Read Sehwi Kolosefoɛ 3 Bible Online

Kolosefoɛ 3 - Sehwi bible

Kolosefoɛ 3

¹ Yiti sɛ ɛmɔ ne Kristo banya batingye de a, ɛ́mɔpena nningyein bɔ ɔwɔ anwuro ne si atee, nekaa bɔ Kristo te Nyameɛ sa famaa so ne.

² Ɔsɛ kyɛ ɛmɔdwene nningyein bɔ ɔwɔ nyameɛso nwo, na ɔnzɛ kyɛ ɛmɔdwene aseɛ so nningyein nwo.

³ Ofikyɛ ɛmɔawu, na bafa ɛmɔ ngoa ne Kristo basie Nyameɛ nu.

⁴ Na kyẽa bɔ Kristo bɔ ɔte yɛ ngoa ne ɔkɔla ye nwo ali nen, yeɛ bɛkɔla ɛmɔ koso ne ye ali wɔ animnyam nu ɔ.

⁵ Yiti ɛ́mɔhu aseɛ so suban bɔ ɔwɔ ɛmɔ nu ne: adwamanbɔlɛ, brabɔlɛ fiɛ, ahohwibra, akɔnnɔ bɔne bɔ ɔhyɛ sona so, ɔne anyeboroborolɛ; ofikyɛ anyeboroborolɛ te bosoensolɛ.

⁶ Ɔnate ɛhemɔ ati yeɛ Nyameɛ ahonehulɛ ne ɔba asoserɛfoɛ so ɔ.

⁷ Na mmerɛ bɔ né ɛmɔwɔ sɔ tebea ne anu ne, sɔ ala yeɛ ɛmɔbɔle ɛmɔ bra ɔ.

⁸ Nakoso kekesaala ye de, ɛ́mɔgyi ɛhemɔ amukoraa bégua: ɛyaafɛlɛ, ahone tɛɛ, ɛpɔen, musue dwirɛ ne edwudwolɛ fiɛ.

⁹ Nnɛma ɛmɔpepɛ ngondombo bekyirekyire ɛmɔ nwo, ofikyɛ ɛmɔagyi ɛmɔ suban daa ne, ɔne ye yɔleɛ tɛɛ ne bagua,

¹⁰ na ɛmɔanya sona sue foforɛ, na ye bɔ ɔbɔle yɛ ne, ogu so ɔyɛ yɛ foforɛ ba nimdeɛ nu maa ye sɛso yɛ kyɛ ye bɔbɔ ne ala.

¹¹ Yiti Helaniɛ oo, Yudaniɛ oo; bienzuapɛlɛniɛ oo, bɛmbɛ-bɛ-bienzuafoɛ oo; pɔtɔniɛ oo, bɔ ye nye butu ase oo; akoaa oo, dehyeɛ oo, nzonzoleɛ biala nne b’afia, ofikyɛ Kristo wɔ berɛ ma bɛ mukoraa, na ɔte bɛ mukoraa bɛ nu.

¹² Ɛmɔte mmenia bɔ Nyameɛ aneanea nu waye ɛmɔ ɔ, anwoteefoɛ ne adɔfo, yiti ɛ́mɔfa anwumvoinnwunɛ, paayɛlɛ, awiɛmvoɛ yɔbea ɔne anwobrɛaseɛ ne aboterɛ bɛbɔ ɛmɔ bra.

¹³ Ɛ́mɔnya aboterɛ bɛmoma ɛmɔ nwo; ɛ́mɔfa ɛmɔ abiɛngo mvomsoɛ bɛhyɛ ye. Na sɛ ebie ne obiɛngo benya edwudwolɛ a, ɛ́mɔfa bɛhyehyɛ bɛ nwo, kyɛbɔ Awurade afa ahyɛ ɛmɔ ne.

¹⁴ Bɔ ɔtra so ɔ, ɛ́mɔye ɔdɔ behyire, na ɛhe yeɛ ɔkã nningyein mukoraa bɔ nu maa bedi mu ɔ.

¹⁵ Afei ɛ́mɔma Kristo asomdwee ne oli ɛmɔ bra so, na ɛhe ati yeɛ bɛfrɛle ɛmɔ maa ɛmɔɔyɛle nipadua ko ɔ. Na nnɛma ɛmɔyɛ boniayɛ.

¹⁶ Ɛ́mɔma Kristo dwirɛ ne oyi ɛmɔ nu tɛkyɛ, ɛmɔhyirehyire ná ɛ́mɔfa nworɛ mukoraa betutu ɛmɔ nwo foɛ. Ɛ́mɔto sangoo dwein, ayɛyelɛ dwein, ɔne sunzum nu dwein bɔ ɔte ahone nu asennaa bɛ́ma Nyameɛ.

¹⁷ Na nikyee biala bɔ ɛmɔyɔ wɔ edwudwolɛ anaa yɔleɛ nu ne, ɛmɔyɔ ye mukoraa wɔ Awurade Yesu dumaa nu, na ɛmɔfa asennaa bɛfa ye so bɛma Baba Nyameɛ.

¹⁸ Yeɛ mɔ, ɛ́mɔbrɛ ɛmɔ nwo ase bɛ́ma ɛmɔ ahu mɔ, kyɛbɔ ɔsɛ wɔ Awurade nu ɔ.

¹⁹Huɛ mɔ, ɛmɔhuro ɛmɔ aye mɔ, na nnɛma ɛmɔteetee bɛ.

²⁰Ngwadaa, ɛ́mɔyɛ sotie bɛ́ma ɛmɔ awofoɛ mɔ wɔ nikyee biala nu, na ɛhe yeɛ ɔsɔ Awurade nye ɔ.

²¹Seɛ mɔ, nnɛma ɛmɔhyɛ ɛmɔ mma mɔ anyeborolɛ, ná b’abasanu ammu.

²²Ngoaa mɔ, ɛ́mɔyɛ sotie bɛ́ma ɛmɔ anwoɔnaen nu meneɛ mɔ wɔ nikyee biala nu. Nnɛma ɛmɔyɔ ye bɛ nye so mbaen, kyɛ ɛmɔyɔ ma sona kamvo ɛmɔ ɔ, na mmom ɛ́mɔfia ɛmɔ kunu bɛyɔ ye kyɛ mmenia bɔ besuro Awurade ɔ.

²³Na adwuma biala bɔ ɛmɔyɔ ne, ɛ́mɔfi ɛmɔ ahone nu bɛ́yɔ ye kyɛ ɛmɔyɔ bɛma Awurade, na nna kuro sona.

²⁴ Ɔnate kyɛ, ɛmɔse kyɛ Awurade berɛ yeɛ ɛmɔkonya ɛmɔ agyapadeɛ bɔ ɔte akatuaa ne ɔ, ofikyɛ Awurade Kristo yeɛ ɛmɔso ye ɔ.

²⁵ Nakoso sona bɔ ɔyɔ bɔne ne, okonya bɔne bɔ ɔyɔ ne nwo akatuaa, ofikyɛ Nyameɛ nyɛ sona nu nyeyemuɛ