Read Sehwi Yosua 1 Bible Online

Yosua 1 - Sehwi bible

Yosua 1

¹AWURADE somvoɛ Mose wue asi ne, AWURADE ha hyirele Nun awa Yosua, bɔ ɔte Mose bokafoɛ ne kyɛ,

²“Me somvoɛ Mose wawu. Yiti boaboa wɔ nwo kɔpɛ asue Yɔɔdan, ɛne Yisraelfoɛ hemɔ amukoraati, ná ɛmɔhɔ aseɛ bɔ méfa méma bɛ ne aso.

³ Nekaa biala bɔ ɛmɔ gya kotia ne, mafa berɛ mama ɛmɔ, kyɛbɔ nhyɛle Mose bɔ ne.

⁴Ɛmɔ aseɛ ne fite ɛserɛ ne aso ɔne Lebanon he, toonn bɔ ɔkwaadwu asue piri Yufreti ɔne Hitifoɛ aseɛ mukoraati bɔ ɔkwaadwu Ɛpo Piri ne wɔ eyia atɔleɛ bue nu dɔ.

⁵ Sona biala ngɔhora ngogyina wɔ nyunu, mmerɛ biala bɔ ɛte ase ɔ. Na kyɛbɔ ngyinane Mose si nen, sɔ ala yeɛ ngogyina wɔ si ɔ. Mengoli wɔ ngasi, yeɛ mengɔyakyi wɔ nu.

⁶ Gyina pindinn ná ma w’ahone yɛ se; ofikyɛ aseɛ bɔ ndale ye nwo ndaen ngyirele mmenia hemɔ bɛ nana mɔ kyɛ ngɔfa ngɔma bɛ nen, wɔ yeɛ ekoli mmenia ne nyunu maa bɛkɔɔfa bɛkɔyɛ bɛ deɛ ɔ.

⁷Wɔ de, gyina pindinn ná ma w’ahone yɛ se paa; ná nea kyɛ mmeraa mukoraati bɔ me somvoɛ Mose hyehyɛ mane wɔ ne ekoli so ɔ. Nnɛdi ye nwo makyebu kɔ famaa anaa bɛen, amaa ɔnate so wayie wɔ yé wɔ nekaa biala bɔ ɛkɔhɔ ɔ.

⁸Nnɛyakyi Mmeraa nwomaa he kengalɛ le; na mmom dwene ye nwo alehyeleɛ ne alesaleɛ, amaa ɔnate so ali bɔ bahyerɛ ye nu amukoraati so nahorɛ nu. Na ɛhe yeɛ ɔkɔmaa nningyein kɔhɔ so yé kɔma wɔ, ná wayie wɔ yé ɔ.

⁹Yiti méhyɛ wɔ kyɛ, gyina pindinn ná ma w’ahone yɛ se; nnɛsuro, yeɛ nnɛma wɔ kunu tete wɔ, ofikyɛ AWURADE wɔ Nyameɛ gyi wɔ si wɔ nekaa biala bɔ ɛkɔhɔ ɔ.”

¹⁰Afei Yosua hyɛle maen mbanyi nemɔ kyɛ,

¹¹“Ɛ́mɔhyinihyini asikyeleɛ ne anu, ná ɛ́mɔfa ahyɛdeɛ he bɛ́ma mmenia ne kyɛ, ‘Ɛ́mɔboaboa ɛmɔ nwo bɛ́pena aleɛ bésie, ofikyɛ waha ɛlɛsa né ɛmɔkwaapɛ asue Yɔɔdan bɛkɔfa aseɛ bɔ AWURADE ɛmɔ Nyameɛ ɔ́fa ma ɛmɔ maa ɔyɛ ɛmɔ deɛ ne.’ ”

¹² Na Yosua sele Rubenfoɛ ne Gadefoɛ ne Manase abusua kure ne bue kyɛ,

¹³“Ɛ́mɔkaye edwirɛ bɔ AWURADE somvoɛ Mose ha hyirele ɛmɔ ne. Ɔnwa: ‘AWURADE ɛmɔ Nyameɛ ɔbaama ɛmɔ nekaa bɔ ɛmɔkɔtena kole bɛ nwome ɔ, na ɔkɔfa aseɛ he kɔma ɛmɔ.’

¹⁴Ɛmɔ aye mɔ, ɛmɔ mma mɔ, ɔne ɛmɔ nyɛmmoa kɔha asue Yɔɔdan si aseɛ bɔ Mose fa mane ɛmɔ ne aso. Nakoso ɛmɔ nu koɛhonɛfoɛ ne amukoraa de, ɔsɛ kyɛ bɛfa b’akodeɛ bɛpɛ asue ne bedi ɛmɔ aliɛma nemɔ anyunu moa, ná bɛboka bɛ,

¹⁵kɔpem kyɛ AWURADE kɔbɔ ɛmɔ aliɛma nemɔ atenaseɛ asomdwee nu, kyɛbɔ wayɔ wama ɛmɔ ne, kɔpem kyɛ bɛ koso bɛ sa kɔha aseɛ bɔ AWURADE ɛmɔ Nyameɛ ɔ́fa ma bɛ ne ɔ. Ɛhe asi ne, né ɛmɔasa bawa baafa ɛmɔ bɔbɔ b’aseɛ deɛ ne, aseɛ bɔ AWURADE somvoɛ Mose fa mane ɛmɔ wɔ asue Yɔɔdan si, wɔ eyia afiteleɛ bue nu dɔ ne.”

¹⁶Na bebuale ye kyɛ, “Ahyɛdeɛ bɔ ahyɛ ama yɛ ne amukoraa, yɛkɔyɔ, yeɛ nekaa biala bɔ ɛkɔha kyɛ yɛhɔ ne, yɛkɔhɔ.

¹⁷Na kyɛbɔ yɛtiele Mose dwirɛ fale nikyee biala nwo nen, sɔ ala yeɛ yɛkotie wɔ dwirɛ ɔ. Yɛsrɛ kyɛ, AWURADE wɔ Nyameɛ oli wɔ si, kyɛbɔ olili Mose si nen.

¹⁸Na sona biala bɔ okohwi kɔfa wɔ dwirɛ so, ná wandie wɔ dwirɛ anaa wɔ nhyehyɛleɛ biala nen, ɔsɛ kyɛ beku ye. Wɔ de, gyina pindinn ná ma w’ahone yɛ se.”