Read Sehwi Yosua 13 Bible Online

Yosua 13 - Sehwi bible

Yosua 13

¹Né Yosua ayɛ panyi, yeɛ afei né wayɛ aworowaa; na AWURADE sele ye kyɛ, “Ayɛ panyi, yeɛ afei ayɛ aworowaa, nakoso aseɛ bɔ waha bɔ ɔsɛ kyɛ ɛmɔfa bɛyɛ bɛ deɛ ne, ɔte dɔnn.

²Aseɛ bɔ waha berɛ ne ɛhe: Filistifoɛ aseɛ ne amukoraati, ɔne Gesurefoɛ deɛ amukoraati,

³fite asue Sihɔ bɔ ɔwɔ Misraim eyia afiteleɛ bɔ ɔkwaadwu Ekron ɛwɛen so wɔ ye sorɔ dɔ ne. Ye mukoraa te Kanaan aseɛ. Filistifoɛ ahemvo nnu yeɛ bɛwɔ berɛ ɔ. Bɛwɔ Gasa, Asedɔde, Asekelɔn, Gate ne Ekron, yeɛ Awimfoɛ koso bɔ bɛwɔ ngwaen dɔ ne.

⁴Kanaanfoɛ aseɛ ne amukoraati, Meara bɔ ɔte Sidonfoɛ aseɛ ne, toonn bɔ ɔkwaadwu Afeke bɔ ɔwɔ Amorifoɛ ɛwɛen so ne;

⁵Gebalfoɛ aseɛ, Lebanon amukoraa bɔ ɛfa kɔ eyia afiteleɛ dɔ ne, fite Baal Gade bɔ ɔwɔ Hɛmɔn bokaa ne nye abo bɔ ɔkwaadwu Lebo Hamate ne.

⁶ Na Sidonfoɛ amukoraa bɔ bɛtete mmokaa aseɛ ne aso, fite Lebanon bɔ ɔkwaadwu Misrefote Maim ne, me bɔbɔ yeɛ ngɔfoa bɛ ngofi Yisraelfoɛ nyunu ɔ. Na wɔ de, kyekyɛ aseɛ ne ma Yisraelfoɛ maa ɔyɛ b’agyapadeɛ, kyɛbɔ mahyɛ wɔ kyɛ ɛyɔ ne ala.

⁷Afei de, kyɛ aseɛ he maa ɔyɛ agyapadeɛ ma abusua kure ngona ne ɔne Manase abusua kure ne bue.”

⁸ Manase abusua kure ne bue ko bɔ waha ne de, né bɛ ne Rubenfoɛ ne Gadefoɛ bali moa banya b’aseɛ deɛ dada. Mose yeɛ ɔfa mane bɛ wɔ asue Yɔɔdan si eyia afiteleɛ bue nu dɔ ɔ, kyɛbɔ AWURADE somvoɛ Mose hyɛ mane bɛ ne:

⁹Aseɛ ne trɛ fi Aroye bɔ ɔla Anɔn bɔnza ne noa ne, ɔne kuro bɔ ɔwɔ bɔnza ne afia ne, ɔne Medeba bokaa frɛtɛɛ amukoraa bɔ ɔkwaadwu Dibɔn;

¹⁰ɔne Amorifoɛ hene Sihon bɔ olili hene wɔ Hesebon ne, ye nguro amukoraati, toonn bɔ ɔkwaadwu Amonfoɛ ɛwɛen so ne.

¹¹Yeɛ Gileade, Gesurefoɛ ne Maakatifoɛ aseɛ, Hɛmɔn bokaa ne amukoraa, Basan amukoraa bɔ ɔkwaadwu Saleka ne.

¹²Ogo bɔ olili hene wɔ Astarote ne Yedrei ne, ye maen amukoraa bɔ ɔwɔ Basan (Refaim bosofoɛ ne, né waha ye ngome). Né Mose ali moa wali sɔ ahemvo nemɔ so ngonim watu bɛ wafi berɛ.

¹³Nakoso Gesurefoɛ ne Maakatifoɛ de, Yisraelfoɛ andu bɛ amvi berɛ, yiti Gesurefoɛ ne Maakatifoɛ tɛ te Yisraelfoɛ nu maa waadwu ɛnɛ.

¹⁴14 Lewi abusua kure ne angome de, Mose amma bɛ aseɛ ne bie. Afɔleɛ bɔ bɛbɔ ye see so bɛma AWURADE Yisrael Nyameɛ ne yeɛ ɔte b’agyapadeɛ ɔ, kyɛbɔ ɔha hyirele bɛ ne.

