Read Sehwi 1 Tɛsalonikafoɛ 2 Bible Online

1 Tɛsalonikafoɛ 2 - Sehwi bible

1 Tɛsalonikafoɛ 2

¹Aliɛmaa mɔ, ɛmɔ bɔbɔ ɛmɔse kyɛ yɛ walɛ bɔ yɛwale ɛmɔ berɛ ne wanyɛ mbaen.

² Na ɔwɔ nu kyɛ yɛlili moa yɛnwuni amaneɛ, ná bɛbɔle yɛ alapaa wɔ Filipi, kyɛbɔ ɛmɔse ne, nakoso yɛsili y’ahone wɔ yɛ Nyameɛ nu kyɛ yɛkɔhã Nyameɛ nzɛmba ne yɛkohyire ɛmɔ, wɔ aberɛ bɔ bɛko betia yɛ ɔ.

³Yɛ dwirɛ bɔ yɛhane ne, oggyi ngondombo anaa adwene tɛɛ biala so, yeɛ nnakannaka biala nne nu;

⁴na mmom kyɛbɔ Nyameɛ abu yɛ kyɛ yɛfata, ná wafa nzɛmba ne wawura yɛ sa ne, sɔ ala yeɛ yɛdwudwo ɔ; nna kyɛ yɛfa yɛsɔ mmenia nye, na mmom Nyameɛ bɔ ɔse yɛ ti anu dwirɛ ne yeɛ yɛfa yɛsɔ ye nye ɔ.

⁵ Ɛmɔse kyɛ yanga adɛfɛdɛfɛ dwirɛ biala; yeɛ yammutubutu edwirɛ so yamva yambena adifuu nikye, Nyameɛ te yɛ danzeniɛ!

⁶ Yanyɛ kyɛ yɛpena kuro sona nyunu animnyam, kyɛ ofi ɛmɔ berɛ oo, anaakyɛ ebiemɔ berɛ oo. Ahaa yɛkɔhora yɛkɔhyɛ kyɛ ɛmɔyɔ sɔ bɛma yɛ, ofikyɛ yɛte Kristo asomafoɛ.

⁷ Nakoso mmerɛ bɔ né yɛwɔ ɛmɔ berɛ nen, yɛdwole yɛ nwo ase te kyɛ brataen bɔ ɔnea ye mma ɔ.

⁸ Na ɔnate ɛmɔ nwo dɔ bɔ yɛle ye ne ati, nna Nyameɛ nzɛmba ne ngome yeɛ yɛhã yɛhyirele ɛmɔ ɔ, na mmom yɛfale yɛ nwo yɛbɔle afɔleɛ koso yɛmane ɛmɔ, ofikyɛ yɛhurole ɛmɔ dwirɛ soma.

⁹Aliɛmaa mɔ, ɛmɔkaye kyɛbɔ yɛsi yɛyɔle adwuma, ɔne yɛ fɛɛ bɔ yɛfɛle ɔ. Yɛyɔle adwuma eyia ne kɔngɔen kyɛbɔ ɔkɔyɛ na yanyɛ ɛmɔ nu biala so tɔsom, wɔ mmerɛ bɔ né yɛkã Nyameɛ nzɛmba ne yɛkyire ɛmɔ ne.

¹⁰Ɛmɔdi adanzeɛ, Nyameɛ koso sɔ ala, kyɛ yɛ suban bɔ yɛyele ye ali yɛhyirele ɛmɔ bɔ bɛte agyidifoɛ ne, ɔte krongron, ye nwo te, na ngekalewa biala nne ye nwo.

¹¹ Ɛmɔse kyɛ yɛtuli ɛmɔ nu biala foɛ, yɛkyekyele ɛmɔ wora kyɛbɔ seɛ si yɛ ye mma ɔ, na yɛhyɛle ɛmɔ nguraen,

¹²kyɛ ɛmɔbɔ bra bɔ ɔsɔ Nyameɛ bɔ wafrɛ ɛmɔ kyɛ ɛmɔɔnya kyɛfa wɔ ye Ahennie ne ye animnyam nu ne nye.

¹³ Na ɛhe koso ati yeɛ yɛda Nyameɛ ase daa ɔ, ofikyɛ mmerɛ bɔ yɛfale Nyameɛ dwirɛ ne yɛbrɛle ɛmɔ nen, ɛmɔsɔle nu kyɛ nna kuro sona dwirɛ ɔ, na mmom kyɛ ɔte Nyameɛ dwirɛ amba; na ɛhe yeɛ ɛmɔ bɔ ɛmɔte agyidifoɛ ne, ɔyɔ adwuma wɔ ɛmɔ nu ɔ.

¹⁴ Aliɛmaa mɔ, Nyameɛ asɔre mɔ bɔ bɛwɔ Yudea wɔ Yesu Kristo nu ne, agyirɛ bɔ betuli ne, ebiala yeɛ ɛmɔ koso ɛmɔatu ne; ofikyɛ ɛmɔ koso ɛmɔanwu amaneɛ wɔ ɛmɔ bɔbɔ ɛmɔ mmenia bɛ sa nu, kyɛbɔ Yudafoɛ fa yɛle bɛ koso ne ala.

¹⁵ Bɛ yeɛ behuni Awurade Yesu ne bɛ bɔbɔ bɛ ngɔmhyɛlɛfoɛ nemɔ ɔ, ná bɛtanene yɛ nye maa yɛnwatili ɔ. Bɛnzɔ Nyameɛ nye, yeɛ bɛko betia mmenia amukoraa.

¹⁶Na bɛberale yɛ kyɛ nnɛmaa yɛkã edwirɛ ne yɛkyire Amaenmaensofoɛ maa benya daa ngoa. Na ɛhe ma bɛ bɔne kwangoa ne oyi tɛkyɛ daa, ofikyɛ Nyameɛ ahonehulɛ ne wanya wawa bɛ so wayie!

¹⁷ Yɛ de, aliɛmaa mɔ, yɛfili ɛmɔ nwo berɛ mmerɛ kãa bie wɔ anwoɔnaen nu, na nna y’ahone nu ɔ; yiti yɛ wora dɔ ɛmɔ soma, na yɛpere kyɛ yɛkonwu ɛmɔ bieku ɔ.

¹⁸Ahaa yɛpena kyɛ yɛsa yɛba ɛmɔ berɛ. Me bɔbɔ, Pɔɔlo, mabɔ ye nwo mmɔden pee, nakoso Abɔnzam sili yɛ ate.

¹⁹ Na nzikyɛ yeɛ ɔte y’anyelasoɛ, anaa y’anigye, anaa yɛ ngonim abotire bɔ yɛkɔfa yɛkɔhoahoa yɛ nwo wɔ y’Awurade Yesu Kristo nyunu wɔ mmerɛ bɔ ɔkɔwa ne ɔ? Aso nna ɛmɔ ɔ?

²⁰ Amba, ɛmɔte y’animnyam ne y’anigye.