛmɔle adwene foforɛ wɔ nikyee bie nwo a, ye koso Nyameɛ kɔla ye ali kohyire ɛmɔ.

¹⁶Nakoso bɔ yanya ye dada ne, ɛ́mɔma yɛhɔ so yɛsɔ nu bum.

¹⁷ Aliɛmaa mɔ, ɛ́mɔsuasua me, ná ɛ́mɔnea bɛ bɔ bɛ bra te sɔ ala ne, kyɛbɔ yɛte nhwɛsoɛ ma ɛmɔ ne.

¹⁸Mali moa mahã edwirɛ he mahyire ɛmɔ pee paa, na kekesaala ye koso, nne me nye moen mesi so bieku kyɛ, mmenia pee wɔ berɛ bɔ bɛ brabɔlɛ maa bɛyɛ Kristo mmeamudua ne pɔfoɛ ɔ.

¹⁹Bɛ yeɛ b’ayieleɛ te ɛsɛkyelɛ ɔ, bɛ nyameɛ ole bɛ ko, b’animguaseɛ nu yeɛ b’animnyam wɔ ɔ, na aseɛ so nningyein ngome yeɛ bɛdwene ye nwo ɔ.

²⁰Nakoso yɛ de, nyameɛso yeɛ ɔte yɛ maen ɔ. Berɛ yeɛ yɛnwondɛ kyɛ yɛ Ngoadefoɛ bɔ ye ole Awurade Yesu Kristo ne okofi kɔwa ɔ;

²¹na tumi bɔ ɔkora maa ɔfa nnningyein amukoraa wura ye bo ne, ɔkɔfa kɔsakyera yɛ awiɛmvoɛ nipadua ne maa ɔkɔyɛ kyɛ ye animnyam nipadua ne.