¹⁵Mose fale aseɛ ne bie mane Ruben abusua kure ne, kyɛbɔ bɛ mmusua mmusua nemɔ te ɔ.

¹⁶B’aseɛ ne, ye noa hyɛ ye bo fi Aroye bɔ ɔwɔ Anɔn bɔnza noa, ɔne kuro bɔ ɔwɔ bɔnza ne afia ne, ɔne bokaa frɛtɛɛ ne amukoraa bɔ ɔkwaadwu Medeba;

¹⁷Hesebon ne ye nguro amukoraa bɔ bɛwɔ bokaa frɛtɛɛ ne aso ne: Dibɔn, Bamote Baal ne Betebaal Meon;

¹⁸Yahasa, Kedemote, Mefaate,

¹⁹Kiriatim, Sibima, yeɛ Serete Sahare bɔ ɔwɔ bɔnza ne noa bokaa ne aso ne,

²⁰Bete Peɔ, Pisiga bokaa ne ngyɛnu, ɔne Bete Yesimote:

²¹mekyire bokaa frɛtɛɛ ne aso nguro amukoraati, yeɛ afei Amorifoɛ hene Sihon bɔ olili hene Hesebon ne, ye maen amukoraati. Mose lili ye ne Midian mbanyi hemɔ so ngonim: Ewi, Rekem, Sure, Hure ne Reba. Sɔ mmenia hemɔ tenane Sihon gya nu belili hene wɔ aseɛ ne aso.

²² Beɔ awa Balaam bɔ odi ahɔen ne, Yisraelfoɛ fale ngrandɛ huni ye bɛbokale mmenia bɔ behuni bɛ ne aso.

²³Asue Yɔɔdan noa yeɛ ɔte Ruben abusua kure ne wɛen ɔ. Ruben abusua kure ne, ye agyapadeɛ deɛ ɛne. Sɔ nguro nemɔ ne namue nemɔ yeɛ Ruben mmusua mmusua nemɔ nyane ye ɔ.

²⁴Mose mane Gade abusua kure ne koso agyapadeɛ, kyɛbɔ bɛ mmusua mmusua nemɔ te ɔ.

²⁵B’aseɛ ne noa fa Yasere, Gileade nguro ne amukoraa, ɔne Amonfoɛ aseɛ ne bue, toonn bɔ ɔkwaadwu Aroye bɔ ɔwɔ Raba eyia afiteleɛ ne;

²⁶ofi Hesebon bɔ ɔkwaadwu Ramate Misepe ne Betonim, ofi Mahanaim bɔ ɔkwaadwu Dɛbi ɛwɛen so,

²⁷ɔne bɔnza ne anu nguro hemɔ: Bete Haram, Bete Nimra, Sukote, Safon, yeɛ Hesebon hene Sihon ahennie ngaa ne, Yɔɔdan ɛwɛen so, toonn bɔ ɔkwaadwu Kinerete ɛpo ngwaen dɔ, ɔne Yɔɔdan si eyia atɔleɛ bue nu dɔ.

²⁸Gade abusua kure ne, ye agyapadeɛ deɛ ɛne. Sɔ nguro nemɔ ne namue nemɔ yeɛ Gade mmusua mmusua nemɔ nyane ye ɔ.

²⁹Mose mane Manase abusua kure ne bue aseɛ; na ɔyɛle Manase abusua kure ne bue agyapadeɛ, kyɛbɔ bɛ mmusua mmusua nemɔ te ɔ.

³⁰B’aseɛ ne, ye noa hyɛ ye bo fi Mahanaim, Basan amukoraa, Basan hene Ogo maen amukoraa, ɔne Yari nguro aburasia mukoraa bɔ bɛwɔ Basan ne,

³¹Gileade bue, Astarote ne Yedrei, Ogo ahennie nu nguro bɔ bɛwɔ Basan. Mose fale sɔ aseɛ ne amukoraa mane Manase awa Makyiri ye bosofoɛ, kyɛbɔ bɛ mmusua mmusua nemɔ te ɔ; kyɛ ɔyɛ Makyirifoɛ bue nu ko deɛ.

³²Sɔ aseɛ nemɔ yeɛ Mose hyɛle ye wɔ Moabo aseɛ frɛtɛɛ ne aso ɔ, asue Yɔɔdan si, wɔ Yeriko eyia afiteleɛ ɔ.

³³ Nakoso Lewi abusua kure ne de, Mose amma bɛ aseɛ biala, AWURADE Yisrael Nyameɛ yeɛ ɔte b’agyapadeɛ ɔ, kyɛbɔ ɔha hyirele bɛ ne.