Read Sehwi Filipifoɛ 4 Bible Online

Filipifoɛ 4 - Sehwi bible

Filipifoɛ 4

¹Yiti aliɛmaa mɔ bɔ mekuro ɛmɔ dwirɛ ná me wora dɔ ɛmɔ ɔ, m’anigyeɛ ne m’abotire; ɛmɔ bɔ ɛmɔla m’ahone nwo ɔ, ɛ́mɔgyina pindinn wɔ Awurade nu.

²Mekoto mesrɛ Yiwodia, yeɛ mekoto mesrɛ Sintike kyɛ bɛma b’adwene yɛ ko wɔ Awurade nu.

³Yeɛ mesrɛ wɔ koso, mmiɛngo konnuasoalɛniɛ nohorɛniɛ, kyɛ boka mmrasua hemɔ, ofikyɛ bɛbokale me so yeɛ yɛyɔle nzɛmba ne nwo adwuma ɔ, bɛne Klɛmente ne mmiɛngo adwumayɔlɛfoɛ ngaa nemɔ bɔ bahyerɛ bɛ dumaa wɔ ngoa nwomaa ne anu ne.

⁴Ɛ́mɔma ɛmɔ nye gye wɔ Awurade nu daa. Mesi so bieku kyɛ, ɛ́mɔma ɛmɔ nye gye!

⁵Ɛ́mɔma mmenia amukoraa bénwu ɛmɔ animia ne. Awurade apingye!

⁶Nnɛmɔma nikye fee ha ɛmɔ; na mmom nikyee biala nu, ɛ́mɔfa mbaeɛbɔlɛ ne ngotosrɛ ne asennaa bɛ́fa bɔ ohia ɛmɔ ɔ bɛ́to Nyameɛ nyunu.

⁷Na Nyameɛ asomdwee bɔ ɔbo ndeaseɛ amukoraa so ne, ɔkɔnea ɛmɔ ahone ne ɛmɔ adwene so wɔ Kristo Yesu nu.

⁸Afei aliɛmaa mɔ, medwura edwirɛ ne kyɛ, nikyee biala bɔ ɔte nahorɛ, bɔ ɔte animnyam, bɔ ɔtengyɛ, bɔ ye nwo te, bɔ ɔyɛ nyemene, bɔ ole dumaa paa; sɛ bra paa bie wɔ berɛ a, sɛ ayɛyelɛ bie wɔ berɛ a, sɔ nningyein nemɔ yeɛ ɔsɛ kyɛ ɛmɔdwenedwene bɛ nwo ɔ.

⁹Bɔ ɛmɔasua ne bɔ ɛmɔanya ye ɔne bɔ ɛmɔate ne bɔ ɛmɔanwu ye wɔ me nwo ne, ye ala ɔsɛ kyɛ ɛmɔyɔ ɔ. Na asomdwee Nyameɛ ne ɛmɔ kɔtena.

¹⁰Ɔyɛ me fɛ paa wɔ Awurade nu kyɛ afei de ɛmɔasa bahyɛ ye bo bɛdwene me nwo bieku ɔ; ɛmɔdwene me nwo de, nakoso atee amma nu amma ɛmɔ.

¹¹Mengyire kyɛ me nwo ahyere me ti ɔ, ofikyɛ me de, masua maa wakokwa me, bɔ tebea biala bɔ nwɔ nu ne mema me nye gye ɔ.

¹²Manwu anwokyere, yeɛ manwu anwonya koso. Nekaa biala ne nikyee biala nu, sɛ ɛhɔen yeɛ oku me oo, sɛ me ko yi oo; sɛ nne bie oo, sɛ nnne bie oo, wakokwa me,

¹³na mekora meyɔ nnningyein amukoraa wɔ Kristo bɔ ɔma me anwoserɛ ne anu.

¹⁴Nakoso ɔte paa kyɛ ɛmɔbokale me wɔ m’anwokyere nu ɔ.

¹⁵Na ɛmɔ Filipifoɛ koso, ɛmɔse kyɛ nzɛmba n’ahyɛseɛ ne, mmerɛ bɔ mvili Makedonia ngɔle ne, asɔre biala wammoka me wɔ akyɛdeɛ manɛ ne ye lelɛ nu, sana ɛmɔ ngome ala.

¹⁶ Na mmerɛ bɔ né nwɔ Tɛsalonika ne po, ɛmɔsomane maa bɛfale bɔ ohia me ɔ bɛbrɛle me ye pɛen ko ne ye pɛen nyɔ so.

¹⁷Nna kyɛ mepena akyɛdeɛ hɔ ɔ; na mmom mepena mmaa bɔ ɔkɔma ɛmɔ ngondaa ne kɔsone ɔ.

¹⁸ Manya pee, na manya ye mukoraa maa wabo so, ɔsone. Epafrodito afa ɛmɔ akyɛdeɛ bɔ ɛmɔfa manene ne wabrɛ me. Ɔte ayɛyɛdeɛ fonafona, afɔlebɔdeɛ bɔ Nyameɛ kuro ná ɔsɔ ye nye ɔ.

¹⁹Na me Nyameɛ kɔma ɛmɔ bɔ ɛmɔhia amukoraa, kyɛbɔ ye anwonya ne te ɔ, animnyam nu, wɔ Kristo Yesu nu.

²⁰Animnyam hã yɛ Baba Nyameɛ daa. Amen.

²¹Ɛ́mɔbisa anwoteefoɛ ne amukoraa ahye wɔ Kristo Yesu nu bɛ́ma me. Aliɛmaa mɔ bɔ bɛne me wɔ wa ne koso bebisa ɛmɔ ahye.

²²Anwoteefoɛ ne amukoraa bebisa ɛmɔ ahye, nganga bɛ bɔ bɛwɔ Kaesare awuro ne.

²³Awurade Yesu Kristo adom ne ɔne ɛmɔ sunzum tena. Amen.