Read Sehwi 1 Tɛsalonikafoɛ 1 Bible Online

1 Tɛsalonikafoɛ 1 - Sehwi bible

1 Tɛsalonikafoɛ 1

¹ Krataa he fi Pɔɔlo, Silwano ne Timoteo berɛ. Yɛfa yɛbrɛ Baba Nyameɛ ne Awurade Yesu Kristo asɔre bɔ ɔwɔ Tɛsalonika ne. Adom ne asomdwee [bɔ ofi yɛ Baba Nyameɛ ne Awurade Yesu Kristo berɛ] ɔyɛ ɛmɔ deɛ.

² Ɔnate ɛmɔ amukoraa bɛ ti, mmerɛ biala yɛfa asennaa yɛma Nyameɛ, na yɛbɔ ɛmɔ dumaa wɔ yɛ mbaeɛbɔlɛ nu.

³ Na mmerɛ biala yɛkaye ɛmɔ gyidie adwuma, ɔne ɛmɔ adwumayɔlɛ bɔ ofi ɔdɔ nu, ɔne ɛmɔ anyelasoɛ bɔ ogyi berɛ pindinn wɔ y’Awurade Yesu Kristo nu ne, wɔ yɛ Baba Nyameɛ nyunu.

⁴ Aliɛmaa mɔ bɔ Nyameɛ kuro ɛmɔ dwirɛ ɔ, yɛse kyɛ waneanea nu waye ɛmɔ.

⁵ Ofikyɛ, nna yɛ noa dwirɛ ngome so yeɛ yɛnate yɛfale nzɛmba ne yɛbrɛle ɛmɔ ɔ; na mmom yɛnate tumi ne Sunzum Krongron koso so yeɛ yɛfa yɛbrɛle ɛmɔ ɔ, na yɛse ye pefee kyɛ nzɛmba ne te nahorɛ. Na ɛmɔse kyɛbɔ ɔnate ɛmɔ ti yɛsi yɛbɔle yɛ bra wɔ mmerɛ bɔ né yɛwɔ ɛmɔ berɛ ne ɔ.

⁶ Ɛmɔsuasuane yɛ ne Awurade; na ɔwɔ nu kyɛ ɛmɔnwuni amaneɛ pee wɔ edwirɛ ne anwo de, nakoso ɛmɔfale anika bɔ ofi Sunzum Krongron berɛ bɛsɔle nu.

⁷ Na ɛhe ama ɛmɔayɛ nhwɛsoɛ bama agyidifoɛ amukoraa bɔ bɛwɔ Makedonia ne Akaia ɔ.

⁸ Ofikyɛ, nna Awurade nwo dwirɛ ne ngome yeɛ wafi ɛmɔ berɛ waadwu Makedonia ne Akaia ɔ; na mmom ɛmɔ gyidie wɔ Nyameɛ nu nwo dwirɛ koso watrɛ wahɔ nekaa biala, yiti onhia kyɛ yɛkɔhã ye nwo dwirɛ ko.

⁹Sɔ mmenia nemɔ bɔbɔ deinn bɛkã kyɛbɔ ɛmɔsi belele yɛ nyemene so, ɔne kyɛbɔ ɛmɔasi bahwe bɛ nwo bafi mmosoen nwo bawa Nyameɛ berɛ, kyɛ ɛmɔkɔso Nyameɛ teasefoɛ ne nahorɛniɛ ne,

¹⁰ ná ɛmɔnwondɛ Ɔwa ne bɔ otingyele ye fili awufoɛ nu ne kyɛ okofi nyameɛso kɔwa ɔ; Yesu bɔ ɔpepɛ de yɛ fi ahonehulɛ bɔ ɔ́ba ne anu ne.