Read Sehwi 1 Tɛsalonikafoɛ 4 Bible Online

1 Tɛsalonikafoɛ 4 - Sehwi bible

1 Tɛsalonikafoɛ 4

¹Aliɛmaa mɔ, bɔ ɔpɛ ye bo ɔ, yɛ́srɛ ɛmɔ, ná yɛtu ɛmɔ foɛ wɔ Awurade Yesu nu kyɛ, kyɛbɔ ɛmɔsuane kyɛbɔ ɛmɔkosi bɛkɔbɔ bɛ bra bɔ ɔsɔ Nyameɛ nye befili yɛ berɛ nen, ɛmɔhɔ so bɛyɔ ye mmorosoɛ kyɛbɔ ɛmɔyɔ ne ala.

²Ɔnate kyɛ ɛmɔse ahyɛdeɛ bɔ yɛnate Awurade Yesu so yɛfa yɛmane ɛmɔ ne.

³ Nyameɛ apɛdeɛ ɛhe: kyɛ ɛmɔ nwo kɔte, ná ɛmɔkɔhwe ɛmɔ nwo bekofi adwamanbɔlɛ nwo,

⁴ kyɛ ɛmɔ nu biala konwu kyɛ okogya ɔye wɔ anwotelɛ ne anidie nu,[1]

⁵na mmom ɔnzɛ kyɛ ɛmɔma akɔnnɔ tɛɛ hyɛ ɛmɔ so kyɛbɔ maen maen nufoɛ bɔ bɛnze Nyameɛ ɔ bɛyɔ ne.

⁶Na ɔnzɛ kyɛ ebiala yɔ oliɛma tɛɛ anaa osisi ye wɔ ɛhe anwo, ofikyɛ yali moa yabɔ ɛmɔ kɔkɔ kitii kyɛ Awurade kɔtɔ ɛhemɔ amukoraa so wereɛ.

⁷Ɔnate kyɛ, Nyameɛ amvrɛ yɛ wamma efiɛ nu, na mmom anwotelɛ nu.

⁸Yiti ebiala bɔ ɔpo ngyerɛkyerɛ he nen, nna kuro sona yeɛ ɔpo ye ɔ, na mmom Nyameɛ bɔ wafa ye Sunzum Krongron ne wama yɛ ne.

⁹Onhia kyɛ ngɔhyerɛ ngɔkɔbrɛ ɛmɔ kyɛ ɛmɔhurohuro ɛmɔ aliɛma mɔ bɛ dwirɛ ɔ, ofikyɛ Nyameɛ ahyirehyire ɛmɔ kyɛ ɛmɔhurohuro ɛmɔ nwo dwirɛ.

¹⁰Na amba, sɔ suban ne ala koso yeɛ ɛmɔala ye ali bahyire aliɛmaa mɔ amukoraa bɔ bɛwɔ Makedonia amukoraa ɔ. Nakoso, aliɛmaa mɔ, yɛsrɛ ɛmɔ kyɛ ɛmɔhɔ so bɛyɔ ye mmorosoɛ,

¹¹ ná ɛ́mɔbɔ mmɔden brɛbrɛ ɛmɔ nwo ase, ɛ́mɔdwene ɛmɔ nwo, ná ɛ́mɔfa ɛmɔ sa bɛyɔ adwuma, kyɛbɔ yɛhã yɛhyirele ɛmɔ ne;

¹²amaa ɛmɔabɔ bɛ bra kyɛbɔ ɔfata wɔ ewiasefoɛ nu, ná nikye fee anhia ɛmɔ.

¹³ Aliɛmaa mɔ, yɛkuro kyɛ ɛmɔnwu nahorɛ bɔ ɔfa bɛ bɔ balela[2] nemɔ anwo, ná ɛmɔ wora ammɔ kyɛ mmenia bɔ baha bɔ belle anyelasoɛ ne.

¹⁴ Na sɛ yɛde yɛdi kyɛ Yesu wuli ná osa tingyele de a, nzaade Nyameɛ kɔfa bɛ bɔ balela nemɔ kɔfa Yesu so kɔboka ye so kɔwa.

¹⁵Na ɛhe de, yɛnate Awurade dwirɛ so yeɛ yɛkã yɛkyire ɛmɔ ɔ, kyɛ yɛ bɔ yɛte ase, ná yɛtena ngoa nu yɛkoodwu Awurade walɛ ne anu ne, yɛngosa bɛ bɔ balela nemɔ anwo.

¹⁶ Ofikyɛ Awurade bɔbɔ kɔfa esebɔlɛ, abɔfo panyi komvi ne Nyameɛ totorobɛndo komvi kofi nyameɛso kodwu kɔwa, na Kristo nu awufoɛ bekoli moa bekodwɔso,

¹⁷na afei yɛ bɔ yɛte ase, bɔ yaha ne, ɔne bɛ koso, bɛkɔfa yɛ munungum nu maa yɛkooyia Awurade wɔ ewienu, na sɔ yeɛ yɛne Awurade kɔtena daa ɔ.

¹⁸Yiti ɛ́mɔfa edwirɛ hemɔ bɛ́kyekye ɛmɔ wora.